U ruti ha kane ka jylla, uba lah ban pynkylla sha ka jingpang Cancer?

Shillong, 19 Jylliew: Dang shen ka Centre for Science and Environment,New Delhi (CSE) ka la lap ba la pyn donkam da u Potassium Bromate bad u iodate ban kham pynjem ia u atta ne u moida ha ka por ba shet ia u ruti. Katei ka tnad ka la lap ruh ba ki don ia ka 2B Carcinogen kaba lah ban pynkylla sha ka jingpang Cancer lane ka jingpang Thyroid.
Tang mar ia mih katei ka khubor ha Delhi, ka la pynpar ñiang khriat ia ki paidbah kiba don ha kane ka jylla ioh ba u ruti ba ki ju bam hangne ruh u lah pynban ban long kumba long ha Delhi. Katei ka khubor ka la rung ruh hapoh ki tyndong shkor ka sorkar jylla ha kaba la ioh jingtip ba ka sorkar ka don jingthmu ban phah Test noh ia ki ruti ha kane ka jylla.
Halor katei ka bynta u Rupang u la ioh ban ia kren bad ka Assistant Commissioner of Food Safety ka kong DBS Mukhim. Ka kong Mukhim ka la iathuh ba na ka por sha ka por katei ka tnad ka ju leh ia ki Test hynrei ka jingjia kaba la jia ha Delhi ka la pynlong ia katei ka tnad ba kan pynleit jingmut kyrpang (Special Drive) na ka bynta u ruti da kaba leit ban shim nuksa (sample) ia ki ruti kiba die paidbah ha kane ka jylla.
Ka kong Mukhim ka la ong ba ia baroh kitei ki symboh ruti kiba la ioh lum, katei ka tnad ka la phah Test sha ka State Public Health Laboratory ha nongbah Guwahati . “Haduh mynta ngi dang ap ia ka ripod ngim pat lah ban ong eiei kat bym pat ioh ia ka ripod, ngi don shibun ki kyndon ban leh lada ngi la ioh ia ka ripod” ka la ong. Ka la ong ruh ba u Ruti u dei u ‘jait jingbam’ bad u hap ruh hapoh ka jingpeit katei ka tnad , “Mynta ngi shu ap beit ia ka ripod,hadien ba la ioh ia ka ripod kaba dei ban leh ngin leh beit” ong ka kong DBS Mukhim Assistant Commissioner jong ka tnad Food Safety ka tnad kaba peit ia ka jingbit jingbiang ka bam ha kane ka jylla.