U Sordar Warmawsaw u shah dawa pisa shwa ban shah rahbor, sdang lapksai ki pulit

Nongpoh: Haba pyrshang ban buddien halor ka jingshah rahbor u Bah Manason Doloi, Sordar ka shnong Warmawsaw, kaba la jia mynha ka miet Sngi Saitjain, la ioh jingtip ba utei u Sordar, u la shah dawa pisa bad haba um lah ban ai ia kata ka pisa kaba kitei ki riew kieng atiar ki la dawa, ki sa rahbor syndon ia u.

Haba pyrshang ban wad jingtip na ki Pulit, la ioh jingtip ba utei u Bah Manason Doloi, u don ha ki bynta ka Assam bad kiba dei ki jaka khappud ka Meghalaya-Assam, hynrei kat haduh mynta kim lap ia ka jaka kaba thikna, na ka bynta ban leit pyllait ia utei u Sordar ka shnong Warmawsaw.

Lah ruh ban kdew hangne, ba utei u Sordar Warmawsaw u la shah rahbor na ka jaka kaba u sah, hadien ba ki la don kumba 6 ne 7 ngut ki riew kieng atiar, ki la leit sha ka iing jong u bad shwa ban rahbor ia utei u Sordar ki la teh ia ka Lok jong u.