Ujor biang U John Leslee ha iing dorbar

Shillong, 24 Lber:
U MLA ka South Tura u John Leslee K Sangma mynta ka sngi u la ujor ha ka ing dorbar pyrshah ia ka jingthoh ka Kong Patricia Mukhim ia ka jingkren jongu, hapoh ka ing dorbar halor ka phang ba iadei bad ka jingbym ioh jingbam tynrai ha ki ing Meghalaya ha New Delhi, Kolkata, Mumbai.Haba wanrah ia kane mynta ka sngi u MLA ka South Tura u la ong ba ka jingthoh artikil ka Kong Patricia ha Shillong Times kaba la mih ha ka sngi Thohdieng ba la dep, ka la ktah ia ka burom ka ijot jong ka ing dorbar bad dawa ba dei ban leh eiei halor kane.
U Lamphang ka ing dorbar u AT Mondal u la pynbna ba ia kane ka jingujor u John Leslee la aiti sha ka Privilege Committee ka Ing dorbar. “Ia kane ka jingujor yn aiti sha ka Privilege Committee ba kan eksamin, tohkit bad ban wanrah da ka kaiphod halor kane”, la ong u Speaker.