U pud u sam hapdeng ka Jaintia Hills Meghalaya bad ka Karbi Anglong Assam, ka Block I & II, ki bynta ba dei hok ka Ri Jaintia

M.M.Thaiang

Ba bteng
Haba la ioh ia ka Autonomous Stateha u April 1970 bad haba la shimti ia ka jingsynshar da ka sorkar lajong ( Meghalaya State ba mynta) ka sorkar da ka shithi jong ka No.MREV/boundary/102/70/26 dated 13.8.1970, ka la ong ia u Chief Secretary ka Assam ba ka jingiapynbeit pud (boundary demarcation) lah ban pdiang da baroh ar ki sorkar ( sorkar Autonomous State bad ka sorkar Assam) bad lada donkam ban thung da ka Commission ba laitluid ( Independent Boundary Commission) ban peit bniah ia kane ka kam da kaba iaphai sha ka jingiakut bad jingiarai lang hapdeng ki ar District Council ( United Khasi & Jaintia Hills bad ka Mikir Hills) kaba la long ha ka 17 tarik February 1958 ha Umbasoo bad kaba kut ha ka 28 February 1958 ha Jrikyndeng ha kaba la mynjur lang ba baroh ki shnong Khasi Pnar kiba don hapoh ka Block I dei ban pynphai sha ka Jaintia Hills.

Ka sorkar Assam ha ka jaka ban pyndep ia kane ka kam kumba la iarai da ki ar District Council United Khasi & Jaintia Hills bad ka Mikir Hills ka pynmih pynban da ka shithi jong ka No.TAD/REV/121/69 dated 31.12.1970 bad ka ieng ban ong ba kat kum ka section3(i) ka Assam Reorganisation ( Meghalaya) Act 1969, ka Meghalaya kam don hok shuh ban dawa ia ki jaka kiba la pynkhlad na ka United Khasi & Jaintia Hills bad ka klet patde ba ia kane ka hukum jong ka Notification No.TAD/R/31/50/149 dated 13.4.1951 la pyniap da ka Notification No.RSR/296/51/130 dated 5.11.1957 bad ka shithi jong ka No.TAD/GA/83/50 dated 5.11.57 ha kaba iadei bad u pud u sam ka Jaintia Hills bad ka Mikir Hills uba la iakut bad mynjur da ki ar District Council ban pynphai na ka Mikir Hills Assam sha Jaintia Hills Meghalaya.

Ka Sorkar Meghalaya ha kane ka bynta hapoh ka jingialam jong u Capt. W.A. Sangma Chief Minister,ka ieng pyrshah ba ym pat don u pud u sam uba thikna hapdeng ka Jaintia Hills bad ka Mikir Hills ( Karbi-Anglong ba mynta) bad ia u pud u sam dei ban long kumba la iakut bad iarai lang bad mynjur da ka Joint Enquiry jong ki ar District Council bad lada ym lah ban pyntreikam ia ka kaba ki ar District Council ki la ia mynjur namarkata ka jingsurvey ia u pud u sam ( ground demarcation) tang da ka Assam Survey marwei ym lah ban pdiang naba ia ka Notification 1951 la pyniap da ka Notification jong ka snem 1957.Ha ka jingiakren jong ki Chief Minister Meghalaya bad Assam ( Chief Ministers level talk) da ka mynsiem jong ka jingiasngew shipara marjan ( Good neighbourly relation) la ia beit ba ia kane ka kam yn pynbeit ha ka jingiakynduh bad ka sien shongialang kaba arsien jong ki Chief Ministers.( Chief Ministers Political level talk).
Yn dang bteng