Ujor ejahar ka pulit homeguard, ba leh shait u pulit buaid

Jowai, 18 Iaiong:
Kawei ka pulit home guard kaba trei ha Jowai Traffic branch, Jowai Police station mynta ka sngi ka la ujor ejahar pyrshah ia uwei u pulit jong ka 5th Battalion uba trei ha Williamnagar bad uba dei na ka shnong Khimusniang Jowai.
La kynnoh ba utei u pulit, hapdeng ka jing buaid kyiad u la jrong kti ia kawei ka pulit home guard bad ha katei ka por, kawei pat ka pulit home guard, ka Yoowanka Phai, ka la pyrshang ban pyn thynda ia utei u pulit phong jain paidbah, pynban u la kynroi, timsih timsang bad ktah kti sa ia ka.
Katei ka drama ka la pynlong ia ki katto katne ki nongthoh khubor ban poi ha katei ka jaka bad utei u pulit buaid u la maham wad ia ki nongthoh khubor da kaba maham ia ki lada ki pynmih ia u ha ki kot khubor.
Ia utei u pulit ba la thaw klumar la tip kyrteng kum u Trechanmi Lytan bad ka jingjia ma lasdang ha ka por 2:50 pm. Kitei ki pulit homeguard kynthei ki la lait hadien ka jingwan poi iarap ki pulit na Jowai thanad la ioh bat ia utei u briew.
Ia utei u pulit, la phah eksamin ha ki doctor bad ki doctor ka  Jowai Civil Hospital, Ialong ki la pyntikna ba u la buaid jawshet.
Ki pulit ka Jowai ki la register case pyrshah ia utei u pulit ka 5th Battalion bad ka jingtohkit ia u ka dangiaid shakhmat.