U SOH POMKRANET (POMEGRANATE): KI JINGMYNTOI JONGKA JINGKOIT JINGKHIAH BA NGI IOH NA U NE U SOH

Kong Linda Kongwang

U soh pomegranate u dei uwei naki jait soh uba ai jingmyntoi shibun iangi bad la ju tip ruh ba udei uba ai jingkoit jingkhiah ia ka met ha baroh ki liang. Ia une u soh la khot ruh ia u u soh ba kyntang ba khuid uba ju pyndonkam bha haki jinglehniam. Une u jait soh u don ha u iaka antioxidants, antivirals bad anti-tumor properties bad la ju ong ruh ba udei u tynrai ba biangtam jongki Vitamin, khamtam ka Vitamin A, vitamin C bad Vitamin E bad ruh ka folic acid. Udei u jait soh uba don kyrhai ka fiber,potassium , magnesium bad ki folate. Udei u jait soh uba ai jingiada shibun naka jingpang bampong, uba ai jingmyntoi naka bynta u klongsnam, pynduna halor ka pangmat, pynduna iaka jingkiew ka blood pressure bad udei u jait soh ba biangtam ban kynthuplang kum u jingbam ha ka por kilan met.

Ban bam ia une u soh manla kasngi, kalah ban pynduna ka jingma ban ngat hakiba bunjait ki jingshitom kiba shyrkhei. Ka um jongu soh pomegranate kadei kaba iarap ban tei iaka bormet, ka ai jingiarap halor ka jingtylliat bha ki jingbam bad ialeh pyrshah iaki khniang jingpang (bacteria) kiba don haka met.

KINE HARUM KILONG KI JINGMYNTOI BANGI IOH NA U SOH POMEGRANATE.

