U nongniah u ong ban leit kit nongpang, u poi pynban sha ka kit kyiad, ong ka Umran Niangbyrnai

Nongpoh: Ka Dorbar Shnong Umran Niangbyrnai, ka la mih madan na ka bynta ban pynshai paidbah halor ka jingmih ha ki lad pathaikhubor ba ka kali kit Nongpang (Ambulance) na katei k shnong, ka la kylla long kum ka kali kit Kyiad.

Haba pynshai halor katei ka jingjia, la donlang naduh u Bah Stephen Kharbani, Rangbah Shnong, nangta u Bah Tistrong Iawsai, Secretary shnong lem bad kiwei ki dkhot ka shnong, ha kaba ki la ong ba ka Dorbar Shnong, ka khlem phah ia u Nongniah katei ka Ambulance ba kin leit kit Kyiad, hynrei ka dei ka jingshim kabu da u Nongniah, namar ha ka por ba u pan ia katei ka Ambulance, u ong ba leit shim dawai ia uwei u Nongpang sha Shillong.

Ka shnong ka la pynpaw ia ka jingsngkhia kaba jur halor katei ka jingjia, ha kaba ki la panmab na ka NEEPCO kaba la ai sngewbha ia katei ka Ambulance sha ka shnong bad kumjuh ruh ia ki paidbah, da kaba ong ba kim dei ban sngewthuh bakla, namar ka shnong kam shym la phah kit Kyiad ha katei ka kali kit Nongpang, hynrei ka dei tang ka kam kaba la leh da utei u Nongniah katei ka Ambulance.

Ka shnong ka sngewkhia ban tip, ba ki Pulit ki la pyllait noh ia kitei ki lai ngut ki briew kiba la shah kem, katba ia ka Ambulance pat ki dang bat, ha kaba na ka liang ka shnong ka kyntu ia ki Pulit ba kin pyllait noh ia katei ka Ambulance, hynrei ia ki briew kiba la kit Kyiad ha katei ka kali kit Nongpang, ka shnong ha ki ba kin leh ia kaba donkam baroh.