Shillong: Ka NEHUSU ka la ujor ejahar (FIR) ha Rongram Police Station pyrshah ia u Proctor ka NEHU Tura u Gino A Sangma bad u Pro VC u G Singaiah ryngkat ki 7 ngut ki nongbylla. Ia katei ka FIR la phah lyngba u OC ka Mawlai Police Station.
Ha ka ejahar, ka President ka NEHUSU ka samla Genuica Majaw ka la ujor ejahar (FIR) ha Rongram Police Station pyrshah ia u Proctor ka NEHU Tura u Gino A Sangma bad u Pro VC u G Singaiah ryngkat ki 7 ngut ki nongbylla.
Katkum katei ka FIR ka President ka NEHUSU ka la ong ba ha ka 7 tarik mynta u bnai katba ki nongialam ka NEHUSU ki dang leit sha Tura Campus bad katba ki dang iaidkai pyngngad ha ka por 1:30 baje nohphai sngi ki la don 7 ngut ki nongtrei bar jylla kiba leh kynshleiñ ia ka.
Ha ka por mynmiet pat ha ka por 9 baje ka la ong ba u Proctor, u Pro VC ryngkat bad ki nongtrei ki la wan sha Guest House ba ki sah bad ki la pyntieng pynsmiej ba lada ki mih shabar kin shah thombor.Ki la ujor FIR ruh ba ki dkhot ka NEHUSU ki la kawang maw ia ka jaka sah u Pro VC kaba kim don jingtip eiei, ka la ong ba la pynbor ia ki da u Proctor ban kam ba dei ma ki ba leh ia katei ka kam.
Ka la kam ba hadien u Pro VC u wan sha Guest House ba ki sah kumta kum ka dak ka jingpdiang sngewbha ka la ai kti ban khublei ia u hynrei um treh khublei bad u la ong ‘Ngam kwah khublei kti bad kine ki jait briew’ ong ka FIR.
Ha katei ka FIR ka la ong ba la beh lut ia baroh na Guest House bad la phah tang ia ka President ban sah marwei, ha ka por mynstep pat la ong ba la knieh lut ia ki ID jong ki bad la shondur ia ki. Ha ka FIR la kdew ruh ba ki bor ka NEHU Tura ki la kren sha ki khubor ban pynthohbria ia ki nongialam ka NEHUSU.
Phi don ban ong eiei?