1. KA JINGKOIT JINGKHIAH JONGU KLONGSNAM:– Ka jingshahktah jong u klongsnam ka ju jia borabor lada jur ka jinglum thup ka cholesterol haki thiedsnam bad kane kalah ban ialam bunjait ki jingshitom ha u klongsnam. Ka um jongu soh pomegranate kadei kaba biang tam ban tehlakam iakane ka jingpang klongsnam, namar haka kidon kyrhai ka antioxidants kiba lah ban ialeh pyrshah naka jinglum thup ka cholesterol haki thiedsnam bad kane ka umsoh ka aibor ruh iaki dkhotmet ba shapoh ka met ban lah tylliat bha iaki jingbam.
2. KA JINGIADA NAKA JINGTHANG KA SNGI:—Ka jingshah thang haka sngi ka wanrah shibun ki jingpang jingshitom haka sniehdoh bad ka jingshah palat haka sngi ka buh jingma ban ngat haka jingpang bampong haka sniehdoh (skin cancer). U pomegranate u don kyrhai ka antioxidants ha u bad nakata ka daw ban bam ia une u soh ka ai jingiada iaka met jongngi naka jingshahthang haki kjat sngi kaba dei ka daw jongka jingring sti ka sniehdoh.
3. KA JINGIADA NAKA JINGPANG BAMPONG:— Ka jingpang bampong kadei ka jait jingpang kaba kynrei bha hakine ki por bad shibun kila ngat nakane ka jingpang, kalong kana eh bad ka bymlah shuh ban sumar. Hynrei dakaba bam iaki soh pomegranate kalah ban iarap pynduna ban ngat na kane ka jingpang. Ki shyieng jong kine ki soh ki riewspah ban dih iaka antioxidants kibalah ban iakhun pyrshah iaki tumor kiba pynlong iaka jingpang bampong. Ka jingdon ka punicic acid (omega-5 polly saturated fatty acids) hakine ki soh kilah ban ialeh pyrshah iaki breast cancer cells bad pyniap ruh iaki. Ha kajuh ka por une u soh ulah ruh ban pynduna halor ka jingngat haka jingpang prostate Cancer ha ki shynrang. Ka jingbam iakine ki soh kalah ban khanglad iaka jingkharoi ki Cancer cells.
4. KA JINGIADA NAKA JINGKIEW KA HIGH BLOOD PRESSURE:— Ka high blood pressure kadei kawei naki jait jingshitom kaba buh jingma iaka jingim jongu briew bad kaba lah wat ban shim iaka jingim u briew hangto hangto hi. Ban tehlakam iakane ka jingshitom, phi donkam ban kynthup ia une u soh napdeng ki jingbam kiba phi ju bam ban pynduna ka jingkiew ka blood pressure bad ka balah ban ai iaka jingkoit jingkhiah ba pura jongu klongsnam. Ka jinglah ban dih iaka um jong une u soh ka iarap ymtang ban pynbit pynbiang iaka blood pressure, hynrei u lah ban iakhun pyrshah ia bunjait ki jingpang.
5. KA JINGDON KYRHAI KI NUTRIENTS BAD KI JINGMYNTOI:— Ia u soh pomegranate la ju tip ba udei u jait soh uba don kyrhai ki nutrients bad ki jingmyntoi lah ban sakhi tang lada ngi lah ban bam ia u ne u soh manla kasngi. U rewspah haka jingdon ka fiber, folate, RDA potassium, magnesium, ka vitamin C bad K bad ka minerals. Kine ki nutrients kilah ban ialeh pyrshah na kiba bunjait ki jingpang bampong, iada iau klongsnam, pynkhuid iaki thiedsnam bad kiwei kiwei. Da kaba dih 1 klat ka um jong u soh pomegranate kalah ban ai jingmyntoi shibun iaka jingkoit jingkhiah jongu briew.
6. KYNTIEW HALOR KA JINGKHLAIN KA BOR KYNMAW:— Ka jingtlot bad duh noh ka bor kynmaw ka wanrah jingeh shibun haka jingim ba manla kasngi. Kane ka jingshitom ka pynlong ia u briew wat ban klet ia kiei kiei kiba dang shu jia shen bad kane ka jait jingshitom ka kham ktah ia kiba la heh ka rta. Shuwa ba kane kan jia, kan bha baphin shimkhia ialaka jong ka jingkoit jingkhiah da kaba dih 1 klat ka umsoh pomegranate manla kasngi. Kawei naki jingwadbniah ka pyni ba kito ki briew kiba don iakane ka jingshitom ki donkam bha ban dih ia kane ka jait umsoh. Hadien katto katne por phin sakhi dalade ia shibun ki jingkylla ha kaba iadei bad ka bor kynmaw, la jingkylla halor ka rukom pyrkhat pyrdain bad ka jingkylla haka rukom kren. Iaka um jongu soh pomegranate lah ruh ban iarap pynduna na ka jingma ban ngat haka jingpang Alzheimer.
7. KA JINGLAH BAN IALEH PYRSHAH IAKI KHNIANG JINGPANG (BACTERIA):— Ka jingshahktah haki khniang jingpang ka pynlong ia u briew ban ngat ha kiba bun ki jingpang jingshitom. Ban ialeh pyrshah iakine ki jingeh, phi donkam ban kynthup ia u soh pomegranate haki jingbam jongphi. Une u soh bad ka um jong u kidon iaka bor balah ban ialeh pyrshah ia baroh ki khniang jingpang.
8. U SOH BA BIANGTAM SHUWA BAN KILAN MET:— Nalor ka jingdon ia ki nutrients, ki Vitamin bad minerals, une u soh u don ruh iaka carbohydrate kaba tei bad udei u soh uba biangtam ban bam shuwa ban kilan met. Ka jingdon ka carbohydrate ha une u soh ka iarap ban tei bad pynneh iaka bor met ha manla ki jingkilan met. Lada phi dei kito kiba ju mlien ban kilan met ka umsoh pomegranate kadei kaba biangtam ban dih shuwa ban sdang iaka jingkilan met. Khublei.