Ujor ka CSWO ha u DGP, ba iohkam da kaba siew pisa

8 ngut ki siew T.45 & T.75 hajar ban ioh kam ha Assam Rifles
Shillong, 15 Naitung:
Ka CSWO hapoh ka jingialam ka Kong Agnes Kharshiing ka la ujor ha u DGP ka jylla pyrshah ia ki ar ngut ki briew halor ka jingkynnoh ba ki shim pisa hapdeng T.45 haduh T. 75 hajar na ki 8 ngut ki briew ban pynioh kam.
Ha ka jingujor sha u DGP ka Kong Kharshiing ka la ong ba ar ngut ki briew kynthup ka Geeta Thapa bad Madan Thapa ki la shim pisa na ka 8 ngut na bynta ban pynioh kam ha katei ka tnad.
Katkum ka jingujor ba kiba siew T. 50 hajar ki long u TB Tahkuri na bynta ban thep kam ia u khun jongu u Om Bahadur Tahkuri ha ka ORL ha Meghalaya, u PB Sahi ban thep kam ia u khun jongu u Prem Sahi ha ka kam ORL ha Meghalaya, u KB Basnet ia u khun jongu, u Madhu Kumar Basnet ha kam ORL ha Meghalaya, u J Ansari u siew T. 45 hajar ban thep kam ia u khun jongu u Farood Ansari ia ka kam Clerk, u Kanchen Chettry u siew T. 75 hajar ban thep kam ia u para jongu, u Narayan Chettry ia ka kam Booking Clerk ha Railway Kolkata, u Bechan Chauhan u siew T. 50 hajar ban thep kam ia u khun, u Rajendra Chauhan ia ka kam ORL ha Assam, u HL Sharma u siew T. 75 hajar ban thep kam ia u para u Abhinesh Kumar ha kam ORL ha Bihar, u Majatlungbo u la siew T.75 hajar ban thep kam ia u para jongu, u Padi Lungbo Chawangtingdiul ha ka kam ORL ha Manipur.
Ka President ka CSWO ka la ujor ruh ba u Manjil Thapa bad Rithu Thapa ki la shah thungkam ha jingpynrungkam ha Laitkor dang shen ha Assam Rifles kum ki Nursing Assistant ha Shicovi 7th Mile Dimapur, Nagaland, bad kawei ka kynthei kaba kyrteng ka Pinky na Happy Valley East Khasi Hills kaba kam kum ka Meitei kumba la kam da ma ka, ka la aplai ia ka kam ha MLP Meghalaya dang shen bad ka la pyndonkam ia ka kyrteng jong kawei pat ka briew ka Ningombam Malemnganba Meitei da kaba pyndonkam da ki syrnod thok.
Ha ka jingujor sha u DGP ka Kong Agnes ka la ong ba kane ka dei ka jingma ia ka jingshngain ia ka ri bad ka jylla haba ka jylla ka dang iakhun ia ka jingwan tyllep ki briew nabar namar ba kitei ki briew ki dei ki nongkhaii kam da kaba dawa pisa ban thep kam ia ki briew da kaba thok ruh ia ki.
“Ngi kyntu ia ka bor jong phi ban leh mardor ia kane ka kam ban pynlong ia ka jingtohkit khnang ban sei madan ia kiba donkti bad ban pynshitom katkum ka ain”, la ong ka President ka CSWO.