Shillong: Ka kynhun ka seng jong ki samla pule ka dong mihngi ka North East Students Organisation (NESO), ka la pyrshah jur ia ka jingthmu ka sorkar India ban thaw ain lyngba ka Citizenship Amendment Bill 2016, ban pdiang ia kiba long niam Hindu, Parsi, Buddhist, Khristan kiba sah ha Pakistan, Bangladesh bad Afghanistan ban wan long kum ki nongshong shong ka ri.
Ki nongialam jong ka NESO, haba ia kynduh ia ki dkhot ka Joint Parliamentary Committee (JPC) ha ka Sngi Palei:Wlytan
Myn hynnin ka sngi, ki nongialam ka NESO hapoh ka jingialam u Adviser u Dr Samujjal Bhattacharya bad u chairman u Bah Samuel Jyrwa ki la aiti ia ka dorkhas ha u chairman ka Joint Parliamentary Committee (JPC) u Rajendra Agarwal ha Shillong, ha kaba ki la pynpaw kawei ka sur, ba kim lah ban pdiang ia kane ka Bill ba la thaw da ka sorkar pdeng.
Haba kren sha ki nongthoh khubor hadien ba la iakynduh ia ki dkhot ka JPC, u Dr. Samujjal Bhattacharya u la ong ba ka NESO ka ai jingiaroh ia ka sorkar Meghalaya, kaba la rai ban pyrshah ia kane ka Bill bad kyntu ia baroh ki jylla jong ka dong mihngi ba kin ieng ha kajuh ka sur.
“Ngi la pynsngew ha ka JPC ba ka dong mihngi ka la shah iuhroit naduh ka jinglait luid ka ri India ha ka liang ka ioh ka kot bad kumjuh ha ka sain hima sima”, la ong u Samujjal.
U la ong biang, “Ha ka jinglaitluid na ka sorkar phareng, la buh ia ka NE bad ka Pakistan hynrei ngi hap ban iakhun pyrshah ia kane bad ha kata ka por u Mahatma Gandhi u la kyrshan ia ngi. Ha ka jingwan hiar thma ka China ha u snem 1962, u Myntri Rangbahduh ka ri ha katei ka por, u Jawahalal Nehru u la ong, Goodbye North East’,.
U la bynrap shuh, “Ha u snem 1949, la don ka jinglong ka jingman ha ka ri ha kaba u Myntri Rangbahduh ka ri, u la kyrpad ia ki Myntri Rangbah ka thain mihngi ban ai jaka sah ia ki phetwir na Bangladesh hynrei haba ki Myntri Rangbah ki la ong ba kim don jaka namar ba ki hap ban ai ia ki briew lajong, u Myntri Rangbahduh u la byrngem ban sangeh ban ai jingiarap pisa”, la ong u adviser ka NESO.
U la ong ba ka jingmut jingpyrkhat jong ki briew na Delhi ka long ka bym lah ban pdiang da lei lei ha ki paidbah ka dong mihngi.
“Ia kane ka Citizenship Amendment Bill 2016 la sdang da ka sorkar Congress ha ka por ka UPA hynrei la buddien tyngeh da kane ka sorkar NDA kaba mynta”, u la ong.
“Ngi la pynsngew ba ka dong mihngi kam dei satia ka jaka theh niut ia ki briew ban wan sah beain na Bangladesh”, u la ong.
U la ong ba ki briew ka dong mihngi ki la long kiba la sbun mynsiem shisha namar ba shwa u snem 1971, ki la ai jaka ia ki poiwir na Bangladesh hynrei shwa utei u snem (1971), ym don jaka shuh ia ki ban pdiang ha dong mihngi namar ba la shu thngain jubor ia ki briew na Bangladesh ha kane ka thain.
“Ka Assam bad ka dong mihngi baroh kawei, kam dei ka jaka bret ia ki briew na Bangladesh. Ngi la dep aisoi ia ki Accord bad ka sorkar India ba hadien u snem 1971, ngim lah shuh ban pdiang ia ki briew na Bangladesh hadien ba ngi la leh sbun shwa une u snem ia ki”, u la ong.
