U soitan u la trei borbah ha kine ki sngi, ong u Pastor

Shillong, 23 Iaiong:
Ka jingsaphriang ki khubor ba kiba bun ki briew khamtam ki samla ki la ngop ha kata ka jingmane ia u soitan, ka la pynkyndit ia kiba bun khamtam kumba la jia ha Garo Hills.
Na ka liang u Rupang, haba iakren bad u Pastor ka Synod u Pastor ER Khar krang mynta ka sngi, u la kubur ba ha kine ki

sngi ka bor jong u soitan ka la trei borbah bha ha ki briew.
“U soitan u la trei borbah bha ha ki briew ha kine ki sngi”, la ong u Pastor Kharkhrang haba kylli kaei ka jingsngew halor ka jingmih khubor ba ki don ki briew ba mane ia u soitan kumba la jia sha Garo Hills.
Watla na ka liang ka Synod ne ki pastor kim pat ioh kano kano ka jingtip ne ka jingwan iathuh shaphang kane, hynrei la shu iohi kumba ka paw ha ki lad khubor, u la ong.
“Haduh kine ki sngi, ngam pat ioh jingtip ba kin wan ban iathuh ha kane ka ri Khasi Jaintia ia kane ka jingjia”, la ong u Pastor.
Katkum ka jingong u Pastor, kane ka jingmane ia u soitan ka long pyrshah ia ka jingngeit bad ka jinghikai ka Balang. “Ngi pyrshah ia kane ka jinghikai ban ialam bakla ia ki briew”, u la ong bad bynrap, ka long ruh pyrshah katkum ka jinghikai ka kotbah Bible.
Halor ka jingshah pyngngop jong kiba bun ki samla, ban mane ksuid ban iabud ia ka Balang u soitan, kiba bun ki kynhun Balang jong ka thain Garo Hills ki la trei borbah ban pynduh ia kane ka jingshah hikai bakla khamtam ki samla kiba don hapdeng ka rta 13 haduh 18 snem.
Ki kynhun balang ha katei ka thain, ki la thaw ruh ia ka komiti ba kyrpang ban peitngor ia ki khun samla ban hikai ban pynlait na kane ka jingshah hikai bakla. Na ka liang ki pulit ruh ki la pynlong ia ka jingpeitngor bha.
Bun ki kmie ki kpa ki la syier ia ki khun namar ba kiba mane, ki hap ban leit sha jingtep ha ka por shiteng miet bad ban phong da ki jain iong bad ban shu sin ia la kyrteng. Kiba mane ia kane, ki la thaw ruh ia ka website, kaba kyrteng ka Achik Underground Cult lyngba ka facebook ha kaba la khring ia ki samla ban pyniasoh sha kane ka kynhun mane. Ka don ruh kawei ka kynhun ka dark star outlawz bad ka ETR khnang ban khring ia ki briew ban wan ban mane ksuid.