Dr. B.R. Marpna
Haba U Blei Um pat pynlong ia kiei kiei ha kane ka pyrthei ne haba U Blei Um pat thaw ia ka pyrthei, kane ka pyrthei ka dap tang ka jingdum, khlem dur bad ka long kaba suda. U Blei U lah don naduh bymjukut ha bym pat seng nongrim ia kane ka pyrthei. U long na bymjukut sha bymjukut bad ka jingkut kam don haba ngi ngi iakren halor kane ka bynta. U Jisu U ong, ba U long U Alpha bad U Omega, kaba mut, Uba sdang bad Uba kut, Uba nyngkong bad Uba khatduh. Ainguh ia U Blei namar ka jingkhraw jong U bad ka jinglong Blei kaba maian bad ka bym don thylliej ba lah ban batai.
Wat la ka pyrthei ka long kaba khlem dur, suda bad ka jingdum hynrei U Blei U la thaw itynnad ia kiei kiei baroh ha ka jingstad jong U. Ka Baibl ka batai shai na ka Kitab Jenesis, kaba long ka kitab ka nyngkong eh bad ka thoh kumne “BAD KA PYRTHEI KA LA LONG BAKHLEM DUR BAD KABA SUDA, BAD KA JINGDUM KA LA LONG HALOR KA KHMAT KA JINGJYLLIEW..” (JENESIS 1:2). U Blei pat U la pynitynnad ia ka pyrthei wat la ka long ha kane ka rukom katkum kitei ki kyntien haneng. Haba ngi peit ia i bynta kiba bud pat, ka Baibl ka ong ba …U MYNSIEM U BLEI U DA KHIH HALOR KI UM (JENESIS 1:2).
Paralok baieid ha U Trai Jisu, kaei kaba nga kwah ban pashat jingmut ia ngi lang baroh ba khlem U Blei, ka jingim jong ngi kam myntoi ei ei ruh em. Ngi donkam eh ia U Blei ha ka jingim jong ngi bad kane ka pyrthei kam nym lah ban ai ka jingkyrmen ha ka jingim jong ngi. Ka pyrthei bad ki jingsngewbha jong ka, ki long tang shipor bad ngin dap tang ki jingbabe lada ngi ia muja bad kane ka pyrthei namar ba kam lah ban pynwandur ia ka jingim jong ngi. Ngi donkam ban phai sha U Blei hapdeng kane ka pyrthei kaba dap tang ka jingdum kat sha kaba ngi phai. Ka jingim jong ngi kaba khlem U Blei, kan wanrah ia ka jingsniewdur bad ka jingdum (kiba long ki bor jong u Soitan) kan lynshop ia ngi lada ngim phai sha Uta uba la ban pynshai ne iarap ia ngi.
Shuh shuh, ngi donkam ban iaisliang ia ka bor jong U Mynsiem Bakhuid namar dei Une uba la ban iarap ia ki jingtlot jong ngi. Teng wat ban duwai ruh, sngew thait ne lwait hynrei U Mynsiem jong U Trai Un iarap ia ngi. Ha ka jinglong briew, haba wan ki jingtlot ne ki jingeh, teng teng ngi sngew ba ngi la hiar shapoh bad bad ngim lah ban kiew hynrei ngi ainguh ia U Blei ba U Trai U long halor ki jingeh (problem/struggle). Ngi kynmaw ba kumno ba U Jisu U iaid halor ka duriaw. Kane ka pyni ba U Trai U long halor ki jingpang, jingkhuslai, jingjynjar bad kumta ter ter. Kumba la sot haneng shaphang U Mynsiem U Trai ba U da khih halor ki um, kumta ruh U Blei U long halor kiei kiei bad U lah ban khniot ia ki jingkahdum kiba wan ha ka jingim jong ngi. To ngin pynlut por ha ka jingduwai bad ka Ktien jong U Blei, kiba lah ban ringdur, pyndap bad ai jingshai wat la ki jingialeh ki ker sawdong bad ailad ba U Blei Un ialeh na ka bynta ka jingim jong ngi.
Na ka bynta ka burom U Trai, Amen.
Phi don ban ong eiei?