U Principal Secretery ka KHADC

Shillong, 19 Naitung:
Ka KHNAM Youth Wing ka pyrshah ia ka jingthung Principal Secretary ka KHADC ia u Secretary barim sha ka Executive Committee u bah Welljune Syiemlieh. Halor katei mat ki nongialam ka KHNAM hapoh ka jingialam u President bah Thomas Passah ki la leit kynduh ia u CEM ka KHADC mynta ka sngi.
“Ngi pyrshah jur ban pynjlan ia ka samoi treikam jong utei u heh ophisar ka KHADC bad u CEM ha ka por ba la leit ula pynpaw ba un pynjlan tang 45 sngi ia ka samoi treikam jong u Secretary bad yn nym pynjlan shuh tang shi sngi ruh, hynrei mynta pat kala thung syndon ia utei u heh ophisar bala shongthait kum u Principal Secretary” ong u Thomas Passah haba iakren bad ki nongthoh khubor.
U bah Passah u la kynnoh ba katei ka jingthungkam ka KHADC ka dei tang ka jingpynsyrwa kai ia ka pisa khamtam ha kane ka por ba ka don hapdeng ka jingkyrduh pisa. “Shuwa ban pynjlan ia ka samoi treikam ka EC ka la dei ban bishar shwa ia ka ‘service record’ jong utei u ophisar ba la shongthait, hynrei katkum ka ‘service record’ jong u Secretary kam long kaba biang kumba la paw ha ka CAG Report 2008 la ka long ha ka liang ka pisa ka tyngka, ban tyngkai ia ki jingdon jingem jong ka council ne kiwei kiwei bad kam don kano kano kaba une u ophisar ula leh na ka bynta ka jingbha u paidbah (public interest) hynrei kadei tang ban leh bha ialade (personal interest)” ong u bah Passah uba la pynpaw ba ka KHNAM kan ai por shi bnai ia ka EC ba kan pynsangeh ia ka jingtreikam utei u Secretary barim ka KHADC.
Katba na ka liang u CEM pat u la ong ba ka jingpynjlan ia u bah Syiemlieh ka dei namarba ki dang don bun ki kam kiba sahteng jong ka Council bad hadien ba la sngewthuh bha ia ki kam ba sahteng u laong ba ka KHADC kan ym bat slem ia u.