U Sohniamtra na Ri Khasi, uba shngiam tam ha ka Pyrthei

Babu Kular Khongjirem

Ia u soh Niamtra na ri Khasi-Jaintia la ju tip kum u’ Khasi Mandarin’ ha ki por mynshwa, ha kito ki por ba u Phareng u dang synshar iangi hangne ha ri jongngi.U dei u soh Niamtra uba shngiam tam ha ka pyrthei(best quality oranges in the whole world).Une u jait soh Niamtra u mih bad kynrei bha ha shi lynter ki thain Ri War kiba don mar khap(bordering) bad ka ri Bangladesh.Na kata ka daw,ia ka thain Ri War la ju tip kum ka ‘kper Eden’ jong ka ri Khasi-Jaintia namar ka deng da ki kpieng soh niamtra ba stem kmur kmur ha ka por tlang.

Ka sorkar Phareng ha kito ki por ka la shna khnang ia ka jaka sahngeh erplien(aeroplane) ha shnong Shella tang na kawei ka daw bah bad kata kalong tang ban ioh pynkit ia u soh Niamtra ‘Khasi Mandarin’ na ri Khasi sha ri Bilat namar ba u dei u kynja mar uba lah ban pyut kloi(perishable goods).Na kata ka daw,ka shnong Shella ka dei ka shnong kaba nyngkong eh ha ri Khasi ka ba la don ka jaka sahngeh eroplien(1st airport) hynrei la pynjot noh ia ka da u jumai bah ka ri Khasi ha u snem 1897.Kane ka airport kam don shuh mynta bad hadien utei u jumai bah, ym don shuh kiba kwah ban maramot ia ka haduh mynta mynne.

Ha ki 40/50 snem tam mynshwa, ka jingdon jong u soh niamtra ha ri jongngi ka la long kaba itynnat shisha.Man la ki shnong ki dap da ki dieng soh bad man la ki bri ne kper soh la thaba bad stem hi lain da u soh niamtra suda.Ha ka por tlang,ki briew man la ki shnong jong ka thain ri War ki ia bun kam ban kheit bad kit soh niamtra nalor bym pat don surok satia ha kito ki por.Ka shim por ym duna ia ka 3/4 kynta ia ki briew ban kit bad pynpoi ia u soh niamtra na bri ne kper soh sha ki jaka ba lait surok.Ka jingmad,ka jingbang bad jingshngiam jongu ruh kaba kham pher bad shirukom shisha haba ia nujor bad kiwei kiwei ki soh niamtra jong kiwei pat ki jaka.Hynrei,kaba phylla pat kalong ba ,mynta ka jingbang bad jingmad u sohniamtra ka la kylla noh.Ka jingmad ka la pher bad bun ki diengsoh niamtra ki iap khlam ne iap tram lut.Ki soh kiba u dieng u pynmih ruh kim shngiam shuh namar ki shu ih da kaba pang da kaba khrew sah .Nalorkata,ki jaka ne shnong ba ju pynmih soh niamtra ha kane ka juk kim lah shuh ban pynmih wat tang shi powa na ka jingpynmih soh ha ki por mynshwa. Lada ka sorkar ka kwah ne mon shisha ban pynkhie im biang ia ka rep ka riang,ka thung ka tep bad ban wanrah biang ia ka burom ka ijot jong u ‘Khasi Mandarin’ ka dei ban phaikhmat kyrpang biang ruh ia ka jingthung bad jingrep soh niamtra.

Ka Mission soh Niamtra ka dei ban treikam noh wut wut ym tang ban iarap ban pynheh bad pynroi ia ki nongrep soh niamtra hynrei ban phah ruh ia ki saiantist ne research scholars ban wad ia ki daw balei ba ki diengsoh kim lah shuh ban im slem(long survival) ne balei kim shngiam shuh kum ha ki por mynshwa.Lada ka sorkar ka don shisha ka mon,ym don jingeh satia ban pynlong biang ia ka thain ri War sa shisien kum ka ‘kper Eden’ ka Meghalaya.Ngin sa paw biang kum ka state kaba pawnam tam ha ka jingpynmih soh niamtra ym tang ha ri India hynrei ha ka pyrthei hi baroh kawei kumba ngi la pynpaw nam ha ki por u Phareng ha kito ki por ba la dep.