U PAIDBAH BAD KA SAIN HIMA SIMA

W.B.S. Swer, Sohra

Ka Sain Hima Sima lane kata ka Politics ka mut kaba iadei bad u Paidbah. Yn pynsngewthuh kumno ia kane ka jingmut namar baroh ki ia tip ia kane ka jingmut kaba mut ka iap ka im jong u babun u balang.
Kiba ia don bynta ha kane ka kam ki dei hi ki paidbah, kumba ong U President Abraham Lincoln jong ka Ri America “ia u paidbah, da u paidbah bad na ka bynta jong u paidbah”. Lada ngi shim ia ka jingmut bashisha (positive sense) ka mut ba u paidbah hi u don bynta ban wanrah ia ka roi ka par lyngba ka jingsynshar kaba khuid namar la pynkupbor ha u ia kitei ki kyntien jong utei u Riewkhraw lyngba ka Riti Synshar jongngi.

Ngi ia tip baroh ba ha ka Ri jongngi ban pynurlong ia katei ka phang ne jingmut ka dei lyngba ka Election lane ban jied nongmihkhmat.
Kumba la ong ba dei hi u paidbah uba hap ban don bynta ha kane ka kam, baroh baroh ngi ia shim kabu da ka jingmut bym thikna tang namar ba ngi dei ki paidbah bad ngi iaid lait ruh na ki kyntien jong utei u Riewkhraw.

Ban ym tuh ia ka por ngan kren noh ia ka phang ha kaba iadei bad ka Election MLA 2023 hangne ha ka Jylla Meghalaya jongngi ba kumno u paidbah u hap ban pyrkhat bha ban wanrah ia kaei kaei kaba bha khamtam ha ka roi ka par. U paidbah hangne dei uba jied bad uba shah jied. Nga kren ia kane baroh da ka ktien kaba khia. Ha kaba iadei bad kane nga kren ym da kaba shah liang iano iano ne pynrem iano iano hynrei ban ia mir jingmut khamtam shuwa ban poi ka Election.

1. U Paidbah uba long u kyrtong jong ka Election: U Paidbah hangne u kwah ban long u nongmihkhmat lyngba ka Election. U pynbna ialade kum u kyrtong ba lada u jop un wanrah ia ka roi ka par lane kino kino ki jingkular ha ki paidbah kiba jied. U pynbna lyngba ki manifesto na ka seng ne party ba u ieng lane nalade hi kum u kyrtong shimet. Ki ktien pynbiej ki ktien pynthiang ki long kiba triem eh ban pyrkhat. Baroh baroh ia beh thong ia kane ka kam namar ka nongrim ba ha khmat eh dei ka pisa.
   Hangne u paidbah uba long u kyrtong u kwah ban pynbha ne pynkylla ia ka pyrthei jingsynshar jong u lada u jop. Hynrei ki kyntien jong u Leo Tolstoy ki ong “Everyone thinks of changing the world but no one thinks of changing himself” ba baroh ngi kwah ban pynkylla ia ka pyrthei hynrei ym don uwei ruh uba kwah ban pynkylla shuwa ialade.
2. Ki Party Election: Ki party ki long ki kynhun ba u Candidate u ieng Election. Don ki party jong ka Ri baroh kawei (National Party) ki party trai Ri (Regional Party), don ruh ki kyrtong ne candidate kiba ieng kum ki ‘riewshimet (Independent Candidate). Ngi ju ioh ia ki jingpynbiej na ki candidate ne ki canvasser ban ioh ia ka jingjop halor ka nongrim jong ki Party. Don kiba ong ba lada jied da ki National Party ka jingiarap kan wan buk buk na Delhi, khamtam halor ka nongrim jong ka pisa. Hynrei ha nga hi shimet nga sngew kum ha kane ka pyrthei mynta ka jingmyntoi katba kan poi sha ki lanot kan leit shuwa sha ki rakot.
