“U TIROT SING: U SYIEM UBA SHLUR BAN IALEH PYRSHAH IA KI BRITISH KHLEM DA PYNDEM WAIT”

Da U Samla M.P Mawkon, Nongjri
Pynursla C & RD Block, East Khasi Hills District.

U Tirot Sing u dei u Syiem jong ka Hima Nongkhlaw. U dei na ka jait ka kur Syiemlieh. U dei u Syiem napdeng ki Khasi uba don ia ka Nam bad ka Burom kaba kham ha khmat ban ia nujor bad kiwei kiwei. Wat ha ka Sorkar India ruh u la paw kum u wei na ki Nongialeh Pyrshah ia ki British. Kata baroh ka dei KA JINGSHLUR, KA JINGLEN LADE bad KA JINGAITI LUT ka jong U na ka bynta la ka Hima bad ia ka Ri Khasi bad ia la ka JAITBYNRIEW.

Kat kum ki jingthoh na ki Nonglum jingtip kiba la ia wad bniah shaphang u Tirot Sing, ki la iathuh ba u la sdang ban long kum U Syiem dei ha ka snem 1814 eiei haduh ba un da shah kem noh ha ka snem 1833. U dei u syiem Khasi uba kwah ban ym shah synshar ha ka Jinglong Mraw hynrei ban synshar ia la ka hima da ka jinglaitluid. Kumta u la len lade bad u la aiti lut ia la ka jingim ban kyntait mardor ia ka Jingtyrwa kiba bun kiba ka Sorkar Phareng ka la pah la phon ia U. Kaba lehse bun na ngi kum Ki KHUN KHASI KHARA ngin khyllem ha kine ki sngi ha kita ki shangkhawiah jong ka Spah ka Phew, ka nam ka burom bad kiwei kiwei. Namar bunsien ngin iohi ba kham ñiar eh kiba lah ban shan khamtam lada shah thong da Ki SBAI RUPA, Ka Jingiatip lem ruh kan iap lada wan kiba kum kine ki jingpah Shukor kiba shiteng por wat ban die ia la ka longrynieng bad ia la ka Ri bad ka Jaitbynriew ruh ban ioh im tang ia lade.

Hadien ba ka Sorkar Phareng (British) ka la don ia ka jingiatehkular ia kata ka Soskular Yandaboo (Treaty of Yandaboo) ha u snem 1826 bad ka Burma ki lah ioh bor ban buh ia la ka ktem ha ki bynta jong ka Thaiñ Shatei Lam mihngi jong ka India bad ki la ioh kurup ruh ia ka Assam ne ka Surma Valley, Manipur, Rakhine bad kiwei ki bynta. Dei ha kine ki snem ba ka sorkar Phareng (British) ki la buh ruh ia u Political Agent uba dei peit ha kato ka por uba ngi tip kyrteng kum U David Scott. Une u David Scot bad ka sorkar Phareng ki la kwah ban Pom lynti ban iaid na ri thor Assam (Surma Valley) ban pyniasoh sha ri thor Bangladesh ha Sylhet (Sylhet Valley). Ban leh ia kata u hap ban iaid na ki Lum Khasi. Kumta ka Sorkar Phareng hapoh ka jingialam u David Scott ki la pan jingbit na U Syiem tirot Sing ban shna surok ban iaid lyngba na Hima Nongkhlaw ter ter haduh Sylhet. U Tirot Sing u Syiem uba stad bad uba ieid ia la ka It ka Hima, Um shym la rai marwei ia kane ka ka kam. Hynrei u la lum la lang ia ka Dorbar ban ia tai ban ia kren ia katei ka jingpan jingbit ha la u khun u hajar. (Kane kaba ngi iohi ba ki Nongsynshar ha kine ki sngi ha Ri Lum Khasi jong ngi ki lah sdang ban klet bad ngi i ruh ba imat kim don shuh ruh haba shu peit da ki khmat briew ba kynja doh). Kane ka jinglong jong U Tirot Sing nga duwai ba kan ioh ban rung ha ka snam bad ka jingmut jingpyrkhat KI NONGSYNSHAR BAIEID jong ngi hangne ha LUM KHASI JAIÑTIA.

