Nongstoiñ: Ka National People’s Party (NPP) jong ka Nongstoiñ Block, ha ka sngi Saitjain, ka pynlong ia ka jingialang paid bah ha Bishop Hall Nongstoiñ bad ha katei ka jingialang la wan ban iashim bynta da ki spah ngut ki President bad ki Secretary jong ki Primary Unit bapher bapher hapoh ka Nongstoiñ Konsti twensi ryngkat ki nong kitkam bad ki dkhot jong ka Women bad ka Youth wing jong ka Nongstoiñ Block. Ha katei ka jingialang, da kawei ka sur ki la shim ia ka rai ban pyniakhun mynjur ia u bah Apsharailang Syiem, u ba dei u Secretary jong ka Hima Nongstoiñ ba un long kum u kandidet ka seng, u ban iakhun ia ka ilekshon MDC ka ban sa long shen.
U-Bah-Apsharailang-Syiem-kyrtong-MDC-ka-party-NPP
Ia katei ka jingialang la pyniaid da u President jong ka Party u Bah Macmillan Byrsat MLA ka Nongstoiñ, ha kaba u la ai ia ka jingpynshai lamphrang ia ka rukom pyniaid jong ka seng, ha kaba iadei bad ka jingjied ia ka kyrteng jong u Bah Apsharailang Syiem ban long u kyrtong ha katei ka ilekshon MDC ka ban sa long shen.
Shuh shuh u la ong ruh ba ka seng, ka la thung ia ka Committee kaba kyrpang ha kaba ki dkhot jong ka ki don 25 ngut bad dei katei ka kynhun kaba la tyrwa ia ka kyrteng jong u ruh ha ka MLA ilekshon kaba lah dep kum u kyrtong ha kaba na ka liang jong u, um shympoi pyrkhat ban ialeh ilekshon bad u la ong biang ha kane ka kynti kaba mynta ruh dei katei kajuh ka Committee kaba la tyrwa ia ka kyrteng jong u Bah Apsharailang Syiem ban long u Kyrtong ha ka MDC Election.
U President u la pynshai shuh shuh ba ka rukom pyrkhat hapoh ka Committee haba jied ia u kyrtong ka long ban jied ia u briew u ba don ia ka Nongrim (Principle) u ba tip bad shemphang ia ka kam (wisdom) bad u ba don ia ka thong ban jop “Ban shu don ka thong ban jop, hynrei um don ia kitei ar ka long leh noh ei namar ba ki MDC ki bymdon nongrim hapoh 5 snem ki kylla jan 5 tylli ki seng ne Party”.
Na ka liang jong u President, u la pynkynmaw ba ka Seng NPP ha kaba sdang kam don MDC hynrei mynta shuwa ban kut ka samoi ka la ioh haduh 4 ngut ki MDC bad ialam syndon ia ka jingsynshar hapoh District Council bad u la ong ruh ba barabor u MLA u dei ban long u hynmen bad u MDC un long u para ha ka kam bad lada ka don ka jingialeh pyrshah uwei ia uwei pat la ju shem ba kin iajot lang baroh ar ngut.
“Ngam donbor ban kular ai tiket iano iano la u dei u para ne u ba ha iing ha sem lada ka kynhun kaba la suit la shor kum ka “ THYMMEI SAINDUR “ kam ibit ban tyrwa ne bynshet ia ka kam, namar ngam lah ban trei marwei ban pynjop ilekshon hynrei ngi donkam ia ka jingiatreilang” ong biang u President.
Ha katei ka sngi la ioh ruh ia ka jingkren na u kyrtong katei ka seng, u bah Apsharailang Syiem uba la ai khublei ia u President u ba la lah ban pyniaid beit ia ka jingialang ha kaba u la buh beit bad ryntih ia ka kaiphot (Report) jong ka Committee kaba kyrpang, kat haduh ba ym don wat uwei ruh u ba kyntait ia ka kyrteng jong u ban long kum u kyrtong na ka bynta ka MDC ilekshon bad u la ai khublei ia ki nongkitkam jong ka seng ha ki Unit bad ki seng jong ki Longkmie bad ki Samla kiba la pdiang sngewbha ia ka jingtyrwa jong ka Committee ba kyrpang bad kiba la ai ruh ka jingmynjur da kaba pyni daka jingiaieng lang ryntih shriak.