|
Shillong: “U Vice Chancellor jong ngi u la pynlong ïa kane ka jaka pule tang kum ka jaka jngohkai,” la ong u Rangdajied Marweiñ, Advisor jong ka seng ki samla pule jong ka skulbah North Eastern Hill University (NEHU) ka North Eastern Hill University Students’ Union (NEHUSU).
Ïa kine ki kyntien u samla Rangdajied u la khlei ha ka por ba u ïakynduh bad ki nongpathai khubor ka nongbah hadien ka jingleit ïakynduh ïa u Comptroller of Exams hynne ka sngi 21 tarik Jymmang 2019.
Hadien ba ki la dep ïakren pynbeit ïa ki kynrum kynram kiba ïadei bad ka end of semester examination bad u Comptroller of Exams, ki dkhot jong ka NEHUSU ki la leit rung sha ka kamra jong u Vice Chancellor hynrei um shym la don hapoh kamra.
“Kane ka ju jia manla ka por ba ngi thmu ban ïakynduh ïa u VC,” la ong u Advisor ka NEHUSU u Rangdajied Marweiñ, bad u la bynrap shuh shuh da kaba ong, “Lada um lah bantrei ïa kane ka kam te kan bha ba u aiti noh ïa ka shuki sha kiwei pat kiba kham kot bor bad kiba lah ban kitkhia.”
Ka daw kaba la pynlong ïa ka seng NEHUSU ban ong kumta ka dei namar ba man la ka por ba ki dkhot jong ka seng ki leit ban ïakynduh ïa u, um ju don satia ha kamra treikam.
“Ngi pynrem ia u VC ba um don ha University bad ngi tip ba u pynlong ia ka NEHU kum ka jaka jngoh kai,” ong u samla Rangdajied Marweiñ.
Une u samla u la bynrap da kaba buh ïa ka jingkylli, “Hapoh ka shibnai katno sien u wan sha ophis? Lada um lah te u dei ba mih noh na kane ka jaka.”
“U VC u dei ban address ïa ki issue kiba bun bad u dei ban solve ïa ki, kum ki vacancy kiba um shym khot application, bad kiwei ki jingeh jong ki khynnah pule bad ka wanrah jingeh ïa ki samla pule ban pursue ïa ki jingpule kum ka PhD,” la ong u samla Rangdajied.
|
Phi don ban ong eiei?