U NONGSYNSHAR, HALOR KI HIMA KI JAIT BYNRIEW BAROH

D. PAKYNTEIN

2 Ki Khronikl 20:1. Te ka la jia ba ki khun Moab, bad ki khun Ammon, bad katto katne na ki nong Ammon ki la wan ban ialehthma ia U Jehoshaphat. Kane la ka pynsheptieng ym tang ia U Syiem hynrei ruh ia ka jait bynriew Judah. 2 Ki Khronikl 20:3 Bad U Jehoshaphat U la sheptieng, bad u la aiti ia lade ban wad ia U Trai, bad u la pynbna ka jingshah jingit ka Judah baroh. Hangne ngi iohi ba U Jehosaphat, um shym la lum ia ki rangbah shipai, ne ki lyngdoh ne ki rangbah ki iing ki kpa, ban ia pyrkhat kumno ban iada ia ka hima bad jaid bynriew, hynrei u khot ia ka jaitbynriew Judah baroh ban ialum lang bad ban wad ia ka jingiarap na U Trai. U Jehoshaphat um shym khnuim hynrei U la iaroh pynban ia U Blei da kaba ong, (2 Ki Khronikl 20:6) Ah Trai, U Blei ki kpa jong ngi, me mem long U Blei ha bneng? bad mem long U nongsynshar halor ki hima ki jait bynriew baroh? bad ha ka kti jong me ka long ka bor bad ka jinglah, kumta ym don ba lah ban ieng pyrshah ia me. Une U Syiem bakhraw, ym tang ba u shaniah bad ngeit beit ha U Blei hynrei uba lah ruh ban pynlong ia uta u paidbah ban shaniah bad ngeit beit ha U Blei. 2 Ki Khronikl 20:13- Bad ki Judah baroh ki la ieng ha khmat U Trai, lem bad ki khun barit jong ki, ki tnga jong ki, bad ki khun jong ki de, namar ki tip ba ki hap ban sheptieng tang ia U Blei hi, ym iano iano ruh.

Te U Blei U la jubab ia ki ha ka kitab 2 Ki Khronikl 20:14-15 lyngba U Jehasiel u khun U Sekharaiah, u khun U Benaiah, u khun U Jeiel, u khun U Mattaniah, u kynja Lebi, na ki khun shynrang U Asaph, la wan U Mynsiem U Trai hapdeng ka jingiaseng lang bad u la ong, To shahskhor, phi ki nong Judah baroh, bad phi kiba shong ha Jerusalem, bad me U Syiem Jehoshaphat, kumne U ong U Trai ha phi. Wat sheptieng, lymne wat khaweit namar une u paidbah bakhraw: namar ka thma kam long ka jong phi, hynrei ka jong U Blei. Lada ka thma ka dei ka jong U Blei, hato donkam mo ban leit sha madan thma? Hap hi ban leit. 2 Ki Khronikl 20:16 – 17 Lashai to phin leit hiar ban ialeh ia ki; ha khmih, ki wan na ka thiep Sis; bad phin shem ia ki ha kaba kut ka ktem, ha shuwa ka khlaw Jeruel, phim donkam ba ialeh ha kane ka thma: buh beit ia lade, to ieng thik, bad khmih ia ka jingpynim U Trai bad phi.