Uei u 666

La thoh da u Ex.Rev.K.Langrin,
Seiñduli, West Khasi Hills District.

Paralok, u 666 u dei uba ka pyrthei khristan ka khynñiuh. Ba la pynthanda shipor mynta dei u Coronavirus.

To ngin ia peit bad pynlut ia ka por khyndiat ban tip shaphang u 666. Ki 666 ki la don naduh ka kitab barim haduh kaba thymmai. Lah ban shem ia kita na 1Syiem.10:14; 2Khronikl 9:3; Esra.2:13; Jingpynpaw 13:18.

Ïa u Nero la ñiew u 666, ïa u Napoleon la ñiew u 666, ia u Hitler la ñiew u 666, ia ka pansngiat u Pope la ñiew u 666, ia ka Ribaibal ha ri Khasi la ñiew u 666 (1906, 1956, 2006). Ka don kawei ka kali kaba la ioh ia u no.666, ha shnong kaba don 700 ïing kawei ka ïing ka hap ha u 666, ha ka balang kaba don 670 ngut ki khlieh khristan uwei u ioh ia u 666.

Kaba pynkhynñiuh ia kiba bun ki briew ka dei tang kawei ka dkhot ha ka Bible. Kata, Jingpynpaw 13:18 “Hangne don ka jingstad. Uta uba don ka jingshemphang to un kheiñ ia kata ka jingkheiñ uta u mradkhlaw; namar ka long ka jingkheiñ u briew bad kata ka jingkheiñ ka long 666.”

Naduh ka dkhot 1 haduh 10 la thoh shaphang u mradkhlaw uba nyngkong uba mih na ka duriaw, kaba thew ia u nongsynshar pyrthei. Naduh ka dkhot 11 haduh 17 la thoh shaphang u mradkhlaw uba ar u ban mih na ka khyndew kaba thew ia u nongsynshar niam.

Uta u mradkhlaw uba nyngkong u long u riewkhraw u ban synshar ia ka pyrthei baroh kawei u long u briew ba u Soitan ba la khot u Ïakjakor u la ai bor. Ynda haba uta u briew u la ioh ia ka bor na u soitan un kren beiñ ia u Blei bad ia ki angel ka bneng, un pyniap ia baroh ki riewkhuid jong u Blei, bad un shim noh ia ka jinglong Blei halade.

Naduh ka dkhot 11 haduh 17 la thoh shaphang ka jingwanmih uta u mradkhlaw uba ar uba long u nongsynshar jong baroh ki jait niam ha ka pyrthei. La thoh ruh ia ki kam bad jingtrei jong u katkumba u la ioh bor na u Ïakjakor uba long u soitan.

Ka dkhot 18 pat ka iathuh ia u number 666 uba long u nombar jingbeiñ Blei jong u mradkhlaw banyngkong.

Ki kam jong u mradkhlaw ba ar ki long ban ai bor ia u mradkhlaw banyngkong ban treikam, ban pynbor ia baroh ki briew ha pyrthei ba kin mane dem ia u mradkhlaw ba nyngkong. Ïa ki bym mane ia u yn pyniap noh baroh bad la pynbor ia baroh ba kin buh ia ka dak jong u mradkhlaw banyngkong ha ka kti kamon lane ha ka shyllangmat jong ki. Ka ktien “lane” ka thew tang ia kawei, ym baroh artylli. Kata ka mut lada la thoh ha ka shyllangmat, ym donkam shuh ban thoh ha ka kti kamon. Lada la thoh ha ka kti kamon ym donkam shuh ban thoh ha ka shyllangmat.

Paralok, nangno bad lano un mih u mradkhlaw banyngkong? U mradkhlaw ba nyngkong uba long u nongsynshar pyrthei un ym mih na ka ri India, namar ka long ka ri ba tlot bor haba ianujor bad kiwei ki ri jong ka pyrthei. Te lada uta u mradkhlaw un mih ha kine ki khyndiat snem ban wan khlem pep un mih na America, Russia ne China kiba long ki ri khlaiñ bor. Tangba ka jingwanmih jong uta u nongsynshar kan dang shim por slem namar ba ym pat lah ban pyniatylli ia baroh ki ri jong ka pyrthei. Ynda ki ri jong ka pyrthei ki la iatylli, kin sa thung tang uwei u nongsynshar uban synshar ia baroh ka pyrthei. Ynda la mih uta u nongsynshar, kan sa don tang kawei ka pisa ban pynmih da uta u riewradbah. Baroh ki briew ha ka pyrthei kin sa pyndonkam ia ka pisa ba la shna ma u.

Sa kawei ka jingkylli- Nangno bad lano un mih u mradkhlaw uba ar? U mradkhlaw uba ar, u ban long u nongsynshar niam un mih na ka niam khristan. Namarba la thoh tang ha ka Bible khristan. Napdeng ki niam ba kongsan jong ka pyrthei kiba long ka Hinduism, Buddhism Jainism, Zoroastrianism, Judaism, Christianity, Islam, Taoism, Confucianism bad Shintoism, dei tang ka niam khristian ne Christianity kaba la pait haduh 41,000 jait bad ki Bible ruh ki don arjait kiba long jong ki Catholic bad jong ki Protestant.

