U NPR u iadei bad u Aadhaar number, ong u myntri

Shillong, 08 Lber:
U Myntri ka general administration u Bah HDR Lyngdoh u la ong ba ka national population registration (NPR) ka iadei beit bad u Aadhaar number bad ka sorkar ka dang pynkhreh ban sdang biang ban leit register hadien ba la pynbit pynbiang ia ki jingdonkam.
U Bah HDR Lyng-doh u la ong ia kane haba jubab ia ka jingkylli ba la wanrah da u MLA ka Nongkrem u Bah Ardent M Basaiawmoit mynta ka sngi hapoh ka iing dorbar.
U Bah HDR u la ong haduh mynta ka jingdon jong ki briew kiba la rejister ha ka National Population Register Biometric ha kane ka jylla ka la long tang 10 percent. “Ka jingpynrung kyrteng ia ki nongshong shnong ha ka jylla la pynkut noh da ka sorkar pdeng ia ka agency kaba leh ia kane ha ka 31 tarik Nohprah 2016 bad na kata ka daw, la pynsangeh shwa ia kane ka kam shipor”, la ong u Bah HDR.
Ka jingpynrung kyrteng kan sa sdang biang hadien ba ka sorkar pdeng kan thung ia ka agency ba thymmai na ka bynta kane ka kam, u la bynrap.
Ha kajuh ka por, u Bah HDR Lyngdoh u la kyntait ia ka kam ba ki paidbah kim pdiang ban leh ia u Aadhaar da kaba ong, “Mynta ki paidbah ka jylla ki la sdang ban pdiang ia u Aadhaar”.
U la ong ba kane ka jingsdang jong ki paidbah ban pdiang ka dei hadien ba ka bor sorkar ka la pynlong ia ka jingpynshai bad ban pynsngewthuh ia u paidbah sha kylleng ki jaka bad ki shnong.
Halor ka jingkylli u MLA na Rambrai ba ki paidbah ka West Khasi kim pat pdiang ia u Aadhaar, u Bah HDR u la ong, lada donkam ka sorkar kan sa pynlong biang ia ka jingpynshai paidbah halor kane.