Ujor ka Forest ba mih jingsma na Shillong Club ha Nan Polok

Shillong, 29 Naitung:
U DFO ka Forest u Bah SF Nongsiej u la ong ka tnad Forest ka la ai jingthoh ha kito ki snem ba la dep sha ka Shillong Club ba kim dei ban pyntuid ia ki jaboh sha ki nala namar ba kine ki jaboh kiba tuid na katei ka nala ka pynmih ka jingsma iwtung hapoh ka Nan Polok bad katei ka jingsma kaba wan tuid na katei ka Hotel ka la pynthut ia ki briew kiba wan iaid pyngngad ha katei ka park.
U la iathuh ba kham mynshwa, la don ka jingthmu na ka liang jong ka Forest Department ba kin ai noh da ka Showcause notice sha ka Management jong ka Shillong Club halor kane ka jingleh thurmur jong ka.
Hynrei u la iathuh ba hadien ba ki la ujor sha ka Meghalaya Control Pollution Board ka jingsma ka ba wan tuid na ka Shillong khamtam ha ki por slap ka la kham duna. u la ong ba ia kane ka jingsma ka kham jur bha ha ki por slap namar ba ki jaboh kiba wan tuid na katei ki la pynshlei ia ki nala. Ha kawei ka liang u la iathuh ban kham pynitynnad ia katei ka park ka tnad Forest ka la thmu ban thung da u syntiew Mangkariang u ba mih na kane ka jylla namar ba bun ki nongwan jngoh kai pyrthei ha ba ki wan ha kane ka park ki kwah ban iohi ia kiei kiei ki kynja dieng kynja syntiew ki ba mih na kane ka jaka.