“U Rajiv Gandhi, u kham lah da ka Sixth Schedule ha Meghalaya”

Shillong:U nongpeit ka AICC ia ka Congress ha Meghalaya u Dr. Chellakumar u la sangah ia ka NPP kaba iadon lang bad ka BJP, ba wat la kila synshar ia ka Meghalaya la shiphew snem, hynrei kim pat shym la pynrung satia ia ka ktien Khasi bad Garo ha ka khyrnit ba phra ka riti synshar ka ri.

Haba kren ha ki jingialang kaba long ha Congress Bhavan, Shillong ha kane ka sngi Saitjain, u Dr. Chellakumar u la ong, “Ki lah ban ong kumne kumtai, ban ai daw hynrei balei kim lah ban pynrung ia ka ktien Khasi bad Garo ha ka 8th Schedule wat hadien shiphew snem ba kila don ha ka bor”.
Ha kajuh ka por, u la ong ba u myntri rangbahduh barim ka ri, uba la khlad, u Rajiv Gandhi u la pynneh ia ka Sixth Schedule haba ki wanrah ia ka ia ka Panchayati Raj ha ka ri, namar ba u sngewthuh ba ka Panchayat Raj kam iahap bad ka Sixth Schedule.

“U Rajiv Gandhi haba wanrah ia ka Panchayati Raj ha ka ri, u la kdew shai ba ka Panchayati Raj ka iapher bad ka rukom hangne ha jylla Meghalaya ka kham bha pynban ban ia ka Panchayati Raj ha ka ri bad ula pynneh ia Sixth Schedule”, la ong u Dr. Chellakumar.
Ula ai mynsiem ia ki kyrtong ka Congress kiban iakhun ia ka MDC elekshon, ba ki dei ban trei shitom namar ba ban ioh ticket ka dei shi bynta ka jingialeh hynrei ban jop ia ka elekshon, ka dei sa shi bynta kaba kongsan tam.

Ha kane ka jingialang, u Dr. Chellakumar ula kitbok ruh ia baroh ki kyrtong MDC ka party kiban iakhun ia ka elekshon sha ka KHADC bad JHADC kaban long ha ka 21 tarik Rymphang 2025 ban wan.