Ujor ba tih khyndew beain ha Killing

Nongpoh, 12 ’lyngkot:
Da kaba sngewkhia halor ka jingshah pynjulor pathar ka mariang da ka jingdon jong ki briew kiba la tih pathar ia ki lum ha kiba bun ki jaka ha ki thain Killing, Ri Bhoi District, kumta ki nongialam ka HNYF, Northern Region, mynta ka sngi, ki la leit ban kynduh ia u CEM ka KHADC ha ryngkat bad ka dorkhas ban pynpaw ia ka jingpyrshah halor katei ka kam tih khyndew beain ha katei ka thain kaba la wanrah ka jingsniew dur ia ka mariang.
Ha kane ka jingleit ban kynduh ia u Bah PN Syiem CEM ka KHADC, ka HNYF, Northern Region, ia kaba la ialam da u Bah Marcus Marten kum u President lem bad ki dkhot ka seng, ki la pynpaw ia ka jingsngewkhia kaba jur halor katei ka kam tih khyndew beain, ha kaba na ka liang jongki kim lah khlem da ujor sha ki bor bahalor ban pynpaw ia ka jingpyrshah halor katei ka kam tih khyndew beain.
Haba iakren bad ki nongthohkhubor, na ka liang u Bah Marcus Marten, u la iathuh ban na ka liang u CEM u la kular ruh ba un ialeh ban shimkhia halor katei ka kam tih khyndew beain ha katei ka thain.
Kumta, halor kane ka jingkular da u CEM ka KHADC, na ka liang ka seng kam lah khlem da pynpaw ia ka jingkmen ia kaba la kular da u CEM ka KHADC bad ha kajuh ka por ka seng ka kyntu ruh ia ka KHADC ba un shimkhia, khnang ba katei jingpynjot bad ka jingpynjulor ia ka mariang kan sangeh noh shen, u la bynrap.