Uba rung tuh sha South West Khasi hills, u dei ban siew bai lutksan, ong ka HANM

Shillong: Halor kajing iohi ia ka jinglong jing man hapoh Southwest khasi Hills District, ha dien ba la wan uwei ubriew uba la shu phet tuh na ka Quarantine center na Shillong, ka Seng HANM Southwest khasi Hills District ha ka jing ialam jong u President Mr Twaiding Thongni,U Mr jules wahlang assistant general secretary bad u Mr lambokstar marwein vice-president ha ka 14 tarik Nailar 2020 ki la leit iakynduh ia ka Deputy Commissioner jongka Southwest khasi Hills District bad buh da ka jingthoh ban dawa ban Ujor ejahar (First Information Report) ia uto u briew uba la pynkhein ia ki kyndon ain jongka sorkar.

Shuhshuh ka Seng ka dawa ba dei ban phah siew bai lutksan ha uto u briew ba pynkhein ain na ka bynta ki briew kiba la duh ka trei ka ktah ka bylla ka sngi khamtam kiba duk ba toi kiba shu bylla kyndoi jakpoh tang ban ioh pyndap iaka jingbam ba man ka sngi.Ka Seng ka banjur ba dei ban leh noh kloi iakine ki jing dawa khnang ban ym jia shuh kum kine ki jingjia nangne shakhmat. Nangta ka Seng ka kyrpad ruh ia ki bor pyniaid district ban pyntreikam biang iaka checkpoint kaba don ha shnong Mawthong namar ioh kin don ki briew kiba wan rung na kato ka surok hapoh jongka Southwest khasi Hills District khlem da ioh ban pynrung kyrteng ialade bad ban leh ruh ia ki test ba dei ban leh.