Shillong: U Bah Brawell Rynjah na shnong Mawphu u la ujor ejahar ( FIR) pyrshah ia u Syiem barim ka Hima Sohra uba la shah weng kam noh shipor halor ka jingkynnoh ba u la don kti ban sei beain ia ka pisa jong ka Hima khlem da ioh jingbit.
Katkum ki kot ki sla ba la ioh jingtip da ka RTI, u bah Brawel uba la ujor ha Sohra Police Station ha ka 23 tarik mynta u bnai pyrshah ia u Syiem barim ka Sohra u paiem Freeman Sing Syiem, u la kam ba ha ka 11 tarik Jymmang 2019, la kdew shai ba ka Dorbar kam shym la ai bor iano iano ha kaba iadei bad ka jingleit sei pisa na bank naduh ka 25 tarik Nailar 2018 haduh ka 31 tarik Lber 2019.
Hynrei u Bah Brawell u la kam ruh ba hadien ba u la peit bniah na ka jingthoh kiba iadei bad ki jubab ba u la ioh na u PIO, la lap ba u Syiem barim u Bah Freeman uba la shah weng kam noh shipor naduh ka 28 tarik Nailar 2018, u la don kti ha ka jingsei beain na bank ia ka pisa jong ka Hima.
Ka jingsei pisa kaba nyngkong jong u Syiem barim ka la long ha ka 28 tarik Nailar 2018 na SBI, Sohra Branch kaba la long haduh T. 50,000. Ha ka 30 tarik Nailar 2018 na Meghalaya Co- operative Apex Bank, Sohra Branch kaba long T. 50,000 bad ka 31 tarik Nailar 2018 na kane kajuh ka bank kaba la kot sha ka T. 4,00,000 bad ia kane, la kam ba la sei khlem kano kano ka rai ka dorbar.
U Bah Brawell u la ong ruh katkum ka jingtip ba u la ioh na u PIO, la ong ba u Syiem barim u la iai bteng ban shim ia ka jingai sngewbha (honorarium) kaba haduh T. 25,000 shi bnai na ka bynta hynniew bnai kata ha ka 1 tarik Nailur 2018, 2 tarik Risaw, 2018, 17 tarik Naiwieng 2018 , 18 tarik Nohprah 2018, 10 tarik Kyllalyngkot 2019, 15 tarik Rymphang 2019 bad 9 tarik Lber 2019.
Baroh ka pisa ba u Bah Freeman u la sei na ka bynta ka ‘ honorarium’ hadien ba u la shah weng noh shipor na ka jinglong Syiem ka la long haduh T. 1,75,000, la ong u bah Barwell katkum ka jingtip ba la ioh da ka RTI.
U Bah Brawell u la ong ba katkum ka jubab ba u la ioh na u PIO, la lap ruh ba u Bah Freeman u la ai sngewbha T. 5000 kaba dei ka pisa jong ka Hima sha u Myntri Kongwir ( Acting Chief) ha ka 14 tarik Lber 2019 ba un pyndonkam ha ka jingphah sumar ialade.
Phi don ban ong eiei?