|
Shillong: Ai dorkhas ka JSU War Jaintia Circle ha u EM ka tnat Trading License ka JHADC ban yn um ai Trading License bad Service Licence ia ki Dkhar ba wan kamai Kali bad ruh kiba trei bylla kiba dang lah hi u trai ban trei ha War Jaintia.
Ka Jaintia Students’ Union – War Jaintia Circle ha ka jingialam jong u President u samla Eddy Kery Pohtam, u General Secretary u samla Kerrydiam Lamin bad U Vice President u samla Jai Pohshna ki la leit iakynduh ia u Executive Member jong ka tnat Trading License ka JHADC, u Ma Winning G Sungoh ban ai ia ka dorkhas ban khang ia ka jingai Trading License ia ki dkhar lane ki Non Tribal khamtam ia ki kali Trok kit maw hapoh ka thain War Jaintia katkum ka aiñ Trading by Non Tribals, Jaintia Hills Autonomous District Council, 2015. Ka seng ka la pynpaw ba na ki 2000 tylli ki trok kiba ieng lain ban kamai ban pynpoi/ shallan ia u mawshun lane u boulder stone sha bangladesh, tang 200 tylli ki trok kiba lah ban rung sha kad land custom ha ka shi sngi kaba mut ba lada khein pdeng(average) ka mut ba ka shim por kumba 2000÷200= 10 sngi ei ei ban iaid na ka jaka tih maw shaduh sha kad khaii watla ka jingjngai ka long tang kumba hapoh 30km ei ei. Kane ķa jingjrong u lain naba bun palat ki kali ba wan kamai kitnong ki ba dei trai ki dkhar ka pynlong ia ki trai kali kiba dei ki khasi bad ruh ki nong niah kali ban ym ioh ia ka jingkamai kaba biang khamtam ha kaban pynbiang ia ki jingbam jingdih bad ruh kiwei pat ki jingdonkam jong ka iing ka sem ki nongbylla sngi bad wat ki nongkhaii ruh kumjuh. Kumta ka seng ka kyrpad ban shimkhia ban pynduh lane ban yn um ai trading license ia kiba nabar kum ki dkhar poi ei ba kin ioh lad ban knieh ia ka lad kamai kaba don hapoh ka thaiñ Ri War Jaintia.
Ka JSU War Jaintia circle kala kyntu ruh bad ka la ai ia ka dorkhas ban un um ai ia ki service( labour) license katkum ka aiñ Trading by Non Tribals, Jaintia Hills Autonomous District Council, 2015 ia ki bar jylla lane ki dkhar (Non Tribals) khamtam ha ki kam kiba dang lah hi ki jaitbynriew hynniewtrep ban trei kum ki kam Manager Export, Manager Quarry, Driver Trok, ki nongbud ia ki Trok, kiba sam kot ne shithi, ki nongshong dukan bad kiwei kiwei.
Ha kajuh ka por ka seng ka lah kyrpad ruh ia ki rangbah shnong lyngba ki dorbar shnong ba un um ai ia ka jingmynjur lane ka jingtyrwa (recommendation) ban ai lad ia u dkhar ( Non Tribal) ban kamai hapoh ka pud u sam jong ka War Jaintia bad ka Jaintia Hills hi baroh kawei.
U Ma Winning G Sungoh u lah mudui bad u lah kular ruh ban shimkhia ia kane bad ruh u la kyntu ia ki bor shnong ban un um pdiang ia ka jingpan bor lane ka reccomendation ban iohlad u dkhar bad ruh u la kyrpad ia ki briew ka thaiñ bad ka seng ban ia snohkti lang ban pynduh ia kane da kaba iatreilang. Kumta ka seng ka lah kyrpad ia ka bor jong ka JHADC ban shimkhia bad ba un um ai thamula ia ka lad ban kamai u poi ei bad ruh ia ki dorbar shnong ban long kiba peitngor.
|
Phi don ban ong eiei?