U Rev. (Dr) John Robert: U Kpa ka Khasi Literature

Editor,
Ka jingtip ba la shim na ki par ka jingtip ki rangbah ha la ki jong ki jong ki kyrdan da I Bah M. P. Mawkon, Nongjri P.O. Pynursla. Itei I Bah, ila pynmih ha uwei u kot khubor Khasi Dated 29th July 2021 ka long ka ba kham jrong bad ba shai shaphang ka jingim bad jingtrei shitom utei u shakri u Blei uba la wan na shiliang duriaw uba la aiti ia la ka jingim ha ka ban pynshai bad ban pynsngewthuh bad hikai ia ka thoh ka pule khamtam ia ka Kospel u Trai Jisu. Hynrei wat la katta ruh dang don hi hangne hangtai kiba dei ban pyni bad pynshai ia ki jingshisha bad kita ki long:-

1. Ka jaitbynriew Khasi Pnar. Ym ju don kum kane ka jaitbynriew. Ha Meghalaya don 3 (lai) tylli ki jaitbynriew heh paid – Ki Khasi, Ki Garo bad Ki Jaintia. Ha Jaintia don 3 (lai) tylli ki sub-tribes, U Pnar, U War (ba la khot mynta War-Jaintia) bad ki Bhoi. Ia kine la tip bad la khot kum ki Jaintia. Dei ha kane ka kyrteng kum ka nongrim la ai kyrteng ia ka Autonomous Council kum ka Jaintia Hills Autonomous District Council bad kumjuh ruh ia ki Khasi bad Garo.
2. Sa kawei pat, itei I Bah haneng I la iathuh ba une u Missionary uba khraw bad u ba ieid eh ia ka Ri-Khasi u la thaw ia ka jingrwai – Ri Khasi Ri Khasi. Nga ieid eh ia pha. Hynrei, utei u shakri u Blei um shym la thaw ia kane ka jingrwai – Ri Khasi, Ri Khasi, hynrei u la thaw – Ri Khasi Ri Jaintia. Nga ieid eh ia pha. La shon bad pynmih ia kane ka jingrwai ha ki kot Khasi kiba ngi tip ‘The Khasi Readers’ bad kawei na ki ka long ‘Ka Third Reader’ bad kawei pat ‘Ka Fourth Reader’ ba la pule ha ki kyrdan primary. Ia ka Third Reader la pule ha Klass III bad ia ka Fourth Reader ha ka Klass IV. Ia kane ka jingrwai – Ri Khasi Ri Jaintia. Nga ieid eh ia pha la shon ha ka Third Reader. Ia kane ka juh ka jingrwai jong utei u Saheb – Ri Khasi Ri Jaintia. Nga ieid eh ia pha la shon bad pynmih ruh ha ka English – Khasi Dictionary ba la pynmih da u Harrison Syiemlieh, Chapel Road, Qualapatty, Shillong ha ka page 1294. Hynrei ia ka dkhot ba 2 (ar) la thaw bad la bsuh lang ha katei ka jingrwai da u L. H. Syiemlieh.
3. Ha kawei pat ka kot pule na ka bynta ki primary School ba la pynmih da ka Christian Literature, Ka Balang Presbyterian ka la shon shibun ki jait jingrwai bad ia ki kyrteng ki nongthaw jingrwai ruh. Hynrei ia ka jingrwai – Ri Khasi Ri Khasi ym shym la pyni uei u nongthaw – Balei mo? Ia ka daw la sngewthuh hi.

La iaroh bad ai ka burom ia u Rev. Dr. John Robert, hynrei balei ba la pynkylla ia kaba la thaw. Don jingmut aiu ha lyndet kane? Da sumar ioh yn don kiba iaid da kawei pat ka lynti halor kane. To kiba la nang la stad kin sngewbha ban bsa da ka jingtip kaba shisha bad ba don nongrim khnang ba ki longdien kin nym shah ialam bakla. Ha ka jingshisha, ka Balang Prebyterian kam dei ban shah ia ki riew shim kabu ban lushia ia kaei ka ba u Missionary la jong u la trei shitom.

K. Kyndaid
Jowai