Hadien ka jingiatai kaba sani bad ba bniah bha kaba la neh haduh ar sngi kynthih ha ka Dorbar ha ka jingiadon lang ki khun ki hajar bad ki myntri bad ki Riew rangbah ka Hima (U Symbur, U Mon Bhut, U Lorshon Jarain, Kheiñ Kongor) ki la ia rai ban ai bad ban shah ia ka Sorkar Phareng ryngkat ka Jingiateh Kular bad u David Scott ha u snem 1826.
Hadien ba ka Dorbar ka la mynjur U Syiem Tirot sing ruh u la ai suk mynsiem. U David Scott ruh u la kular ban don ka jingiakhaïii bad ki Khasi ryngkat ruh u la kular ban ai ia ka Bordwar ha ka Hima Nongkhlaw ban peit.

Kumba ju long hi ki Phareng ne ki British hapoh India hadien ba ki la ju ioh nyngkong eh ia ka jingshaniah ki sa shet kylla hadien da ki buit poh ba sniew jong ki ban pynlong mraw bad ban ioh kurup baroh ha lade hi.
Ki Phareng ki la sdang ban trei ia kata ka surok bad haba ki la dep shna katto katne por kumba 18 bnai eiei ki la sdang ban leh ia ki kam buit poh barieh jong ki. La iathuh ba ki la wan rah ia ki shipai ban buh ktem ha ki bynta ka Hima Nongklaw bad ha Ri Khasi ha ka nam ka jingshna surok. Ym tang kata hynrei ki la ia suh buit ruh imat bad U syiem Balram singh uba dei u Syiem jong ka Hima Rani namar une u la ialeh pyrshah ia U Syiem Tirot Sing halor ka Bordwar. La iathuh ba U Syiem Tirot Sing u la hiar thma ha u nohprah 1828 sha Bordwar hynrei ki Shipai British ki la khang lynti ia ki. Ym tang katta hynrei U Syiem Tirot Sing u la ioh jingtip ruh na ki nongshong shnong ba la iathuh ha ki da ki khar Bengali kiba trei bad ka sorkar British ba ki la pyrkhat ruh ban shim khajna bad ban lehbeiñ tang mar ia dep ia ka surok. Kawei kaba U Syiem Tirot Sing u la kham dom eh ka dei ka jingleh donbor ban iuhroit ia ka mon uba bun balang bad wat ban thombor ia ki kynthei khynnah.
Dei hangne U syiem tirot Sing u la sngewthuh ia ka buit sianti sniew jong kine ki British ne ki Phareng ba ngi ia ong bad ia ka jingmut sniew une u Sahep David Scott. Ka Hima NONGKHLAW bad U Syiem Tirot Sing bad ki Riew rangbah ka hima ki la bitar bad khih puk. Wat la ki la ujor sha ki bor ba halor hynrei kine ki sngap man man bad kim sangeh satia ban leh donbor. Kumta puk ka la sdang ka Jingiakhun pyrshah ia ki Phareng ha ka Saw Tarik u Iaiong 1829. Bad dei ha kane ka sngi ba U Syiem Tirot Sing u la hiar thma bad la sdang kata ka thma Anglo Khasi kaba ki iathuh khana. Bad ka jinghiar thma kaba nyngkong eh ha NONGKHLAW ha kaba la iap bun ki shipai Phareng kynthup ia ki arngut kata u Sahep pyrton Bedingfield bad u Sahep pyrton Burlton. Dei ha kane ruh ka jingialeh ba U Sahep David Scott u la lait im da ka sait. Bad u la phet sha Sohra.
Ha kane ka Jingiakhun kaba sngewtynnad ban tip ka long ba wat ki Longkmie ne ki Kynthei ki ia shim bynta lang. Ngi kynmaw ia ka Phan Nonglait kaba la ia tip baroh ia ka jingshlur jong ka ban iarap lem ia ki Rangbah ha kane ka thma. To ai ban mih shibun ki Phan Nonglait na ki Samla kynthei bad na ki Longkmie kiba dap rynieng ha ka ri Khasi jong ngi kiba sdang ha la ki Ïing ki sem ban shakri la ka Ri bad ka Jaitbynriew.

