U pud u sam bad ka Assam, u dei ban long halor ka jingpynbeit pud 1875, ong ka Mizoram

Aizawl: Ka Mizoram boundary commission, ka kren shai, ba ka jing iakren pynbeit pud bad ka Assam, ka dei ban long, tang lyngba ka ain jong u snem 1875, kaba dei ka ain, kaba la tip, kum ka Bengal Eastern Frontier Regulation (BEFR) of 1873.

Ka jing ia kynad, ka la mih, hadien ba ka Mizoram, ka la pyneh, ia ka rai ban pynbeit pud bad ka Assam, halor ka jingdro maw pud ha u snem 1933.

Ka Mizoram, ka ong ba ka Inner Line Reserved Forest, kaba la pynmih hukum, ha u snem 1875, kaba la pynmih hapoh ka ain jong ka Bengal Eastern Frontier Regulation (BEFR) jong u snem 1873, ka dei ban long ka nongrim ban ia pynbeit pud.

Ha u snem 1875, ka sorkar British, ka la bate ia u pud hapdeng ka Cachar bad ka Mizoram, ha kaba la tip, ha katei ka por, kum ka Lushai Hills bad ha katei ka por, ka Mizoram, ka hap ha ka jylla Assam. Nangta ha u snem 1933, ka sorkar British, ka la phiah biang ia u pud, da kaba thaw da ki district bad kitei ki kynthup ia ka Lushai Hills (Mizoram), Cachar (Assam) bad ka Manipur.

Ka Mizoram, ka ia khlad bad ka Assam, ha u snem 1972, ha kaba ka ioh ia ka kyrdan jylla rit bad hadien kata, ha u snem 1987, ka ioh ia ka jylla ba pura.