   Lada ngi peit ne jied da ki party trai Ri ne Regional Party ki ban ker ban da, ban ri ban kdup ia ka Ri bad Jaitbynriew ba rit paid jongngi, tieng pat ioh shah shet kylla lada ki nongialam ki kylla jutang. Lehse ngi shem hi ia kata. U jhur u jhep u shngain ha ka diengkper (party) bad diengshynrang kper (nongialam) ban lait na ka blang ka masi kiba long ki umsaw ki ban rong noh ia ngi hynrei lada tlot noh ka diengkper bad diengshynrang shah ban kylla hi ha ki. Hangta kein ngin sa kynmaw ia ki ktien jong u Aesop ba u ong “wei la shet ka daw iing kumba phon thai ha ka umksang’.
   Nga kynmaw ha ki por ba la leit naduh nga dang rit, nga ju iohsngew ki don ki party kiba ia sdang ban ia tylli haba la dei ka por Election ban pynduh bor ia kiwei pat ki party ha ka por election bad khamtam lei hadien ka election. Ki paidbah kim ju sngewthuh ba “ki wieh ki ia tylli tang ha ka por tlang” (shuwa ka Election) bad “haba ar tylli ki miaw tang kawei ka tungtap la ki ia suk katno katno ruh shisien ka sngi te kin ia iap” (hadien ka Election) – Na Ka Thiar ki Longshuwa. Ha ka jingiaknieh tungtap ba ka kham sma iewbih jynjar sa u paidbah namar “haba artyli ki hati ki ia lympat nang lwet kai u phlang u kynbat”.
   Lada ngi jied ne peit da u kyrtong shimet (Independent) don kiba tieng ba u dei u kyrtong laitluid ioh un da don ha ka bor ioh un iaid laitlan khlem tip wan phai shuh sha la sem.
   Haba kumta nga mut ban ong iano iano ym lah shuh ban shanniah kum ha kane ka pyrthei ba mynta, la ka long ia ki party ne candidate. Ban pynduh jingkyrmen ruh ka bym dei, ha nga hi nga ong to ngin ia jied na kano kano ka party ne u ‘riewshimet tangba ki briew ki dei ban long ki kynsai wait ym ki kyntait wait. Nga kren ia kane da ka ktien kaba kham khia.
3. Ki jingshah pynbiej: Baroh ki iatip ia kane shuwa ka Election ngi ju shah pynbiej, ngi ju shah khroh. Ki canvasser bad ki candidate ki khroh ia ki paidbah da ki jait pa ki jait mat ne issue. Ban pynbiej ia ka bym shong hok ka long ka bym dei. U Abraham Lincoln u ong “you can fool all the people some of the time, you can fool only some people all the time, but you cannot fool all the people all the time”-phi lah ban pynbiej ia baroh ki briew tang khyndiat por, phi lah ban pynbiej ia khyndiat ki briew man la ka por, hynrei phim lah ban pynbiej ia baroh ki briew man la ka por.
   Ka jingkhroh pat ka iapher na ka jingpynbiej. Ngi shah khroh sa ia ka bym lah long lane ka ban iap sa ialade. U Aesop u ong “kiba khroh ia kiwei ki don la ka wait ban phah shut” Paidbah baroh wat shut kulmar ia ka wait jong kiwei ioh mong pynban ialade.
   Kum ki nuksa jong ka jingpynbiej: Don kiba ong lah kaba jied nongialam da uba riewspah namar um donkam tuh shuh bad lada u tuh ruh un ai ia ngi. Kane ka long wat ha ki kam shnong ruh. Uta uba riewspah ruh u kmen namar “the grass is always greener on the other side of the fence”-u phlang u kham jyrngam sha kper ki briew.
   Don kiba ong ruh ba lada jied da uba duk un sngewthuh kham bha ia ka jingeh ki paidbah namar ba u wan na ka tynrai ba duk lajong. Hynrei don pat kiba duk ynda ki la riewspah ki klet noh ia ka tynrai ba ki wan bad kim nang shuh ban iadei bad kiwei.
