Ujor ejahar ki ASHA ia ar-ngut ki briew na ka shnong Umjarasi

Nongpoh: Ka kynhun ki nongtrei ASHA hapoh ka kynhun Meghalaya ASHA Worker Union, ki la ujor da ka ejahar pyrshah ia arngut ki briew na ka shnong Umjarasi ha Ri Bhoi Distrik, halor ka jingkynnoh ba kitei ki briew ki la ktah kti ia kawei na ki nongtrei ASHA, kata ha ka por ba ka dang don ha ka kamram ban pynshai paidbah halor ka Covid-19.

Lah ruh ban kdew hangne, ba katei ka jingjia shah ktah kti pyrshah ia katei ka Nongtrei ASHA, ka la jia mynha ka 24 tarik mynta u bnai. Halor katei ka jingjia na ka liang ka kynhun ki nongialam ki ASHA, ki la leit ban pynsngew sha ka DC Ri Bhoi, na ka bynta ban kyntu ia ka ba ka dei ban shimkhia ban pynlong ia ka jingtohkit halor katei ka jingjia.