U Samla Arles Rymbai, ula khlad lah shisnem tam mynta, hynrei ki sur jingrwai jongu, ki dang iai sawa ha ki shkor jong ki million ngut kiba ieid bad kiba sngew tynnad ia kitei ki jingrwai jongu.
U Samla Arles, u dei U Tymmen Basan jong ka Balang Moobakhon bad ha shwa ba un khlad, ula rwai ia ki phew tylli ki jingrwai bad U bah Skilful Pohsnem, uwei na kiba kham tip shaphang jong utei u samla, u iathuh ba u don ia 34 tylli ki jingrwai jongu ha youtube. Ki jingrwai jongu, la jan baroh ki long kiba iaid iew shi katdei, ha kaba la iathuh da U bah Pohsnem, ba ki nongsngap ia ki jingrwai jongu, ki la poi sha ka 4million lane kiba la sngap ki la poi sha ka 40lak ngut.
Ki jingrwai jong utei U Tymmen Basan, ba la khlad noh kiba ki riew ieid jingrwai ki sngap bha, ki long ka Ri Kanaan, kaba don palat 15 lak ki nongsngap, Khun Baieid 4.11lak bad nangta sha Ri Kanaan 5.16lak ki nongsngap. Kitei ki long khyndiat tylli ki jingrwai kiba paw bha jong utei U Tymmen Basan ba la khlad noh, dang ha ka rta kaba 34 snem.
Na ka bynta ban tip shaphang ka jingim jong utei u nongrwai, u tymmen Basan, U Rupang, ula iakren bad U Tymmen Basan ba mynta jong ka Lumshnong, U Ma Wompher Kyndoh bad kine harum, ki dei ki jing batai, kiba la phah da utei u rangbah.
Ka daw jong ka jingiap
U Lt. T.Bn. Arles Rymbai u la khlad noh na kane ka pyrthei ha ka 13tarik Jylliew 2019 ha ka por 1 PM ei ei ha ba u la dap 34 snem ka rta. Ka jingkhlad noh jong u na kane ka sla pyrthei ka long da kaba u la accident bad kawei ka Truck katba u dang leit phai shala shnong (Moobakhon) da la ka jong ka kali (Maruti Alto) ha ka surok NH 06 ha jan ka shnong Umtyra East Jaintia Hills District.
Ka jinglong jong u kum u nongrwai uba tbit.
Katkum ka jingtip jong ngi, U Lt. T.Bn. Arles Rymbai naduh ba u dang rit u long u khynnah uba bang bha ia ka rwai ka siaw bad ka put ka tem. U la kham bang eh ban rwai ia ki jingrwai niam naduh ba u dang rit ha ka jinghikai na la ing kaba u la ioh na la u kpa. U la ioh lad ruh ban shakri ia U Kynrad da ki sur jingrwai lyngba ki jingiaseng ba rit bad ba kham heh ruh naduh ka rta kaba u dang tang 10 snem duna ei ei. Hadien nangta u la nang ioh ban pynpaw pyrthei shuh shuh ia kane ka sap kyrpang ba U Blei U la ai ha u lyngba ka jingleit ban ialap iaka Ktien U Blei ha shibun ki bynta jong ka RI Khasi Jaintia bad wat shabar ruh ha ka jingialam jong ki shakri jong U Blei (Nongialap) kum u P. Pohtam (Kudeng thymmai, war jaintia) bad U T.Bn. I. Mynsong (Balang Khyndewsaw) haduh ba u la kynjoh sha ka rta ka jinglong samla.
Kane ka sap ba kyrpang ba U Blei U la ia ha u, ka la nangkhraw katba u la nangsan ha ka rta. U la ioh ban pyntbit shuh shuh ialade na ka rukom thaw jingrwai da ka jingialong paralok bad shah hikai ruh na uwei u nongthaw jingrwai ba pawnam U Smiling Mylliemngap na ka shnong Iewpamtiah jong ka thain Nongkrem. Lyngba ka jingialam jong une u rangbah u la la ioh ban pynmih ia ka thup jingrwai ba nyngkong jong u kaba la ai kyrteng “Jeremaiah”. Kane ka sap kaba u la don ka la paw pyrthei bha ynda haba u la long kum u Nongialam Choir ia ka Jingiaseng Samla Balang Presbyterian Lumshnong, kaba ula sdang ha ka snem 2011 haduh ka snem 2019 ha kaba U Blei ula ibit ban khot noh shalade hi ia une u shakri barit jong U ha ka 13 tarik June 2019. Hapdeng kitei ki snem lyngba ka jingialam lynti jong une u shakri ba kyrpang jong U Blei, ki Jingiaseng Samla kum ka Jingiasengsamla Balang Presbyterian Lumshnong ka la ioh ban pynmih ia ka thup jingrwai ba nyngkong jong ka kaba la ai kyrteng “Ri Kanan”. Bud sa ka Jingiaseng Samla Balang Presbyterian Moobakhon ha ka thup jingrwai ba la ai kyrteng “D’wai ia ka Ri Lum Khasi Jaintia” bad ka thup jingrwai ba khatduh ha shwa ba in khlad noh nangne na sla pyrthei ka dei ka ba la pynmih da ka Jingiaseng Samla Balang Presbyterian Lumshnong kaba la ai kyrteng, “Isreal ki iam kthang”. Ki lyric bad sur jingrwai ha baroh lai tylli kine ki thup jingrwai ki dei kiba la thaw da U Lt. T.Bn. Arles Rymbai bad la rwai da ki khun samla jong kine ki ar tylli ki Balang ryngkat bad U kum U nongrwai uba tbit. Ki sur jingrwai jong u ki la pynum ia shibun ki mynsiem jong ki paid riewngeit khristan bad wat ki bympat long khristan ruh.