   Don kiba pynbiej paidbah ban ym jied nongmihkhmat da ki bym dei trai shnong. Ki ong ba ki dei ki nongwei. Ki ong ‘preference should be given to the son of the soil’. Lada ka bor pyniaid Election kam don jingthut ei ei ia kita ki nongwei balei pat ngin sngewthuh bakla. Lada u trai shnong u long kumba pynmareh thong da u kulai dkoh myntoi aiu ba un shong ha ka khet. Ki ktien tymmen jong ki Bengalee ki ong “Lada long ban pynlur lyngkha da ka blang kaba na shnong bad kaba tat dor, balei ban leit thied pynjynjar da u masi na shabar bad da uba rem”
   Ha kane ka juk mynta ngi shah pynbiej imat da ka pisa ruh. Mynshuwa ki Syiem ki teh mraw bad ring mraw da ki kynjri, ki da teh bad kti bad kjat da ki kynjri ne tyllai, ki pyllait noh ia ka jingmut jingpyrkhat, mynta pat la teh bad ring mraw ia ngi man ka sngi da ym dei ka por Election ruh, syndon da ka pisa, ka da teh ia ka jingmut jingpyrkhat ka pyllait noh ia ki kti ki kjat. Dei hangne ngi sa ong kiba buaid pisa, buaid politics, buaid samla, buaid kam shnong, buaid lorni, buaid riam bha, kim ju pyngngad shuh lano lano ruh. Kiba buaid kyiad da ki dih da kaba sngewthuh tang shiphang ki lah tipbriew.
4. Ka jinglong bad jingshem jong ki Candidate: Ki candidate ne ki kyrtong ialeh election ki ju don la ki jinglong ne ki jingiashem jong ki ki bapher bapher. Kum ki nuksa:
   a) Don ki kyrtong kiba da trei shitom bha ban ioh ia ka jingjop. Ki da iaid ka lynti kaba jngai ha ka jingpyrshang jongki. Kumba ar ne lai snem ki la trei shitom bad ki paidbah ruh ki la ithuh. Ha ka jingshisha ngim dei ban niew bein ne ibein ia ki. Hynrei shu wan mih ki ‘lur dih duma (Comet) da ka phlan duman sianti buit sniew jongno re jongno.
   b) Don ki kyrtong pat kiba don ia ka jingmut ban wanrah ia ka roi ka par ha ka Constituency hynrei da ka buit sianti jongno re jongno la pynpulom bad pynkhlemrain noh ia ki. Katno ka long kaba sngewsynei shisha ia ki halor ba ki nang don ia ka jingmut kaba bha. “The rose gives its fragrance even to the hands of a person who crushes it” kumba ong u Imam Ali.
   c) Don ki kyrtong kiba da bha shisha ka ktien ka thylliej naduh ka akor ka burom. Nga la ia kynduh bunsien ia iwei I longkmie iba mut ban ia aireng ha kane ka Election kaba mynta, iba da bha shisha ka ktien ka thylliej bad ka akor ka burom. Ka rukom kren jong I ia ki briew wat ha lynti syngkien ruh kaba da donakor shisha wat ia ki briew nabar Constituency jong i. Teng teng ha ki programme nga ju iohi ia I kum ka Chief Guest ruh, ka ktien ba nyngkong jong I ka long ka jingsngewnguh bad kynmaw ia U Blei.
   Ha kane ka rukom kren jongnga, nga la iakynduh ruh wat ki nonghikai kiba da donsap ban hikai ia ki khynnah ba kumno ki khynnah ki sngewthuh ia ki. Ki doctor ruh kumjuh kiba da dei kum ki doctor, tang mar ia kren ia ki nongpang, ki nongpang sngew kumba ki la koit lypa wat bym pat dih ia ka dawai. Imat wat ki nongialam paidbah ruh don kiba da I dei dur kum ki nongialam.
   Dei hangne nga sa sngewthuh ba ia ki briew kiba khraw bad kiba phylla ym ju kha man ka sngi ne ha ka juh ka jaka. La kha ia ki tang ha kano kano ka por ba ka Ri bad ka Jaitbynriew ka donkam eh, kum ia U Myllung Soso Tham, Mahatma Gandhi bad kiwei kiwei.
