U paidbah da kyrduh katno katno ruh, kin ong ba ki la ioh da ki klur, ong U Dr. Celestine

Shillong:U MLA ka Umsning u Dr. Celestine Lyngdoh u la ong ba kam don kano kano ka jingdawa ban ai shuki myntri haba ki leit iasoh sha ka NPP hynrei ka kyndon kaba ki buh ka long ba ki kwah ban wanrah ia ki kam pynroi sha ki konstitwensi.

Haba kren hadien ba la iasoh bad ka NPP mynta ka sngi 19 tarik Nailar 2024, halor ka jingkynnoh ba ki paidbah ba kila shah thied da ki klur ha ka NPP, u Dr. Celestine u la ong ba watla ki MLA ki trei hok, ki kyrduh katno katno ruh ha iing, hynrei ka dei ka rukom jong ki paidbah ban kren kumta bad ia ka nia paidbah, ym lah ban tehlakam.
U la ong ba ki paidbah kin ong ba kine kila ioh da ki klur hynrei ka jingjop jong ki ha ka MLA kaba la dep, ka dei namar ba u paidbah u ieid ym da ka pisa.

“Ki paidbah kin ong ba kine kila ioh da ki klur, watla kyrduh katno katno ha iing ruh, hynrei ka kam paidbah, ym lah tehlakam, ka dei ka jingkren jong ki”, la ong u Dr. Celestine.
Halor ka jingkyllli ia ka kyntien high level tribe, kaba ula ther ha ka ïing dorbar kaba la dep, u Dr. Celestine u la ong ba dei naduh ba ula kren ia kane, ba ka jingkhaïi dewiong beain ka la kynjah mynta.

Ha kajuh ka por, u la ong ba ia ka shithi kaba kila ai sha u Speaker ka dei naduh ka 14 tarik Nailar 2024, ba ki la iasoh sha ka NPP bad ha ka 19 tarik Nailar 2024, u Speaker ula pynskhem ia ka rai jongki ban iasoh bad ka NPP da kaba phet na ka Congress hadien ba kila don 2/3 bynta na ka jingdon ki dkhot ka party.