Shillong:U myntri sorkar ka Meghalaya uba dei ruh u MLA ka NPP, u Marcuise N Marak ula pynrem jur ia ka jingkynnoh u Myntri Rangbah barim ka Manipur u Biren Singh pyrshah ia u Late Purno A Sangma kumba la paw ha ka rynsan Social media.
Hynnin ka sngi, u Biren Singh ha ka page jongu ha Social media, ula kynnoh ia u Purno ba ula pyrshang ban wanrah ia ka jingiapait hapdeng ki jaitbynriew riewlum ha North East ka ri India, da kaba dawa ban ioh ia ka State lajong ia ki riewlum.
Halor kane, u Marcuise haba pynrem jur ia kane ka jingkren u Biren Singh ula dawa ruh ba u dei ban panmab. U Marcuise ula kynnoh ruh ba u Biren Singh ula wanrah ia ka huri hura ha ka jylla Manipur ha ka por ba u bat ia ka shuki Myntri Rangbah katei ka jylla bad mynta ula kynnoh pat ia u Purno A Sangma uba la bam kwai ha duwar u Blei, bad ula pynrem jur ia kane ka jingkynthah u Biren Singh bad dawa ba u dei ban panmab.
“U Biren Singh u dei u myntri rangbah barim ka Manipur, uba la wanrah ka jingkulmar bad mynta u la wad daw ia u nongialam uba burom haka ri, u Purno A Sangma, ngim lah ban pdiang, ngi pynrem jur ia kane ka jingkynthoh jong u bad nga dawa panmab na u”, la ong u Marcuise.
Ha kajuh ka por, u myntri rangbah ka jylla Meghalaya u Conrad K Sangma ha ka page jong u ha Social media ula pynrem jur ia kane ka jingkynthah u Biren Singh pyrshah ia u Purno A Sangma.
U Conrad u la ong ba ka jingkynthoh jong u Biren Singh pyrshah ia u (late) PA Sangma ka long kaba sngewsih, namar ba u PA Sangma u ju ieng barabor na ka bynta ka jingbha ka jingbit jingbiang bad ki hok jong ki paidbah ka North East.
“Ha kum kane ka por, ngim dei ban ialeh politik hynrei ngi dei ban iatreilang ban wanrah ia ka shongsuk shongsain ha Manipur bad nga kyrpad ia baroh ban iatreilang ban pyllong ia ka Manipur kaba kham bit kham biang”, la ong u Conrad.
Phi don ban ong eiei?