“U Nonghikai”

AIS Suja

U Nonghikai ne Teacher, u long uta u briew uba don ka jingstad jingshemphang bad jingsngewthuh, uba don ka burom ka akor bad kumta ter ter. Te ki Jiw ruh ki niew ba u Jisu u long kum uta. Ki Jiw kim niew ba u Jisu u dei u Messiah lane u Khrist lane u khun u Blei. Wat u Nikodimus ruh uwei na ki riewstad ha ka niam Jiw uba long napdeng ki Pharisi, ha ka por ba u iakren bad u Jisu, u da ong – “Ko Nonghikai ne Rabbi ngi tip ba ME LONG U NONGHIKAI UBA WAN NA U BLEI. Ka daw ka long ba ym don uba lah ban leh ia kine ki kambah ia kiba me leh, lymda u Blei u don ryngkat bad me” ong u Nikodimus ia u Jisu. Ioanis 3:2.

Ha kane ka por, u Nikodimus u ngeit da kaba artatien ba u Jisu u dei uta u Messiah lane u khun u Blei hynrei u shu mutdur (suspect). U Nikodimus u tip ba u Jisu u long u Nonghikai bad kawei pat u ngeit ruh ba u Jisu u wan na u Blei. Ka daw ka long namar ki kambah kam phylla (miracles and wonders). U Nikodimus u la long u Nonghikai niam jong ki Jiw ha Israel. Hynrei haba u Jisu u la ong ha u Nikodimus – “Shisha shisha Nga ong ha me, lymda khapat (born again) ia u briew, te um lah ban iohi ia ka Hima u Blei” Ioanis 3:3.

U Nikodimus te u tip ia ka jingkha kaba tang shisien na ki kmie ki kpa, wat lada u long uba stad ruh hynrei um pei phang ia kata ka jingkha Arsien. Na kata ka daw u kylli ia u Jisu – Lah ban kha ia u briew haba u la tymmen? U lah ban bsut sha ka kpoh ka kmie jong u bad ban khapat ia u?
Lyngngoh ngain u Nikodinus ia ka jingong u Jisu – ba ka dei ban khapat ia u! Lada u stad katno katno ruh um pei phang ka mut aiu kata ka jingkhapat ne Born again. Hynrei u Jisu u iai ong ha u shisha shisha nga ong ha me lymda kha ia u briew na KA UM BAD NA U MYNSIEM, um lah ban leit hapoh ka Hima u Blei” Ioanis 3:5. U Jisu u pynshai shuh shuh – “Ia kaba la kha na ka doh, ka long doh, ia kaba la kha na u Mynsiem ka long Mynsiem” Ioanis 3:6. Ka daw ka long ba ka doh bad ka Mynsiem kim ia iaid lang shapoh ka Hima u Blei. Ka doh (flesh) lane ka met u briew kan leit phai sha ka dewmet ka khyndew. “Na ka dewmet me la long, sha ka dewmet men leit phai pat” Genesis 3:19. Balei? Namar ba ka doh bad ka snam kim lah ban ioh ia ka Hima u Blei, lymne kata ka pyut ia ka bym pyut” 1 Korinth 15:50.

Na kata ka daw, ka mynsiem te ka lah ban mihpat hadien ka jingiap. Namar la kha ia u briew na ka long mynsiem. Namar ia kaba la kha na u Mynsiem ka long mynsiem. Bad kane ka mynsiem (spirit) ka lah ban mihpat hadien ka jingiap. “Wat sngew kyndit ia kane: Naba ka por ka jia ha kaba kita baroh kiba ha ki jingtep KIN IOHSNGEW IA KA JINGPYRTA JONG U “ Ioanis 5:28.
Na kata ka daw kein, ka mynsiem u briew ka donkam palat ia ka Jingkhapat (Re born). Ka jingkhapat kaba kumno? Kaba na ka UM BAD NA U MYNSIEM. Ioanis 3:5. Ka mut kumno na ka UM bad na u MYNSIEM? Repent and Re-Baptise “To phin kylla bamut bad yn pynbaptis ia phi” Kam ki Apostol 2:38. Ym dei baptis shwa sa kylla bamut hadien.

Dei halor kane kajuh ka nongrim ba u Nikodimus u dang long tang ha ka doh te um pat sngewthuh ei ei ia kiba dei kaba kynja mynsiem. Nakata ka daw, u shu tip ba u Jisu u dei tang u Nonghikai uba khraw. U Jisu u ong ha u Nikodimus – “Me long u Nonghikai jong u ISRAEL bad men tip ia kine kiei kiei ruh?” Ioanis 3:10. Kaba mut, kumno men hikai khlem da tip ia ki jingshisha?
Kumta ka donkam ia iwei pa iwei ban sngewthuh ba KA DOH BAD KA SNAM, KAM LAH BAN RUNG SHAPOH KA HIMA U BLEI” 1 Korinth 15:50. Namar kata, dei ban khapat ia phi (be born again) Ioanis 3:3.