Ki Phareng ki la nang pynkhlaiñ ia la ki shipai da kaba wanrah shuh shuh ia ki pyrton shipai bad ki suloi ki tup ki man ha ki bynta ka kamrup bad na Sylhet. La iathuh ba la bun ki Khasi kiba la kyllon ban iap martyr na bynta la ka Ri Khasi ban ialeh bad kine ki Phareng wat hapdeng ki tiar ba ki don ki long tang ki sum, ki waitlam bad ki ryntieh ki khnam katba ki phareng da ki suloi kiba bit ba biang. Hynrei ka jingshlur bad jinglen lade da ka jingieid ia la ka RI kim phai dien ne kyrtiang dien.
U Tirot Sing u la tip bad sngewthuh ban ialeh pyrshah bad kine kiba kham donbor, u hap ban pyndonkam ban ialeh ruh da ka jingstad bad jingshemphang ha ka jingialeh thma. Kumta u la sdang da ka jinghiarthma da kata ka buit ialeh thma u Khasi (Guerilla warfare).
Ka jingiakhun ka la pyndum buit bad pynshaiong ngaiñ ia ki Phareng ha kato ka por namar ka jingstad ialeh thma kine ki Khasi. Ki nangmut ba ki Khasi ki long kiba bieit kumba ki long shisur ha ka jinglong shida jong ki. Hynrei kim tip ba KI KHASI ki don ia ka iktiar kaba kyrpang da ka jingstad ba la suit la shor da U Blei najrong.
U Tirot Sing u la phah ia la ki briew ban ia shna ia ki tiar thma khasi ha ka krem kaba ki rieh ban ialeh ia kine ki Phareng. U la phah ia shibun ki Nongsyntiat ban peit pyrman ia ka iaid ka ieng ki phareng ha ki ktem jong ki bad ba kin wan rah ia ki jingtip ruh sha u. Bad nangta napoh ka krem ba u rieh, u la pynkhreh ia ka jingialeh thma da kaba u hiar thma ha ka por mynmiet ha ki ktem shipai jong ki Phareng.
Hadien ba U David Scot u la khlad noh ha u snem 1831, hynrei ka jingiakhun ka dang iaid hapoh ka jingialam U Sahep Lord Robertson uba la shimti ha ka jaka jong U. Une u sahep u don jingmut ban pynkut noh ia kane ka jingiakynad kaba la neh bad ba la suhsat.
Wat la ki shipai jong U Syiem Tirot Sing ki la nang duna hynrei u dang lah ban iai pyntriem ia ki shipai phareng kiba don ha kine ki Lum Khasi. La iathuh ba U Bor Manik Syiem, U Syiem Mylliem ruh u la ia don bynta ban ia khun ryngkat bad U Titot Sing ia kine ki Sorkar Phareng kiba leh donbor.
Ka jingiakhun ka la neh haduh Saw snem kynthih hapdeng jong U Syiem tirot Sing bad kine ki Phareng. Namar ka Jingkhlaiñ bor jong ki, u Tirot Sing um lah shuh ban ia khun pyrshah ia ki hynrei u la phet rieh ha ki jaka rieh ha ki bynta bapher bapher.

Ka Sorkar Phareng (British) ki la tyrwa da kiba bun kiei kiei ia U Tirot Sing bad ia ki Myntri jong u hynrei kine kim treh. Ha kaba khatduh lyngba ka jingtyrwa ban ia kren iasuk ki la ioh kem noh ia U Tirot Singha ka 9 tarik U kyllalyngkot 1833 hadien ba u la mih na la ka jaka rieh. La rai pynryngkang par ia u sha Tennaserim. Hynrei la pynkylla ia ka rai bad la phah noh ia u sha Dhaka.

U Tirot Sing u la iap kum U Syiem ha Dhaka hapoh Ïing Byndi ha ka 17 tarik U Naitung 1835.

Ngi la ioh ban tip ia ka Sngi iap kaba tikna jong Une u riewkhraw jong ka ri Khasi bad ka Jaitbynriew jong ngi da ka jingwad bniah jong Uwei na ki Nonghikai Khasi uba la iohnam bha hapdeng jong ngi ki Khasi kata i Professor David R. Syiemlieh. Bad i Professor i la ong ba dang donkam ban wad bniah bha ia ki jingtip ha kaba iadei bad U Syiem Tirot Sing namar bun ki Jingthoh ki dei kiba la thoh da ki phareng ha ka jibgkren jing i ha Lady Keane College ha ka prokram rakhe ia ka lyngkhuh sbem jingiap jobg U Tirot Sing ha ka snem 2020.

