U nongialam ka CPP, u lah ban long u lamphang dorbar: Manstudy

Shillong, 16 Risaw:
U Bah Manstudy Nongrem, uba dei u lamphang ka dorbar District Council, u dei mynta, u nongialam jong ki 5ngut ki MDC Congress u dei ruh u lamphang jong ka iing dorbar.
Ha ka jingiakren bad U Rupang, U bah Nongrem, u iathuh ba kam don ka ain, kaba khang ia u nongialam jong ka Congress Parliamentary Party (CPP), ba un long ruh u lamphang ka iing dorbar bad kumta, u iathuh shuh shuh, ba um don jingthmu satia, ba un resain noh, kum u lamphang jong ka dorbar District Council ha ki khyndiat sngi ban sa wan. “Hangtei ka jied ka iing ban pyniaid dorbar bad kum u nongialam ka CPP, ka jied da ka seng” ong U bah Manstudy.
Haba kylli, ia ka jingdon jong ki 3ngut ki MDC, ba kynthup ia U Bah Albinus Lyngdoh, Bah Victor Rani bad U bah Hadrian Lyngdoh, kiba ka seng Congress kam pat pdiang satia ia ka jingiehnoh dkhot jongki; U Bah Nongrem, u iathuh ba kitei ki lai ngut ki don sha U bah PN Syiem bad u ong shuh shuh “Ki don 5ngut ki Congress ba shisha lane ki Congress nylla”.
Haba kylli, la kan don ne em ka jingthmu ban pynhap noh ia kane ka Executive Committee ba la ialam da U bah PN Syiem, U bah Nongrem, u iathuh ba ia mynta kam don kano kano ka jingthmu, namar ba ki burom, ia ka dorbar jong ka Council, kaba dei ban iaid ha ki ar sngi ban sa wan, ka ban sdang naduh ka 18tarik mynta u bnai bad U Bah Man, ula pynkut da kaba ong “Ai kan kut shwa ka jingshong dorbar bad hadien ka jingshong dorbar, ngin sa ia peit”.