U la ong ba wat ka Supreme Court ka ri ka la ong ba namar ba ka jingjur ka jingwan rung beain ki briew na Bangladesh, ka la buh ka jingma ia ka ri bad ka Guwahati High Court ruh, ka la ong ba ki briew ba wan rung beain ha Assam na Bangladesh, ki long ki nongthung syiem.
“Hynrei kumno ka sorkar ka sngap bad kumno ka thmu ban wanrah shuh shuh ia ki briew na Bangladesh sha dong mihngi”, u la ong bad bynrap, “kine ki briew na Bangladesh ki wan rung beain lyngba ka Assam, Tripura, bad na kiwei ki jylla”.
“Ka sorkar UPA ba ialam ka Congress ka la ong ba ki don 1.2 klur ki Bangladesh kiba rung beain sha India, ha kaba ki don 57 lak ha West Bengal, bad 50 lak ha Assam bad kane ka sorkar NDA ba ialam ka BJP, ka la ong ba ki briew kiba wan rung beain na Bangladesh sha India ki la kot sha ka 2 klur bad kane ka la paw ba ka nangkiew”, u la ong.
“Kumno ngi lah ban leh sbun ia kine ki briew ba wan rung beain na Bangladesh, ngim lah ban leh sbun ban pdiang ia ki. Ngi don ki Sixth Scheduled, ki ain ia ki riewlum hynrei ki la shah skud jubor ha ki briew ba wan beain na Bangladesh”, u la ong.
U la ong ba ka NESO ka dawa ba ka sorkar India ka la dei ban thaw da ka ain kaba khain ban iada ia ki riewlum jong ka dong mihngi ba kin long trai halor ka khyndew ka shyiap, ka jaka puta, ka spah mariang.
“Ngi donkam ka ain ban iada ia ki riewlum bad ngi donkam ka Inner Line Permit (ILP)”, la ong u Samujjal bad dei ban pyntreikam ia ki jingiateh soskular ne ki Accord ba la iasoi.
U la ong ba ka Delhi ka pyrkhat ba ka India ka kut tang ha Kolkata bad ha kane ka thain mihngi ka la wanrah da ki ain iakjakor bahar rukom ban khnoit ia ki briew bad ka jingma kaba la paw ka long ka jingkylla rit paid ki trai shnong ha Tripura ha kaba ia ktien jongki ruh ym ithuh shuh.
U la ong ba na ka liang ki dkhot ka JCP ki la iaroh ia ka jingrah ka NESO ia kine ki point kiba shongnia bad kan sa aiti sha ka sorkar halor kane.
U la iathuh ba lashai ka sngi, ka NESO kan iashong jingialang ban iakren ia kane ka kam.
Ha kawei ka liang, u chairman ka NESO u Bah Samuel Jyrwa u la ong ba ka seng ka ieng pyrshah beit da kano kano ka lad ia kane ka jingthmu ban pynlong ain ia ka Bill namar ba kan buh ia ka jingma kaba jur bha ia ki trai shnong ka dong mihngi.
“Wat khlem pat don kane ka Bill, ngi la mad ia ka jingeh kaba jur na ka jingwan buhai shnong beain ki briew na Bangladesh, lada ailad biang ia kane ka Bill, ka long ka jingma kaba shyrkhei shuh shuh”, la ong u Bah Samuel.
U la ong ba shwa u snem 1971, la iasoi ia ki jingiateh ba bun bad ka sorkar India ban pdiang ia ki briew ba sah shwa utei u snem bad hadien katei ka snem, ym lah shuh ban pdiang ha dong mihngi.
U la ong ba ka NESO ka la pdiang ia ka rai ka sorkar Meghalaya ban pyrshah jur ia kane ka Bill bad kyrmen ba kiwei ki jylla, kin bud nuksa lang.