Ujor ia ki nongialam KSU, ba rung jubor ha kamra u CEM

Jowai, 20 Risaw:
Ka Jaintia Hills Autonomous District Council(JHADC) lyngba u Joint Secretary jong ka Council mynta ka janmeit ka la ujor ejahar pyrshah ia ki dkhot bad nongialam ka KSU-ha Jaintia Hills.
Ki nongialam ka KSU ki kynthup ia u Nangai Sutnga bad u Justice Paul Lyngdoh ha ryngkat kiwei kiwei halor ka jingrung jubor jong ki ha kamra u CEM ka JHADC hynnin ka sngi Balang.
Katkum katei ka jingujor, la kynnoh ba hynnin ka sngi ha ka por kumba 4:00 pm, ka kynhun KSU hapoh ka jingialam u Nang-ai Sutnga bad u Justice Paul Lyngdoh ki la rung jubor ha kamra jong u CEM ka JHADC, u ma Thombor Shiwat bad ki la byrngem byrsit ia u CEM kumjuh ia kiwei pat ki MDC kiba don ha kamra jong u.
Shuh shuh la kynnoh ruh ba ka jingrung ki dkhot bad nongialam ka KSU hapoh kamra jong u CEM ka long kaba be-ain namar kim shym la iohbor satia na kano kano ka bor jong ka JHADC khamtam na u CEM.
Lah ban kynmaw ba hynnin ka sngi Balang shi kynhun ki dkhot bad nongialam ka KSU hapoh ka jingialam u Nang-ai Sutnga bad u Justice Paul Lyngdoh ki la rung jubor hapoh kamra u CEM ban ia kynduh ia u na ka bynta ban buh ia ka jingdawa ban pynkylla kyrteng ia ka thanat kaba la thmu ban buh ha Lakadong, East Jaintia Hills.  Ia katei ka thanat la ai kyrteng Lad-Lakadong Police ha ka jaka Lakadong.
Ki nongialam ka KSU ki la ong ruh ba halor  kane, ka seng ka la dep ban pan Appointment ban ioh ia kynduh ia utei u CEM ka JHADC bad hadien ba u la kyntait bun bun sien, hynnin ka sngi, ka KSU ka la hiar ban ia kynduh, hynrei ynda poi ha ophis ka JHADC, u CEM u la phah wan ia ki hadien shi kynta bad hadien shi kynta ba la ap ruh utei u CEM u shym la kheinsnep satia ia kitei ki dkhot bad nongialam ka KSU.
Dei hangne ba ki dkhot bad nongialam ka KSU ki la rung da ka bor ban iakren halor katei ka jingdawa jong ki. Hapoh kamra jong u ki don ki heh spah bad u CEM barim u Madonbai Ryngbai bad mar sienrung ka la don ka jingiania kaba khluit bad hadien ka jingiakren u CEM u la kular ban shimkhia ia ka jingdawa jong ki.
Naka liang ka KSU kala pynrem Jur iaka jinglong ehriang une u CEM naba  bunsien ula  kyntait ban ia kren bad ki para sengbhalang kiba thmu ban iakren naka bynta kiba bun ki kam. Naka liang ka seng ka ong ba une u CEM ula thmu ban pyllong iakane ka kamra Trei kam jong u kum ka kamra ha iing la jong.