Ha shwa ban pyniatylli ia ki niam kan don shwa ka jingpyniatylli biang ia ki 41,000 jait ki balang khristan ba u nongthaw jingrwai u ong ha ka KHB 151:4 “Hapdeng ki thma bun rukom ba bun ki jingiapait.” U nongthaw jingrwai u ong ba kan poi ka por ba kitei ki 41,000 jait ki balang kin sa iasoh biang ban long tang kawei ka balang. Kumta u ong pat ha ka KHB 147:1 “Balang tang kawei hangne bad haneng.” Ynda ka la don sa tang kawei ka niam khristan kin sa pynmih sa tang kawei ka Bible ban khot “Common Bible”. Ha kata ka por ki ïingmane standard jong ki jait balang bapher bapher kin khang khyrdep noh namar kin iaseng lang tang ha kawei ka ïingmanebah. Te ka niam khristan kan sa long ka niam ba heh tam ha ka pyrthei.

Ynda la don sa tang kawei ka niam Khristan, yn sa pyniatylli sa ia kiwei ki niam naduh ha Hinduism haduh ka Shintoism kumba la ong haneng ban ia long tang kawei ka niam ne One World Religion. Dei hangta ban sa mih u mradkhlaw uba ar uban long u khlieh duh jong ka One World Religion.

U 666 u dei u nombar jong u mrad khlaw banyngkong. Hynrei ban pyntreikam ia uta u nombar dei ban ioh jingmynjur lang ruh na u mradkhlaw uba ar. Ïa ka jingpyniap ia kiba kyntait ban mane ia u mrad khlaw banyngkong la ai bor da u mradkhlaw uba ar uba long u nongsynshar niam. Ynda kita ki artylli ki mradkhlaw ki la ia trei lang, ka jingpyndonkam ban shon muhor (seal) da ka dak ha ka shyllangmat ne kti kamon ka la treikam. Ka ‘dak’ ka mut ka muhor ne marka kumba la thoh ha ki synduk ne byrni ba thep ia ki mar ki mata khnang ban tip ia ka jinglong trai. Ha kata ka rukom ba u soitan un ithuh ia la ki jong ki briew lyngba da kata ka marka ba la shon.

Mynta to ngin ia phai sa shaphang u Aadhaar number ba ki briew ki sheptieng. La pynmih ia u Aadhaar ha ka 28 tarik January 2009. Bad la sdang ban pyntreikam naduh ka 23 tarik u September 2013. Aadhaar ka mut unique Identification Authority of India ne UIDAI, ba la shna da ka sorkar India ha ka 28 tarik January 2009. Balei u don 12 digit? Khnang ban lah ban kheiñ ia baroh ki nongshong shnong ha India. Bad lada don tang 5 ne 6 digit yn ym lah ban kynthup lut ia baroh.

U Prime Minister Manmohan Singh bad ka Sonia Gandhi ki la ai nyngkong kum ka test 10 tylli ki Aadhaar cards ha kawei ka nongkyndong ha ka jylla Maharashtra, ka shnong Tembhli. Ka briew kaba la ioh nyngkong ka dei ka Rajana Sonawane ha u September 2010. Ka Rajana Sonawane ka dei ka briew ba duk katta katta. Ym don ba ithuh ia ka haba ka leit donkam ha ki office sorkar. Hynrei naduh ba ka la ioh ia ka Aadhaar card, baroh ki office ki la ithuh ia ka. Te ka jingthmu jong ka sorkar India ban pyntreikam ia u Aadhaar number ka long ba baroh ki nongshong shnong ha India naduh kiba duk haduh kiba riewspah kin ia ioh ia ka hok kaba mar kajuh.

Une u Aadhaar u treikam tang ha ri India. Kumta ngi dei ban sngewthuh ba ha kiwei ki ri ym don Aadhaar. Ka jingmut jong u Aadhaar ruh ka long ban pynithuh ia ka jinglong nongshong shnong ha ri India. U Aadhaar um da iapher na ka EPIC card, Pan card, Megha card, Pass Book, bad u long ka lynti ban ai jingmyntoi ia ka skhim MNREGS. Ka jingthmu jong ka sorkar India ban pyntreikam ia ki Aadhaar card ka long ban pynduh ia ka bamsap hapoh ka ri. Namar kumba long baroh shi katta lada ka sorkar ka phah jingiarap 1000 tyngka, ka poi sha u trai sa tang 200 tyngka, ba la ot mar khyndiat khyndiat da ki riewbamsap.

Don pat ki briew kiba sheptieng ia u Aadhaar, namar ki ong ba u dei u 666. Ki la mih bun ki briew kiba batai ba u Aadhaar u dei u 666 ba long ka dak jong u mradkhlaw banyngkong. Ka kitab Jingpynpaw ka iathuh ia ngi ba u mradkhlaw banyngkong u dei u nongsynshar pyrthei uba ialeh pyrshah ia U Blei. U mradkhlaw uba ar pat u long u nongsynshar niam uba long u nongkyrshan ia u mradkhlaw banyngkong.