Ka jinglong jingim jong u bad ka iing ka sem jong u
Halor kane ka bynta ngim da ioh jingtip shibun iaka jinglong jingim jong u ha ka ing ka sem ha ka por ka jinglong khynnah jong u namar ngi ioh ban iakynduh bad u, ynda ula Samla. Hynrei tang khyndiat eh ngi tip ba u Lt. T.Bn. Arles Rymbai u dei u samla naka long ing khristan jong ka Balang Presbyterian Moobakhon bad ka shnong Moobakhon West Jaintia Hills District. U dei u khun ba ar jong u Ma Piar Dhar bad ka kong Momlis Rymbai. Ki don 6 ngut shipara, saw ki shynrang bad ar ki khynthei. U la leit skul bad pule tang mar shiteng jong ka klass II. Kat kum ka jingiathuh jong u u ong, ba haba u leit sha skul pule kot um juh sngewkhlain ka met bad u ioh pang ruh bunsien. Hynrei, haba u leit pat ban bud bad ki shakri jong U Blei ban leit ialap iaka Gospel U Trai u sngew shait sngewkhlain, sngew phuh mut phuh mat bad ka mynsiem jong u ruh ka sngewkmen. Kumta u la ieh noh iaka jingpule jong u bad u la jied ban shakri ia U Blei lyngba ka jingleit ialap bad jingrwai. U long uba smat ba sting ban iarap kam ha ing ha sem bad udei ruh u bym ju kyntait ia kano kano ka kam ba u dei ban leh da ka jingtrei shitom bad minot ban ioh iaka jingjop. Hynrei kham bun hi ha ka jingim jong u um ju kham don bad ka ing ka sem namar ba u bun kam ban leit kylleng sawdong ka Ri khasi Jaintia bad shabar ruh ban ialap iaka Gospel U Jisu khrist.
Ka jingtip lypa jong u shaphang ka jingiap jong u
Kane ka bynta ka long kaba maian bad jylliew haduh katta katta ban ai iaka jubab kaba iabiang thik kat kum ka mat ba la kdew haneng. Hynrei ngin iathuh tang katto katne ki bynta ki ba kham kongsan kiba ngi la iohsngew lyngba une u shakri jong U Blei da ka jingisynei jong U Trai bad Nongpynim jong ngi. Hooid shisha ka long kaba phylla bad bym sngew lah ngeit ba uno uno ne kano kano kin tip lypa ia kaei kaban sa wan ne jia shisha ha ka jingim jong ki khamtam eh ha kaba iadei bad ka jingiap ne jingleit noh jong ki na sla jong kane ka pyrthei. Bad ym pat ju bna hi ruh ba don mano mano ba la tip lypa ia ka sngi ba kin iap. Kumta ruh ka long ia une u shakri barit jong U Blei. Hynrei bunsien u shait iathuh bad hikai, ba ngi dei ban pynkhreh iala ka jingim ban ialeh kat ba lah ban pynsngewbha ia ia U Nongthaw katba ngi dang im ha kane ka pyrthei namar ngim tip ha kano ka sngi ba ngi dei ban leit noh na kane ka pyrthei. Bad ialade u la long u samla uba iai pynkhreh kat kumba ka paw ha ka jingim jong u kaba man la ka sngi. Bun bun sien haba u thaw iala ki jingrwai jong u ruh ki iathuh i aka jingthrang jong u ban leit noh sha kata ka Ri ka jingsuk ia kaba U Trai ula pynkhreh ia kita kiba ieit bad shaniah ha U. Kum ka jingthrang jong u, u la iathuh lypa ba um sngewkwah shuh ban iohi ne ban dang don ha kane ka pyrthei lyngba ka snem 2020 & 2021 namar ba u ong ba kine ki snem kin sa long ki snem kiba phylla bad ki jait jingjia kiba triem bad ba phylla kin jia ha ka pyrthei ha kine ki snem bad ki snem ki ban sa wan. Kumta kum ka jingpynkhreh ula thaw iaka jingrwai kaba ula ai kyrteng “Sha ka Ri Kanan”. U la ong ruh ia ki nongrwai choir jong ka Balang Lumshnong ba lada jia ba un leit noh nangne na sla pyrthei ba U Trai un khot noh ia u shalade, kin sngewbha ban rwai ia kane ka jingrwai ha ka sngi iap jong u bad ban phong ruh da ki sopti kiba lieh. Kine ki jingmaian ba la wan pasiaw ha ka jingim jong u ka sakhi ba ki long kum ki dak kiba la pynlong ia une u shakri jong U Trai ban pynkhreh noh ban leit shala U Nongthaw ha kano kano ka por baka dei ia u ban leit bad khyndiat sngi shwa ka jingiap u sngew tynnad ban iai rwai iaka Jingrwai “Ah jinghun sha Byneng”. Long ka jingsuk bad ka jingkmen bah ia kita kiba la pynkhreh ban iashem bad la U Nongpynim Amen.
La pynmih ia kane ka jingthoh, lyngba ka jing iarap lem jong U bah Skillful Pohsnem lem bad U Tymmen Basan W Kyndoh.
Sir khublei shibun halor ki khubor. nga tbn IClean mynsong lym ka iing (L)tbn A Rymbai. da ka wei ka jing mut ngi pynbeit ban thoh kot sah kynmaw ne history ia u kum u shakri u Trai u ba don sap.Sir la u la don ha lum shnong u pyllong hi u kpa mynsiem ia nga um ju klet ban wan da ka met ne phun.Sir ngan lum jing tip hi ban thoh ia ka ta ka kot u.Sir ngan sa wan sha ophis jong phi.khublei.no.9366077471