U sajar nangli bad ki jingteinam jongu

M.M.Thaiang

Ka khanatang kaba hiar pateng na kawei ka pateng bynriew sha kawei pat ka pateng bynriew,la ong ba u SajarNangli u long uwei na ki Myntri Syiem jong u Syiem Borgohain uba synshar donbor ia ka Hima bah Jaintia( Jaintia Empire) lane ka Hima bah u Syiem Sutnga ha ka spah snem kaba khathynriew ( Sixteenth Century).

Ka khana parom kam tip ha kano ka shnong jong ka Hima bah Jaintia ba la kha ia u Sajar Nangli bad ha kano ka snem namar ba ym don kano kano ka jingthoh ka jingtar, hynrei pat la ong ba u shong u sah ha kawei ka jaka ha shiliang ka wah Kupli ia kaba la tip haduh mynta mynne “KA KUT SAJAR”kaba mynta ka hap hapoh ka North Cachar jong ka Jylla Assam.

U Sajar Nangli kum u Myntri Syiem jong u Syiem Borgohain uba dei peit ia ki 12 Elaka jong ka Hima bah Jaintia, u long u briew uba la ieid bad burom da baroh namar ka jinglen bad ka jingaitilut jong u ban peit ban khmih ia ka bha ka miat ki paid nongshong shnong jong ka Hima( Jaintia Empire).Kane ka jingbha, ka jingaitilut jong u na ka bynta ka bha ka miat ki nongshong shnong jong ka Hima kam shym laneh slem. U Lyoh uba dum u la taplup ia ka jingim jong u Sajar Nangli.

