Ujor ar maloi, ba tieng ia ka EC ba mynta: Ardent

Shillong,22 Naitung:
U Chief Executive Member ka Khasi Hills Autonomous District Council u bah Ardent Miller Basaiawmoit uba bat ruh ha ka juh ka por kum u MLA bad MDC ka Nongkrem, ha ka jingia kren bad ki nongthoh khubor mynta ka sngi, u la ong ba ka jingujor pyrshah ia ki MLA bad MDC kiba bam ar maloi ka dei tang ka jingtieng jongno re jongno ia kane ka EC ba thymmai mynta kaba la ialam da ka HSPDP bad kaba ia treilang bad ki seng riewlum hapoh ka lama jong ka All Regional Party Alliance ( ARPA).
U bah Ardent u la ong “ Balei ka mih kane ka jingujor mynta , ym pat ha ki snem kiba la dep, kane lehse ka lah ban dei ka jingtieng jongno re ia kane ka EC kaba mynta kaba treikam bad iaid shakhmat”, u la ong ba ka Ad Rules 17 1(a) kam shym la kren ia kin nongmihkhmat paidbah kiba bat ar maloi hynrei ka kren tang ia ki shakri sorkar ba kim long ban bat ar maloi bad kumjuh ruh kum ki nongmihkhmat.
U MLA bad MDC ka Nongkrem u la ong ba u bah Hoping stone Lyngdoh, u la long u MLA bad MDC la 7 samoi kata 35 snem, u bah Pynshngain N Syieme u nongialam ka liang pyrshah bad kumjuh ruh u CEM barim u long u MLA bad MDC , ym tang mynta hynrei ym shym ba kren eiei hynrei mynta ka kynti pat ki la mih ki jingujor bad u la kynnoh ba kitei ki jinguojr ki dei tang ka jingtieng ia ka EC ba mynta.
U CEM ka KHADC u la ong ruh ba ban bat ar maloi ka shong ha ka jinglah jong u nongmihkhmat ban treikam, u la ong hato ka kham lah ban long MDC u MLA uba kren eiei bad uba trei ia ka kam ne kham lah ban long tang u MDc da ki phew snem khlem treikam eiei. Na ka liang jong u –u la pynpaw ba um pat leh ia kano kano ka kam be-ain kaba long pyrshah ia ka riti synshar ne ia ka ain , bad lada dei ba katei ka jingbat MLA bad MDC jong ha ka juh ka por ka long kaba be-ain u kloi ban hiar shuki noh.