U pud u sam hapdeng ka Jaintia Hills Meghalaya bad ka Karbi Anglong Assam, ka Block I & II, ki bynta ba dei hok ka Ri Jaintia

M.M.Thaiang

[ba bteng] Ha ka 10.9.1971 ka la don biang ka jingialang hapdeng ki Chief Minister jong ki ar jylla Meghalaya bad Assam. Ha kane ka jingialang na ka liang ka Assam la ia donlang nalor u Chief Minister, u Revanue Minister bad u Minister Chatra Singh Teron bad na ka liang ka Meghalaya la ia donlang u Chief Minister Capt. W. A. Sangma, Minister B.B.Lyngdoh, Minister SDD Nichols Roy bad u Minister E. Bareh. Ha kane ka jingialang la ia kren jur ia ka kam pud kam sam ha kaba iadei ka Jaintia Hills bad ka Mikir Hills, Block I bad ba dei ban pynphai noh na ka Mikir Hills Assam sha ka Jaintia Hills Meghalaya.

Hadien ki jingiakren la mynjur halor ka jingtyrwa jong u Chief Minister jong k Meghalaya ba ia ka kam Block I bad Block II bay n rai halor ka nongrim ba naduh hyndai hynthai kine ki thain ( Block I & Block II) ki dei ki bynta ba dei hok jong ka ri Jaintia bad ki nongshong shnong la jan baroh ki briew kiba shong ha kine ki Block ki dei ki Khasi ki Pnar bad lada donkam ban sakhi ia kane yn shim na ka jingkhein briew jong ka Census 1951 bad 1961 da ki Ophisar jong ki ar sorkar (Meghalaya bad Assam) bad ban wanrah ha kawei pat ka jingialang ba yn iarai kutnoh ia kane ka kam kat kum ka jingiamynjur lang ka Joint Equiry jong ki ar District Council Khasi & Jaintia Hills bad Mikir Hills kaba la long ha ka 28 tarik February 1958 ha Jrikyndeng.

Hadien ka 10.9.1971, na ka liang ka Meghalaya ka la thoh sha u Chief Minister ka Assam ban iabuh tarik ban ia shong ban pyndep ia kane ka kam ban pynphainoh ia ka Block I na ka Mikir Hills Assam sha Jaintia Hills Meghalaya,hynrei pat na ka liang u Chief Minister ka Assam (Chief Minister-Sinha) u la pyrshang ban kiar na ka por sha ka por ban ia kynduh lang bad ban ia pyndep kam kaba iadei bad ka Block I. Ka por ka iaid, ki sorkar bad ki Chief Minister ki ar Jylla Meghalaya bad Assam ki leit bad ki wan hynrei pat ia ka kam ban pynphai ia ka Block I na ka Mikir Hills ( Karbi-Anglong ba mynta) sha Jaintia Hills Meghalaya haduh mynta kam shym poi shano shano ruh bad kumba long mynta kane ka thain Block I ka dangsah ha ka jingiakhajia ( Disputed Areas) bad lano u Chief Minister ka Meghalaya bad u Chief Minister jong ka Assam kin ia kynduh bad ban ia kren pynphai noh ia kane ka thain Block I na ka Karbi-Anglong Assam sha Jaintia Hills Meghalaya kaba dei ka bynta ba dei hok jong ka Rilum Jaintia.