Shillong, 16 Nohprah:Ka kashari jong ka Shillong High Court, ha ka jingbishar jong U Justice S R Sen, ka la pynmih ia ka rai, ha kaba dei bad ka mukotduma, ba la mudui da U Archi Siangshai jong ka Wapung Skur, ka Lucky Dkhar na Mookhep, ka Dakahi Dkhar na Mookhep, ka Wanlang Dkhar na Lumshoh Ksih, ka Rita Dkhar na Mookhep, ka Bailang Siangshai na Lumshoh Ksih, ka Ripaya Siangshai na Mookhep bad ka Sida Siangshai na Mookhep, ha kaba ki la mudui pyrshah ia ka sorkar Meghalaya, ba la khlieh da U Chief Secretary, U Deputy Commissioner, East Jaintia Hills District, U Superintendent of Police, East Jaintia Hills District, U Officer in Charge Lad Rymbai Police Station, Bah Lukas Shylla, U Rangbah Shnong ka Pamrakmai, U Diwanis Siangshai, Secretary Shnong bad U Daikiwbha Rymbai, Secretary jong ka Shnong Pamrakmai bad katei ka long halor ka phang, kaba iada ia ka hok jongki kum ki nongshong shnong.
Ka kashari, ka la shah ia kitei ki nong ujor, ba kin leit phai biang sha la ki jong ki shnong bad ba ia katei ka kam, la ia kren pynbeit ba kitei ki nong ujor, kin nym iaid shuh shakhmat, ia katei ka mukotduma.
Katba kum katei ka hukum ka High Court, ka maham ruh ia U bah Lucas Shylla, Rangbah Shnong bad U Daikiwbha Rymbai, Secretary, VDP, ba kim dei shuh ban leh ia kitei ki kam thombor jongki nangne shakhmat. La maham ruh ia ki, ba kim bit ban tuklar bad ki kam kiba ki bor sorkar, kiba trei ia la ka jong ka kam, ha ki kyndon jong ka riti synshar ri bad kitei kiba shah ujor, ki la pan map ruh bad kumta la shah ba kin lait na ka jingshah rai pynrem, wat la ka jingmaham, ka long ba kin ngat ha ka jingshong phatok, lada ki dang iai bteng ia kitei ki kam beain hadien ha bud.
U nongbishar, u ong ba ka jingmut kaba kongsan, kaba don ha ka jingiadei bad ka bor jong u Rangbah Shnong, ka iapher shibun, na kaei kaba long mynta bad ula ong ba U Rangbah Shnong, u dei ban long u riew rangbah jong ka Shnong bad uba don ia ka jingsngewthuh kaba biang bha, uba sngewthuh ia ka jingiadei bad ki para briew bad uba khanglad ia kino kino ki kam ialeh pyrshah bad uba la jied da ki paidbah bad ba u ioh da ka sanat na U Syiem. U nongbishar, u ong shuh shuh, ba U Rangbah Shnong, u lah ban peit ia ka bha ka miat jong ka shnong, kaba hap ha ka jingsynshar jongu bad ba u lah ruh ban leit ud ia ki jingeh jong ki paidbah kiba hap ha katei ka shnong, sha ki bor sorkar ne sha ki bor District lane sha ki pulit ruh kumjuh bad la ong shuh shuh ba U Rangbah Shnong, um don ia ka hok na kano kano ka bor lane na ka riti synshar jong ka Ri India, na ka bynta ban ai sertiphiket sngi kha, sertiphiket sngi iap lane ban pyn ithuh ia ki kot ki sla, lane ban ai jingbit na ka bynta ban tei iing tei sem bad ban shim ram ruh kumjuh, ong u nongbishar.
U nongbishar, ula ong shuh shuh, ba haba u briew, u leit ban pan ia ki sertiphiket sngi kha ne sngi iap, ne jingbit ban tei iing lane ban ithuh ia ki kot ki sla, ha ka ia die ia thied khyndew, ne ha kaba ring ding ilektrik ha iing, ka la ju don ka jingbthah ba dei ban wan rah ia ka jingmynjur na U Rangbah Shnong bad la ong ba katei ka dei ka kam beain ia ki bor District lane ia ka sorkar ruh kumjuh. La ju ong ruh ba ki don ki khep, ba ki bor shnong, ki mushlia ia ki kam jong ki pulit lane jong ki bor District ruh kumjuh bad halor katei ka phang, la ong da u nongbishar, ba kam don ka ain, ia ki Rangbah Shnong, ba kin ai kano kano ka jingmynjur lane ba kin beh ruh ia ki briew na kano kano ka Shnong, katba kum ka jingsngew bit jongki hi.
U nongbishar, u ong shuh shuh ba kam lah ban don ar tylli ka bor synshar bad ka dei namarkata ia ka sorkar Jylla, ia ka bor synshar District lane ia ki District, ba kin leh ia la ka jong ka kam bad ba kim ju dei ban wad jingiarap na ki bor Shnong. La ong ba ki Rangbah Shnong, ki dei ban leh tang ia ki kam kiba iadei bad ka imlang sahlang ha ka shnong jongki bad ba kim dei ban shim ia ka ain ha la ka jong ka kti lane ban ai ia kino kino ki kot ki sla, lymda ka la don ka ain kaba bthah ba kin leh kumta.
La bthah da u nongbishar ba U Chief Secretary, ka sorkar Meghalaya, ki bor District bad ki pulit, ba kin shim khia ia katei ka kam bad ba kim dei ban dang iai pan ia ki kot jingmynjur na ki Rangbah Shnong, hynrei ba kin trei laitluid beit, ia la ka jong ka kam, kaba ki dei ban leh, ong u nongbishar.
kyrmen ba ka sorkar kan peitbniah ia ka hukum jong ka ïngbishar, namar ka don ka jingïatyngkhuh bad ka riti dustur khasi.
long kumne kien haba ym pat don aiñ ban ithuh ia ki ryngbah shnong ki sordar shnong kan mih biet kum kine ki kynrum kynram.. namar kata lah dei ban leh noh wut2 ban thaw lad thaw lynti ban ioh jing ithuh da ka aiñ lym kumta ka riti dustur kolshor jong kan jah klep noh..