Ban ai burom ia une u Riewkhraw bad u Riewshlur, Ka Sorkar Jylla Meghalaya ka ju ai shuti ha baroh ka jylla ban rakhe ia ka Sngi iap jong U Tirot Sing ha ka 17 tarik u Naitung man la ka snem. Kumjuh ka la don ka Award kaba heh bha kaba ki ju ai ha ka Kyrteng U Tirot Sing kaba ngi ju tip kum Ka Tirot Sing Awards for Arts and Literature.
La ju tip baroh ia ka Kyrteng jong U kum U Nongialeh laitluid ban ieng ialeh pyrshah ia ka jingsynshar Nongwei ha la ka Ri.
Ka Sorkar India ka la ithuh bad ka la ai burom ia ka kyrteng jong U TIROT SING kum uwei napdeng ki Nongialeh Laitluid uba khraw na ka kti ki phareng bad ka la pyllait paitbah ia ka Postage Stamp ha ka dur bad ka kyrteng jong u ha ka snem 1988.
U Jairamdas Doulataram, u Governor barim jong ka Assam ha ka snem 1952-1956 ha ka por ba buh ia u Mawnongrim shuwa ban tei ia U Motsahkynmaw jong U Syiem Tirot Sing, Nangta shuwa ban plie ia U Motsahkynmaw jong U Syiem Tirot Sing bad shuwa ban un iehnoh kum U Governor jong ka Assam, u don ban ong kumne ia U Syiem Tirot Sing:

1. “Tirot Sing’ name should be ever remembered by the coming generations of the Khasis and Jaintias as that of a brave man who stood for principles and good sacrifice his all for the sake of those principles. This is a great virtue which should be a great ideal for the young Khasis and Jaintias of today”.
2. “The youths of the Khasis and jaintia Hill should reflect in their Life the Priceless qualities of courage and sacrifice which Tirot Sing’ s career upholds before them”.
   (Ka Jingkren Plie ia u Mawnongrim jong u Motsahkynmaw jong U Tirot Sing ha Mairang ha ka 15 tarik Nohprah, 1952).
3. “Tirot Sing has bequaeathed to the Khasis and Jaintias the tradition of aboard outlook and of brave deeds. I hope the young men and women of the Khasi jaintia Hills will live up to the great tradition U Tirot Sing has left for future generations”.
   (Ka Jingkren Plie ia u Motsahkynmaw jong U Tirot Sing ha Mairang ha ka 29 tarik U Lber, 1954).
4. “The Community which could produce a man like Tirot Sing was sure to rise in the Country”.
   (Ka Jingkren Ai Khublei Khatduh ia ki Khasi ha ka 12 tarik U Jymmang, 1956).

U Lord Curzon u Viceroy jong ka India ha ka jingkren burom ia u Syiem Kine Sing (U Pyrsa jong U Tirot Sing Syiem) ha u snem 1903 u la ong kumne, “Not withoutcourageous fighting and there is much to the credit of your nation in the regards of the long struggle which however lamentably commenced, exhibited the bravery and endurance of U Tirot Sing”.

Kawei ka kyntien kaba ngi ju iohsngew bha ba la ong U Tirot Sing ka long, “Kane ka dei ka RI jong nga, Ka RI umsnam U Kñi U Kpa”

U Tirot Sing um kwah ban long U Syiem ban synshar ia la Ka Hima hapoh ka Jinglong mraw. Kumta haba la bunsien la tyrwa ban long kum U Syiem hapoh ka jingpeit ka Sorkar Phareng hynrei u la kyntait ia kita baroh da kaba u ong kumne,

“Kham lah kaba iap kum U Paitkar ban ia kaba im kum U Syiem mraw”.

Kumjuh shuwa ba un iap noh u la ong ia kine ki kyntien ha uwei na ki koidi uba na Lum Jaiñtia,

“Ynda phi la leit phai sha la ka Ri, iathuh ia ki Para Ri jong nga ba U Tirot Sing u iap kum U Syiem”.

Uwei na ki Rangbah Shipai Phareng uba ialeh bad u Tirot Sing u la ong kumne, “Lada baroh ki Syiem Khasi ki la iasoh lang ha kane ka jingialeh kaba la long kylleng ka ri, kaba la sdang na ka jingpyniap ha Nongkhlaw, kan jin da la long kaba eh ia ka ri Lum Khasi”.

Ha kane ka lyngkhuh dap snem jong ka jingiap kaba 186 jong U Syiem Tirot Sing uba long uwei na Ki Syiem Laitluid uba khatduh jong ki Khasi uba la pynsah nam ia lade ha kane ka snem 2021, nga don ban khot ban wer ia ngi baroh ki Parar Ri ban phai dien bad kyrtiang dien ia kaei kaba Une U RiewKhraw Uba la ialeh na ka bynta la ka Ri Khasi bad la ka Jaitbynriew uba da ka jingstad jingshemphang bad da ka jingshisur u la len lade ban ialeh da ka jingshlur wat ban pha ia la ka Jingim na ka bynta ka Ri kaba U ieid eh.

