“U shu thaw ktien uto u khynnah” kynthah U Pastor ia U Secy rim ka PCF

Shillong, 24 Rymphang:
“Ym don Secretery, ym don Chairman shuh naduh ka 30tarik Nohprah” iathuh U Pastor PBM Basa iawmoit, haba kynthoh halor ka jingweng noh jong U bah Joe Lamare, ha kaba iatrei lang bad u, ha ka kynhun jong ka Peoples Forum.
U Pastor Basaiaw moit, u iathuh ba naduh ka 30tarik, la thaw thymmai lut noh, ia ka rukom treikam, ha kaba ma u, kum u kandidet, u long u nong kanbas ba ha khmat duh bad u iathuh ruh, ba un sa jied ia U Chief Organiser bad nangta sa ki Area Organiser.
Haba kynthoh pat, ia ka jingkren jong U bah Joe, ha kaba u kyrshan ia U bah Lambor Malngiang, kandidet Congress na Nongkrem bad kaba u kynnoh pyrshah ia U Pastor PBM Basaiawmoit, ba u kyrshan ia U bah Ardent Basaiawmoit, ba un ialeh ia ka MDC ruh (nalor ba ula long U MLA), la jubab da U Pastor, da kaba ong “Ngam shym leit sha Constituency” bad u ong “U shu thaw ktien, uto u khynnah”. La batai biang da U Pastor, da kaba ong “Ka PCF, ka dei ka kynhun, kaba kwah ianga ban ialeh MP elekshon”. “U Ardent, um khot ianga sha Nongkrem, te balei ba ngan leit” ong U Pastor bad u ong biang “Nga dei uba khadduh eh, u ban ia shah ia la kiba ha iing, hynrei nga peit na ka jingtbit jongki bad ngam shah na ka jingiadei ba ha iing”.
U Pastor,u ong biang “U Ardent, um lah ban batai ianga, lane ba ngan batai manga ruh ia u” ha kaba u ong “Ula dei u rangbah”.
La ong biang U Pastor, “Lada u dang dei U Secretery, ula dei ban wan ia kynduh borabor”. Hynrei, la iathuh da utei u kandidet, ba U Bah Joe, u la phah jingthoh rit ruh ia u, ha kaba u iathuh, ba ula pyniasoh ialade sha ka seng AAP.
Khadduh U Pastor Basaiawmoit, u ong “Nga pdiang sngewbha ba un mih noh, u bym kwah ban kyrshan, u lah ban mih da kaba sngewbha”.
Na ka liang jong U bah Joe Lamare, ula pynmih khubor mynta ka sngi, ha kaba u iathuh ba ula mih noh, halor ka jingsngew shimet jongu hi bad kam don kano kano kaba u sngew pyrshah ia U Pastor Basaiawmoit, kum u kandidet MP bad ula iathuh ba um kwah shuh hi ruh, ba un dang iai don bynta lang nangne shakhmat bad katei ka kynhun, kaba U Pastor Basaiawmoit, u dei u kandidet MP na Shillong Constituency.