U Pathaw

Kong Linda Kongwang

Ki jingmyntoi jongu pathaw haka liang ka koit ka khiah

U Pathaw la jutip ba u dei u jaid jhur uba dap kyrhai daka jingdon ki Vitamin, minerals, fatty acids, bad ki fibre. Kumta ka jingkynthup borabor ia u pathaw haki jingbam jongphi manla kapor kalong kaba donkam naka bynta ki jingmyntoi haka liang ka koit ka khiah jong ka met. Katkum ka jingshem ki stadwadbniah kilap baki nutrients kiba don ha u pathaw kidei kiba lah ban ai jingiada naka jingshahktah haka jingpang bampong (Cancers), ka jingjur ka acidity, ka jingthang haki bynta ba hapoh ka met. Udei ruh uba lah ban iarap halor ka jinghiar ka jingkhia, pynioh iaka sniehdoh kaba longkoit longkhiah, pynduna ka jingma na kaba don maw haki khyllai bad shibun kiwei pat ki jingmyntoi.

HARUM ki dei ki katto katne ki jingmyntoi kiba ngi ioh na u pathaw lada ngi bam borabor ia u.

1. KA VITAMIN A:— U pathaw la ju tip ba u dei uba riewspah halor ka jingdon ki antioxidants kiba la tip kumba ka Alpha-Carotene bad Beta carotene bad ki dei ki ba mih na kajuh ka thymmei jong ki carotenoids kiba lah ban pynkylla sha ka Vitamin A hapoh ka met .Ka Alpha carotene ka dei kaba ba lah ban ialeh pyrshah ia ki kynja at kiba mih ha kino kino ki bynta jong ka met ,iada na ka jingpang khmat bad iada ruh na ka jingkloi ringsti ka sniehdoh.Katba ka Beta-Carotene ka dei ka ba lah ban pynduna ka jingdon acid ha ka met kaba wallam ka jingthang bad byrhem hapoh ka met. Kane ka Vitamin ba ioh lyngba u pathaw ka lah ruh ban pynduna ki niangmong kiba mih na ka jingshah thang ha ka sngi. Ka dei ruh ka Vitamin kaba shim ia ka bynta ba kongsan halor ka jingkoit jingkhiah jong u klong snam.

2.KI FIBRE:— U pathaw udei ruh uba riewspah bha ha ka jingdon ki fibre . Namar ka jingbun ki fibre ha une u jhur ka lah ban iada na ka jingpang klongsnam bad iarap pynhiar ka jingkhia ka met ,pynbiang ia ka jingdon ka shini ha ka snam bad pyllait ruh na ka jingeh kpoh.

3.Ka POTASSIUM BAD ZINC:—Ym tang ki Vitamin ne ki fibre hynrei u pathaw u dei ruh uba don kyrhai ka potassium bad zinc ha u .ka jingdon ka potassium ha une u jhur ka iarap pynduna ia ka jingkiew ka blood pressure ka ba wallam ia ka jinglong koit long khiah ha u klong snam ,pyllait na ka jingma ban ngat ha ka jingpang stroke, ka jingdon maw ha ki khyllai bad na ka Type-2 diabetes. Katba ka zinc ka iarap pynkhlain iaka bormet bad ka dei kaba ai bor ia ki kynthei ki ba armet. Ki symbai pathaw ki dei ki thymmei ba kongsan eh ki zinc.

4. Ka VITAMIN C bad E:— Ka jingdon ka Vitamin C ha une u jhur ka lah ban iarap pynbiang ka jingdon ka cholestrol ha ka met bad pynkhlain ka jingpynmih iaki collagen bad ki fibrous protein. Katba ka Vitamin E ba ioh lyngba u pathaw ka iarap pynkhlain ia ka immune systems kaba lah ban ialeh pyrshah ia ki khniang jingpang bad pynkoit kloi ki jingmong ha ki dkhotmet . Ka jingkynthuplang ia ka Vitamin E bad C ka lah ban iada na ka jingpang Alzheimers bad kiwei de ki jing shitom.

5.KA MAGNESIUM:— Ka jingdon kyrhai ka magnesium ha u pathaw ka iarap pynbiang ia ki minerals kiba kongsan na ka bynta ban ioh ia ki shyieng ba khlaiñ bad ki bniat kiba koit ba khiah.

6.KA VITAMIN B5:—Kane ka Vitamin kaba lah tip ruh kum ka pantothenic acid ka dei jaid nutrients kaba iarap ban pynaram ia ka met na ka jinglongthait bad ka jingdon kane ka Vitamin B5 ha u pathaw ka iarap ruh ban pynbiang ia ki hormones .

7.KA TRYPTOPHAN:— Ka jingdon bun ka amino acids ha ki symbai pathaw ka lah ban thaw ia ki kynja chemical serotinin ka ba iarap halor ka jingiohthiah bha bad iada na ka jingktha khlieh.

Khublei