1. U Tirot Sing u la kyntait ia ki jingtyrwa jong ka Sorkar Phareng: To Ngi ruh ngin ym iapeiñ ia la ka Ri bad ia la ka Jaitbynriew da ka thong ki Sbai Rupa hynrei to ngin kyntait mardor ia ki mangkarong ka spah shipor. To ngin ieng ha ka nongrim ka jingkhuid ban shakri ia la ka Ri baieid eh jong ngi ym ban shah pynthame noh.
2. U Tirot Sing kum U Syiem u wad ia ka Jingmynjur bad ia ka jingmut ki khun ki hajar jong U. To Ngi ruh ngin long kiba stad ban shim ia ka sien jam da kaba wad ia ki jingmut ban iatei ia la ka ri bad ka jaitbynriew. Ym kiba sngew hanga mei ne kiba sarong noh ha la ka jingsngew marwei.
3. U Tirot Sing u wad ia kiwei ki para syiem ban ialeh ia ki Phareng. Ka Jingiatylli ka dei kaba donkam tam kum ka jaitbynriew kaba rit paid. Ioh ngin shah tyllep noh ha kiwei pat ki jaitbynriew. Ngin burom ia kiwei ki jaitbynriew hynrei ngin sngewthuh ba ngin ym die duh noh ia la ka khyndew ka shyiap kaba dei hok ka jong ngi. Namar ngi don tang kane hi ka ri Khasi kaba U Blei u la ai kyrpang ia ngi hi. Ngim don jaka shuh ha kiwei pat lada ngin duh noh ia la ka khyndew ka shyiap. Kumba ong kato ka Jingrwai kaba ong, “IEID IA LA KA JONG, BUROM IA KA JONG KIWEI.
4. To ngin ieng ruh ha ka nongrim jong ka Hok bad ka jingshisha khnang ba ngin lah ban ialeh pyrshah ia ki bor ba laiphew jait kiba kwah pyngngop ia ngi da ka jingpyrkhat myntoi shimet khnang ba ka lawei ki khun ki kti bad ki pyrsa jong ngi kan long kaba shngaiñ ha ki pateng ki ban wan.
5. To ngin klet noh ka ia jingiakynnoh bad ia ka Jingiasin ia rngop ia ki longshuwa bad ia ki parari kiba don ban leh eiei na ka bynta la ka ri. To ngin klet noh ia ka jingkdew kti ne ban shu kynnoh pyrshah ia kiwei. Hynrei to ngin sdang ban leh eiei na lade hi nyngkong shuwa ban kynnoh ne kdew kti ia kiwei. Sdang na lade, sdang na la Ïing na la sem bad ha ka imlang sahlang. Ka Sin ka Rngop bad ka jingiabeiñ, ia kynthoh kam poi haei haei hynrei ka pynsahdien noh ia ngi ha kiba bun ki jingrem kum ka Jaitbynriew.
6. To ngin pynmih ia ki Riewkhraw ha ka JAITBYNRIEW ki ban long ki Nongialeh na ka bynta la KA RI KHASI bad ia la ka JAITBYNRIEW ha ki jylli bapher bapher lyngba ka Jingstad, jingtrei shitom, jinglen lade bad aiti lut met bad mynsiem.

Ha kane ka lyngkhuh dap snem ba mynta u snem 2021, bun ki lehburom ia U Syiem Tirot Sing naduh ka Hima Nongkhlaw, ki Sengbhalang bapher bapher bad ka sorkar ruh. Ngi iohi ba la thaw ia ka motdur (Statue) kaba heh bha bad ba itynnad jong U SYIEM TIROT SING kaba la buh ha Mairang. Hynrei wat ai kin sah tang hi KI MAWDUR STATUE hynrei to ai ba kine ki jinglong jong U TIROT SING kin ioh jaka ha ngi ki Parari baroh naduh ki barit haduh kiba san. Kam pher phin dei U Khynnah pule, kam pher phin dei U Sengbhalang, kam pher phin dei Ki Nongialam Balang, kam pher phin dei u Nongtrei Kam Sorkar bad kam pher phin dei U Nongthaw Aiñ kata ki Nongmihkhmat jong ngi. Baroh ngi don la ka bynta BAN SHAKRI ia la ka RI bad ka JAITBYNRIEW.

“BAN IA KABA LONG SYIEM MRAW HA LA KA RI, KA BHA BA NGAN IAP KUM U SYIEM HAPOH BYNDI”

“KA JAITBYNRIEW KABA LAH BAN PYNMIH IA U BRIEW UBA KUM U TIROT SING KAN LONG DA SHISHA KA BAN PAW HA KHMAT KA RI HI BAROH KAWEI”.