Shillong:U President ka North Eastern Hills University Teachers Association (NEHUTA) u Prof. Lakhon Kma, u la ong ba kam kwah ban leh kyrkieh ban pyntreikam ia ka National Education Policy (NEP) ha ka Undergraduate.
Mynhynnin ka sngi, ka NEHUTA, ka la pynlong ia ka jingiakhih rah plakad ban pyrshah ia ka jingrukom pyntreikam ia ka NEP, namar ba la shu leh kyrkieh bad ka la dawa ban khot ia ka jingialang ka Academic Council.
U Prof. Kma u la ong ba u ngeit skhem ba u Vice Chancellor ka NEHU un kylla ba mut noh shen bad lada um kylla bamut ha kine ki shiphew sngi ban wan bad lada ym kylla ban pynsangeh shwa ia ka jingpyntreikam ia ka NEP, kin sa leit iakhih biang ha NEHU.
“Ngi ngeit skhem ba un don noh ka jingpyrkhat ba bha bad ngin ai por hapoh shiphew sngi ba un kylla ka jingmut jingpyrkhat bad lada um kylla, kan bha un leit leh katba ha la iing lajong namar ba ha NEHU ym lah leh katba mon, bad ngin dawa ba un ieh noh ia ka shuki VC namar um long uba biang ban shong ha ka shuki namar phi leh katba mon, lada phi kwah ban leh katba leit leh sha la iing lajong”, la ong u Prof. Kma.
U la ong ba u VC ka NEHU u leh ia kane ka skulbah kum ka kompeni jong u bad ialade u shim kum u CEO hynrei ka NEHU kam dei ka kompeni ba un leh kumta. “U leh ialade kum u CEO jong ngi bad un leh katba mon ia ngi hynrei ha NEHU kam lah ban leh ia kata. Ha ka histori ka NEHU, ngi la ju beh bun ki VC bad ngim salia ban beh ia une ruh, ngin ym randien ngin tur shakhmat”, la ong u Prof. Kma.
U la kynnoh ba u VC u la pynjah ia ka rai jong ka Academic Council kaba 110 ka long ban ym pyntreikam ia ka NEP ha 2023-24 hynrei yn pyntreikam na ka 2024-25, hynrei u VC u khlem rekod ia ka rai jong kane ka jingialang bad u la pynjah syndon pynban.
“Kane ka pynpaw ba ka don eiei ha lyndet bad u la dung nadien ia ka Academic Council hynrei hadien katto katne sngi u la ong ba la rai ban pyntreikam ia ka NEP 2023 bad u la kwah ban leh kyrkieh ban shu pyni sha Delhi ba u la leh watla u shu shong ha kine ki ar snem ba la leit”, la kynnoh u Prof. Kma.
U Prof. Kma u la ong ba ka jingdawa ka long ban pyntreikam ia ka NEP 2024-25 ym ban shu leh kyrkieh.
Ha kajuh ka por, ka Meghalaya College Teachers Association ruh ka la iashim bynta lang ha kane ka jingiakhih ka NEHUTA. U General Secretary ka MCTA u Babu Airpeace Rani u la kynnoh ba une u VC u dei kum ka puhshilum (JCB) uba shu kyntur bad thom naphang khlem iaid katkum ki lynti.
U la kynnoh ba une u VC u long kum u diengpynkiang ia ki nonghikai ha jaka ban long ka lynti ban weng ia ki jingeh bad u kuman ia ki jingdawa ka NEHUTA bad ka MCTA. “Ka sorkar jylla kam lah ban shu long nongpeitkai namar ba ka jingleh u VC ka NEHU kan ktah ia ka lawei jong ki samla pule”, la ong u Babu Airpeace.
Phi don ban ong eiei?