Nongpoh: U Bah Everjoy Nongpluh, President ka Ri-Bhoi Student Union (RBSU) sengkmie, u la kynnoh ba u Syiem ka Raid Marwet, ka Hima Mylliem bad ka District Council ruh kumjuh, ki dei ka lynti bah bad kiba la kylla long kum kita ki ‘Dalal’, halor ka jingiohlad ki briew nabar ban ioh jaka ha ki shnong kiba dang hap hapoh ka Raid Marwet ha Ri Bhoi.
Haba pyntip sha ki lad pathaikhubor, u Bah Everjoy Nongpluh, u la ong ba ka seng ka la ioh ia ka jingtip kaba thikna halor ka jingdonkti naduh u Syiem ka Raid Marwet, ka Hima Mylliem bad District Council, halor ki kam die jaka tuh ha katei ka thain bad ka sakhi kaba shai eh, ka dei hadien ba ki la lap ba ka la don kawei ka jaka jong ka Raid bad kaba la dei hok ban ioh da ka Seng Samla Shnong Umtyrnga, hynrei ia katei ka jaka la dep ban die noh sha kiwei pat ki Jaidbynriew bym dei Khasi.
Utei u nongialam ka RBSU, u la ong ba katei ka jingleh u Syiem ka Raid Marwet bad Hima Mylliem, ka la pynpaw shai ba kim don jingkitkhlieh ban iada ia ka khyndew ka shyiap, hynrei ki la thmu pynban ban lilam lut sha ki briew nabar, ia ki jaka puta kiba don ha katei ka thain, kaba dei dei ka thain khappud bad ka jan ia ka Sorbah Guwahati. Shuh shuh, u la kynnoh ruh ba u Syiem ka Raid Marwet, u kylla long kum u Agent ki bar jylla, katba ka Hima Mylliem pat ka dei kaba pynshlur ia u Syiem bad iarap ha ha kan pyn rejister ia ki dulir khyndew bad ban leit rejister sha ophis DC.
Halor katei ka nongrim, ka RBSU ka pyrshah jur halor katei kam leh buit tuh u Syiem ka Raid Marwet bad Hima Mylliem, namar kum ka seng hi ka sngew ba katei ka jingleh jong ki, ka pynpaw ba pynpaw ba kim don jingkitkhlieh ei ei ruh em halor ka khyndew ka Shyiap bad kaba kylla long ka dawbah halor ka jingshah klun lut ki jaka ka Meghalaya.
Namarkata, halor katei ka nongrim, ka RBSU ka kyntu ia ka District Council, ba kadei ban shimkhia bad ban tohkit bha halor katei ka jingiohlad ki briew nabar ban wan thied ia kiba bun ki jaka ha katei ka thain, u la bynrap.
Phi don ban ong eiei?