Na ka bynta ki paralok kiba ong ba u Aadhaar u dei u 666, hato ki tip uei uta uba la ialehpyrshah ia U Blei bad uei uta uba pynbor ban pdiang ia u? Hato ki la mih ne em kita ki arngut ki radbah jong ka pyrthei bad jong ka niam? Ka Bible ka iathuh ba ynda la mih kita ki artylli ki mrad khlaw kan don ka jingpyniap beiñ ia ki riewkhuid jong U Blei. Te lada u Aadhaar u dei uta u 666, katno ngut u la pyniap naduh ka 23 tarik September 2013 haduh mynta? Wat tharai ba ka jingpyniap ki lehnoh ISIS bad ka jingpyniap u Corona ka mih na u Aadhaar.

Ka Bible ka iathuh (Jingpynpaw 14:8) ba ynda la mih kita ki mradkhlaw kan don ka jingpynbor ban ia klim sih. Hato ngi la bna mo ba kat kiba la pdiang ia u aadhaar ha ri Khasi ki la klim sih? Ka Bible ka iathuh ba ia ka dak jong u mradkhlaw yn shon tang ha kawei ka jaka, kata, ha ka shyllangmat ne ka kti kamon. Hato ym dei ba ia u aadhaar la shon ar jaka, kata, ia ki pyllew khmat (ym ia ka shyllangmat) bad ia ki shympriahkti baroh arliang? Ka Bible ka iathuh ba ynda la mih ki artylli ki mradkhlaw bad la pyntreikam ia u 666, ia baroh kat kiba kyntait ia u 666 yn ym shah shuh ban leit die ne leit thied ha ki iew ki hat. Hangno ngi la iohsngew ba ka la don kaba kum kata ha ki iew ha ri Khasi bad Jaintia ne ha ri dkhar? Hato ki bym pat pdiang ia u aadhaar ki la shah beh teng na iew kum ha Shillong, Jowai, Nongstoin, Nongpoh,…naduh ba la pynmih ia u aadhaar?

Ka Bible ka iathuh ia ngi ba kan don ka jingithuh kino kiba la shah ban shon marka bad kino ki bym pat shah shon. Hangne ha ri jong ngi ki la don bun kiba la pdiang aadhaar bad ki dang don bun ki bym pat pdiang. Hynrei haba ki leit lang sha ki iew ki hat bad ha jingiaseng ruh ngim ithuh ia ki.

Ko paralok, wat tharai ba u microchip u dei u Ksuid ne U Blei. Namar u dei tang u kynja tiar ba pyndonkam kum ha ki TV, computer, baje, mobile, etc. Lada phi sheptieng ia u microchip te phim dei shuh ban pyndonkam ia ka baje, mobile, etc. Bad ka jingwan mih uta u 666 kumba la iathuh da u Ioannis ka dang shimpor slem. Ka long kaba bakla ban sheptieng ia u aadhaar katba ban leh ia kiba bun jait ki pop phim sheptieng.

U bah Witting Mawsor, uba long uwei na ki riew iohi jngai jong ka West Khasi u ong ba u 666 u mih na ka dohnud jong ki briew. Ba la pynlong ia u 666 dei ki pop ba ki briew ki ju leh, kum ka pyniap briew, ka batbor, ka klim, ka tuh, ka lute, ka thok ka shukor, ka pynkheiñ aiñ, ka shetkylla, ka jingbym sngewnguh, ka sarong riewblei, ka sarong niam, ka jingleh donbor, ka jingñiewbeiñ ia kiwei, ka jingiakob spah, ka lorni briew, ka bishni pihuin, ka khwan myntoi, ka hanga mei, ka jingkhlem akor, ka jingjaipdeh, ka jingsngew biang, kaba iohi tang ia ki jingduna jong kiwei, ka dih buaid kyiad, drok, ka jingbym lah shah, ka jingbym don jingieit ia la ki para briew, ka jinglong arsap, ka jingkwah burom, ka jingpynjot bad pynsniew ia ka mariang bad ia ka imlang sahlang, ka jingbym sngap ia ka jingud jingnam ki para briew, ka jingñiewbeiñ ia kiba duk, ka bamsap, ka jingleh benami, bad kiwei kiwei.

Nga ruh nga sngewdei ia kitei kiba u rangbah u la kdew. Namar nga iohi ba ki briew mynta kim sheptieng ban leh ia kitei ki kam sniew kiba long ka pop ba ijli ha khmat U Blei. Dei ma ngi hi kiba thaw ia u 666, ym dei mano mano ruh. Bad u 666 u mih napoh jong ka dohnud ki briew. To tip ba U Blei u sa phah da ka khlam Corona ka long ba U la ijli eh ia ka jinglong ki briew ha kine ki sngi ba la syriem ia ki briew ha ka por jong u Noah hyndai, ba U Blei u la pynhap da ka khlam kaba nyngkong da ka um. Kyndit bynriew noh ko paralok bad to khie joit na kaba iohthiah. Te U Blei un sngewbha pat ia ngi bad un sngap ia ki jingduwai jong ngi.