U Syiem Khyrim um don bor ia ka saw ka sian ka Mawpdang: Joe

Shillong, 1 Nailar:
U President ka FKJGP u Bah Joe Mar wein u la ong ba ka long sngew lyngngoh ban ioh ia ka jubab na u Syiem ka Hima Khyrim ba um don bor ban tuklar ia ka kam halor ka jingthmu die ka shnong Mawpdang ia ka jaka paidbah sha ka sorkar.
Haba kren hynne ha ka rally kaba long ha Malki ban pyrshah ia ka jing thmu shim jaka ka sorkar ha ka thain Maw pdang, u Bah Joe u la ong, “ngi la iakynduh ia u Syiem ka Hima Khyrim hynrei lyngngoh ban ioh sngew ia ka jubab ba um don bor ei ei kum u Syiem”,.
Ha ka jingshisha ka dei ha kum kane ka por ba kum u Syiem u kmie un mih shakhmat ban pynbeit ia ka saw ka sian kaba la mih ha katei ka shnong hynrei um long kumta kumba long kiwei kiwei ki syiem, la ong u Joe Marwein.
U la ong ba ha kiwei ki Hima, ki Syiem ki don bor ban pynbeit haba mih kum kane ka jingleh na ka liang ka shnong hynrei kam long kumta ha kaba iadei bad ka shnong Mawpdang.
“Kane ka long kaba sngewsih ba u Syiem um lah ban leh ei ei hapoh ka Hima la jong”, la ong u president ka FKJGP.
Ha kajuh ka por, u la ong ba ka jingthmu ka sorkar ban thombor ban knieh ia ki jaka jong ki nongrep ban shna ia kata ka New Shillong ka dei ban sangeh noh shi syndon. U la ong ba katkum ka jingthoh ba la ioh, ka sorkar ka la pyni ba ha katei ka New Shillong yn tei ia kita ki Shoping Mall, ki Night Club, bad kiwei ki kam kiban myntoi ia ki bar jylla bad ki nongwei.
“Ka sorkar ka dei ban sangeh ban shim jaka bad lada kam sngap ngin pynlong da ki jingiakhih ba tyngeh”, la maham u president ka FKJGP.
Hadien kane, u Bah Wallambok Kharsati uba dei u nongialam ka KSU u la ong ba ka long kaba lyngngoh shisha balei u Syiem ka Hima Khyrim u sngap jar jar halor kane ka kam.
U la ong ba lada ka shnong Mawpdang ka die ne kam pat dei ia katei ka jaka, ki paidbah ki dei ban pyndonkam beit wat kynran dien.
U la pynrem jur ia ka jingkhang lad ban iaid proseshon sha Secretariat bad ong, “dei ki nongtrei sorkar kut bnai kiba khang lad ba ngin iaid sha Secretariat”. U la ong ba ka sorkar ka die jaka sha ki IAS ophisar tang T. 1 shi square phut, katba ia ki paidbah pat ka beh shnong syndon khlem jingmap kiba dei hok ka jaka jongki.
U la pynban ruh ia ka rai ba ka rally kan iaid nangne shakhmat kynthup ba ka sorkar ka dei ban sangeh ban shim jaka jong ki paidbah, ban sangeh ban surbe, ka KHADC bad u Syiem Khyrim ki dei ban shim ia ka jingkitkhlieh ban pynneh ia ka khynneh ka shyiap bad lada kim lah yn khang kdam noh ia ki, bad ban weng noh ia ka rai ban ai jaka ia ki ophisar IAS.