Shillong, 27 Nailur:
Ka seng BJP jong ka Meghalaya, ka la thoh sha U PP Choudhury, myntri kam ain jong ka sorkar India, ha kaba ka pynsngew ba ha Meghalaya, na ki 11 tylli ki District, ki don tang 8 tylli ki Consumer Redressal Forum bad ha ki hynriew tylli ki District, la khlieh ia kitei ki Forum da ki Deputy Commissioner.
Ka BJP, ka kren artatien namarkata ia ka bor bishar jong ki Deputy Commissioner, namar ba ki dei ruh ki khlieh jong ka tnat marbam ha ki District bad kumta kin nym lah ban shong bishar dalade, ha kaba iadei bad ka kam sam sharak, sam khaw, sam lyer shet bad kiwei de ki kam, ba la khlieh hi da ki Deputy Commissioner ha ki District.
La ujor ba ha East Khasi Hills District bad ha West Garo Hills District, la jied ia U District & Session Judge(s), u long kum U President ki District Consumer bad la iathuh ba ha East Khasi Hills, ka District Forum, ka ia kynduh tang arsien ha ka shitaiew.
Ka BJP, lyngba U Tilok Dasgupta, uba peit ia ka kam ain ha ka Jylla, ka dawa namarkata, ban pynkylla noh ia ki ain, na ka bynta ban pynthikna ba ki treikam bha ki District Forum ha ka Jylla.