Ujor ejahar u kpa ka Angelbeth, ba shah ktah kti

Shillong, 22 Risaw:
U kpa ka Angelbeth Lyngdoh Nongpiur u Bah George Arthur Warjri hynne ka sngi Balang u la ujor ejahar pyrshah ia ki katto katne ngut ki briew da kaba kynnoh ba ki la shoh la dat ia ka khun jong u, ha khmat ki pulit, ha shwa ba kan shah kem ha ka 15 tarik Risaw 2014.
U kpa ka Angelbeth, u la ong ba ka jingshah ktah kti ha katto katne ngut ki briew ka la ktah ia ka jinglong kynthei jong ka hakhmat ki paidbah nalor kata ki la pyrshang ruh ban pyniap ia ka.
Haduh mynta kaba sngewsih ka long ba ki pulit kim pat leh eiei ia kito ki briew kiba donkti ban leh ia kane ka kam haduh ba kin da shoh da dat ia ka khun jong u.
Ha ka ejahar ba la ujor da u kpa ka Angel beth hapoh Laban Police Station, u la pynpaw ba ka long kaba ktah mationg ia u ban iohi ia ki video ba la pyn saphriang lyngba ki lad pynphriang jingtip (Social media) ba shwa ba kan shah kem la shah shoh shah dat shwa ha ki katto katne ngut ki briew ha khmat ba donlang ki pulit.
U Bah Warjri u la ong ba ka khun jong u ka la shah kem ha ka 15 tarik Risaw hadien ba la ujor ejahar da ka kong Saralin Marbaniang halor ka jingkynnoh ba ka khun jong u ka la rahbor ia u Mohan Pegu na jaka jong u na Nongsohphoh Lumparing.
Lah ban kdew ba dang shen katkum ka jingiathuh jong u Mohan, u la kam ba ka Angelbeth ka la rahbor ia u haduh saw sngi kynthih ha Guwahati da kaba set kut ia u hapoh kawei ka iing basa kaba don ha Guwahati bad kala shong kurim jubor ruh ia u.
Katkum ka jingiathuh jong u Mohan Pegu u la shah rahbor ha ka Angelbeth ha ka 11 tarik Risaw por 11:15 janmiet na iing sah jong u.
Dei ha ka janmiet 15 tarik ha ka por 11 baje eiei janmiet ba ka shnong bad kiba haiing bad ka seng 19-Shillong South Women Association, ki la kthong ia ka naduh Mawlai bad ioh bat syndon haduh Rhino.
Hadien ba la ioh bat ia ka, ki la aiti sha ki pulit ban leh ia kaba donkam bad na ka liang jong u Mohan bad ki bahaiing hasem jong u ki la pan jingiada na ka liang ki pulit namar ka jingshah byrngem.