Ujor biang U Tennydard, ba kam Scheduled Tribe U Mukul

Shillong, 23 Naiwieng:
U Tennydard Marak u la ujor biang ia ka mukotduma pyrshah ia ka jingkam Scheduled Tribe (ST) u Myntri Rangbah ka jylla u Dr Mukul Sangma ha ka Supreme Court ka ri.
U Marak u la thep biang ia ka jingujor ha ka 16 tarik Naiwieng hadien ba ka Supreme Court ka la phah ban shimti ka Kashari High Court.
Ha ka jingpyllait khubor mynta, u Marak u la ong ba ka jingbthah ka Supreme Court ban leit iakhun ia kane ka kam sha ka Kashari High Court kam iahap satia namar ba kane ka kam ka la don ha Supreme Court kaba la bthah hi ia ka National Commission ban pynlong ia ka jingtohkit halor kane ka kam.
“Haba ka Kashari Supreme Court ka dang bthah hi ia ka National Commission for Scheduled Tribe ban pynlong ia ka jingtohkit ia kane ka kam, kam long kaba iahap sur ban shimti pat ka High Court bad u la kyrpad ba ka Supreme Court ka dei ban shimti biang ban pynlong ia ka jingbishar halor kane ka kam”, u la ong u Marak.
U Marak u la ujor pyrshah ia ka jingkam Scheduled Tribe u Mukul Sangma da kaba kynnoh ba um dei satia u jaitbynriew Garo bad u la shu pynkylla ia ka jinglong Garo da kaba shu leh affidavit ban ioh jingmyntoi.U la dawa ba ka Kashari badonburom ka dei ban pynduh noh ia kane ka jingkam jong u Mukul Sangma kum u Garo namar ba um dei satia katkum ka jingshisha ba u la lap.