5. Ki nongaibuit aibor (adviser): Nga lyngngoh bha ba ju don ki Candidate kiba ju buh nongaibuit ban ialeh Election. Ki da leit sha ki kumno ban ioh jingmut. Kan myntoi aiu ban long nongialam ban da shanniah ha kiwei, haba U Proff. R.S. Lyngdoh u ong “Pyrthei mariang sawdong jongngi ka dei ka Library”
   Don ki nongaibuit kiba la long teng ki nongpynsniewdur ia ka imlang ka sahlang, kiba la pynjot ia ka shnong ka thaw, ka ilaka ka singmana, ka it ka hima, ki la pynsniewdur bad pyntroin ia ki shlem trei kam bad pynduhnong ia u babun u balang hynrei ki long ki canvasser bad adviser jong ki Candidate. Dei hangne pleng ba ki nongialam jongngi ki sa pynkylla khongpong ia ka Ri bad Jaitbynriew ynda ki la don ha ka bor. Lada ngi pan jingmut na u nongdih ngin sa kylla dih, na u nongtuh ngin sa kylla tuh. “A man is known by the company he keeps”
6. Ki Candidate kiba la ju don teng ha ka bor: Lada phi peit ia ki Candidate kiba la ju don teng ha ka bor bad kiba dang don ruh phin sa lap ba kumno ki wan sha ngi ki paidbah. Lada khyllem kino kino ki shlem trei kam kum ki karkhana, lada jia ba wan lynshop ki jingeh ia u paidbah, lada jia ba don ba iap mano mano na ki jingkulmar, lada don ba shah thngan ha surok na kano kano ka daw, mynta ba ki wan sha u paidbah kin ialeh kumno ban tei pop bad kynnoh ia kiwei ban lait ialade. Haba wan lei lei kum kitei ki jingeh ha ka por ba ki don ha ka bor kin ialeh ban phet krad bad kiar na u paidbah. Dei hangne ba u Aesop u sa ong “Ha ka suk pyrthei baroh baroh ki ia kwah long rangbah katba ha ka jynjar pyrthei baroh baroh ki ia kwah long khynnah”. Ki paidbah pat kumba khleh biej mynta por election ki ia shad ia kmen, ki ia iapbiej ia ki Candidate la kum ki bym leit shah thngan shuh, ki bym rah lama iong shuh lano lano ruh, tip ma tang shu don ki jingeh nang wanrah bam da kiwei, khamtam ki dorbar shnong, ki kynhun niam bad sengbhalang ha tyngkong iing.
   Don lei ki Candidate kiba la don ha ka bor kin trei tang kawei ka kam ki leit ialap kylleng kylleng ba ki lah trei shitom eh. La long kum ka syiar kha tang kawei ka pylleng ka kynktok baroh kawei ka shnong.
   Don ruh ki Candidate ha ka por ba ki la don ha ka bor mynshuwa ki pyni ba ki la don ha ki kyrdan bapher bapher ba ai ka sorkar ia ki kum ki nongmihkhmat, kum ka nuksa ki la long Member ne Chairman ha ki Department bapher bapher, Minister, Executive Member ha ki District Council, hynrei kawei ka jingmyntoi ha la Constituency khlem iohi ei ei. Ka jingpyni jong ki ba ki la long kumtei ka long kaba itynnat shisha la kum u sohtrun uba thiang, bun sa tang ki khmat kawei ruh ym lah ban peit, shong halor ka khet ruh ym lah ban synshar, phong ka pansngiat ruh ym don mano manoba burom.
   Ha kaba khatduh ka shong sa ha u paidbah ban bishar bha ban ioh u nongialam uba shlur, uba shynrang mynsiem bad uban ia tur sha u paidbah ha ka saw ka sian ym u ban phet krad ialade. U Myllung Fr. H. Elias u ong “Hangno u ‘saimuka u ba jan jah sur, ban kem ki sur ba jan jah lngaid, hangno u ‘Rangdajied bashlur, sajar ban ‘lam ia la u paid”
   Nga kren ia kine baroh da ka ktien kaba khia tam. Khublei shibun.