Ka Parom ka ong ba u Sajar Nangli, u don ka khun kynthei kaba bha briew kaba la palat liam ka jingbhabriew napdeng ki kynthei baroh jong ka Hima.Ka jingbha briew jong ka, ka la pynshoh biej bad pyniapmat ia u Syiem Borgohain bad u la kwah ba kan long ka Mahadei jong u. U Syiem u la pynsngew bad pynpaw ia kane ha u Sajar Nangli pynban u Sajar Nangli u la kyntait ia kane ka jingkwah jong u Syiem Borgohain.
Ka Parom ka ong ba naduh kata ka khyllipmat kaba u Sajar Nangli u la kyntait bad um kwah ba ka khun marwei jong u kan long ka Mahadei jong u Syiem, u Syiem u la thaw da bun ki lad kumno ban leh ia u Sajar Nangli ban ioh ia ka khun bha briew jong u. U Syiem hadien ba u la shong pyrkhat sani bha u la shem ia ka buit ban ioh ia ka khun u Sajar Nangli ka long satang ban shu pyniapnoh ia u Sajar da kano re kano ka buit.
U Syiem Borgohain ban pynurlong ia kane ka buit jong u, u la pynlong ia ka jingbam khawai kaba heh ( the King made a big feast) ha Jaintiapur bad u la khot ia baroh ki Myntri Syiem jong u bad ia ki khun ki hajar jong ka Hima ban ia wan sha kane ka jingbam khawai.
Ban ioh pyniap ia u Sajar Nangli, u Syiem, u la pasiaw jar jar ha ki Nongshet bad ki Nongpynkhreh bam ba kin khleh da ka bih (Umkhohriew) ha ka Kyiad Sidhiar ( Rice beer) ha ka jingbam bad ka jingdih ka ban ai ha u Sajar Nangli. Ka Parom ka ong ba donbok ba kawei na ki Nongshet kaba ieid thoin thoin ia u Sajar, haba ka la iohsngew bad tip ia kane ka jingthmu ba sniew jong u Syiem, ka la leit sor sor bad pasiaw ha tyndong skhor u Sajar Nangli ia kane ka jingthmu ba sniew jong u Syiem bad ka la ong ia u ba um dei ban bam ia ka jingbam kaba la wan rah ia u ban bam lane dih ia ka Kyiad Sidhiar(Rice beer) naba ia ka jingbam bad ka jingdih la kheh da ka Umkhohriew kaba long ka bih.
U Sajar Nangli u la shah skhor ia kane ka jingpasiaw jong ka Nongshet bad kum ka lad ban lait na kata ka jingthmu basniew jong u Syiem, u Sajar Nangli u leh mynleh kum u bym sngew shait bha ka met ka phat bad um sngew kwah ban bam eiei.Kumba la bthah da ka Nongshet, u Sajar Nangli ha ka jaka ban dih ia ka Kyiad kaba la wan rah, u dih khyndiat da ka snam Syiar bad u prie artat. Ki Myntri jong u Syiem bad baroh kita kiba ia shongbam ha kata ka jingkhawai ki la iohi ba u Sajar u prie bad mih da ka snam. Baroh kiba la iohi ki da ngeit ba u Sajar Nangli u da pang shisha. Ka Parom ka ong u Sajar Nangli tang mar shu prie u ieng joit shisyndon bad um don por shuh ban leit ia kynduh ia u Syiem. U Sajar u la khot shisyndon ia baroh ki Nongbud ki Nongrap jong u ban ia mih bad phetnoh ban leit im.
U Sajar Nangli bad ki Nongbud Nongrap jong u ha ka jaka ban ialeh thma pyrshah ia u Syiem, ka bha ban mihnoh na ka Hima Syiem Jaintia bad ki la leitnoh.Ha ka juh ka por u la hukum ia ki Nongbud Nongrap jong u ba kin long kiba la khreh ia yu Khnam, ka Ryntih bad lada ki Nongbud jong u Syiem ki buddien kin iengialeh pyrshah da ka Wait da ka Stieh, da u Khnam da ka Ryntih.
Ka parom ka ong ba u Sajar Nangli u dei u Myntri bad u Nongmihkhmat (Viceroy) jong ki 12 Elaka jong ka Hima bah u Syiem Sutnga ha Jaintiapur. Hashwa ba un mih na ka Hima u Syiem Jaintiapur, kum u nongmihkhmat ki 12 Elaka, u kwah ban leit ai khublei ia ki Nongshong shnong jong ki Elaka. Na Jaintiapur ula leit sha ka Elaka Maskut (ka Elaka Maskut kawei na ki Elaka kaba khlain bor ha kata ka por) U Sajar bad ki paid jong u ha ka lynti sha Elaka ba u shnong u sah “ka Kut Sajar” ba la thait ka iaid lynti bad sngi bad miet kila shong thait ha Thadlaskein.
U Sajar Nangli u long u briew uba sngew tynnat ban tei ia ki jingtei pynshahnam ialade bad ia ki nongbud nongrap jong u bad pynsah kynmaw ia ki wandien ki mandien ha ka lynti kaba ma u bad ki paid jong u ki iaid ki la pynieng ia ki maw bynna ki maw sahnam, ki pung bad ki maw pynieng, ki maw siang, ki mawknor (Clusters) bad kiwei de ki j ingtei sahnam.
Shwa ba u Sajar Nangli bad ki paid jong u kin mih na Thadlaskein sha Elaka Nartiang ulaphah tih ia kawei ka pung ha Thadlaskein ia kaba la tip haduh mynta ka pung Thadlaskein. La ong ba ia kane ka pun gym shym la tip da ki mohkhiew da ki lyngka hynrei tang da ka tdong ryntih bad kane ka pyni haduh katno ki bun ki nongbud ki nongrap jong u Sajar Nangli.
Haba u Sajar Nangli bad ki paid jong u ki poi ha Nartiang ka shnong shong pynngad ki syiem Jaintiapur ha ka por Lyiur, ma u bad ki paid jong u kila pynsah Nam ialade da kaba tih ia ki pung kum ka pung Umtisong, Birjympamasi bad pung Mokoitok.
Na Nartiang u Sajar Nangli bad ki paid jong u kila hiar sha ki Elaka nongphyllut bad la pynieng ia uwei u maw sahnam ha ka nam bad ka burom jong u Sajar Nangli ia kaba la tip kum u Maw Sajar lane ia uba kham iatip mynta kum u “Moorawi” uba don ha Nongjrong.
Na Elaka Nongphyllut u la iaid sha Moothalasarmi ban leit ia kynduh ia u khla wait jong ki Mikir (Karbi ba mynta) u Thong Nokbe ia uba kham iatip ha ka khana tang ki Mikir (Karbi) kum u Thong Teron. Kumba paw ha kawei na ki kot poitri jong ki Karbi kaba ong “Thong Nokbe Lake Teron” hynrei u Sajar Nangli um shym la ia kynduh, nangta u phai sha ka Elaka Raliang bad katba u dang iaid lynti na Moothalasarmi sha Elaka Raliang ula sah katto katne sngi ha Lyngdoh Sutong (Nongphyllut Elaka) bad pynieng ia ki moosiang ki Mooknor kine ki Moosiang ki Mooknor ki don ha lynti iaid na Nangjrong sha Mooriap, ia kine ki Moosiang ki Mooknor la pynjot dusmon da ki riew dusmon dang ha kine ki khyndiat snem hynrei ia kane ka jaka ba ieng ki Moosiang ki Mooknor u Sajar Nangli la khot Mooknor.
Na Elaka Nongphyllut sha Raliang u iaid lyngba ka shnong Mukroh bad harud nong Mukroh dang lah ban iohi ia ki mawsiang ki maw tap (Clusters and Dolments) bad ki maw pynieng ia kiba la tip mynta kum ki mooliar. Nangta la ong u mih na Mukroh sha Raliang bad leit sha Shangpung bad Sutnga Elaka, Nangta u iaid beit sha ka jaka kaba u shong u sah Kut Sajar da kaba kam ia ka wah Kupli ha Tymbung iaid lyngba ka shnong Kharangma ka shnong kaba ym da jngai eh na ka Umshit (Karam pani) ha ka surok kali ba mynta ban leit sha Halflong. Ia kane ka jaka shong jaka sah jong u Sajar Nangli la khot ka Kut bad ia kane ka Kut la tip haduh mynta mynne kum ka Kut Sajar.U Sajar Nangli bad la ki paid ki mih noh na ka hima bah Jaintia iaid lyngba ka Lumding shaphang mihngi ong ka parom( ka Lumding ka don mynta hapoh ka District Karbi-Anglong-Assam).