U Myntri Rangbah u ithuh ia ka Nongstoiñ tangba don ka elekshon: Pynshngaiñ

Shillong, 20 Naiwieng:
U Chief Executive Member ka Khasi Hills Autonomous District Council ( KHADC) u bah Pynshngaiñ N Syiem u la sangah biang ia u myntri rangbah ka jylla u Dr.Mukul Sangma halor ki jingkren jong u kiba u la kren ha ka sngi balang jong ka taiew ha ka jingialap elekshon ha Nongstoiñ ia u bah Gabriel Wahlang u kyrtong ka seng Congress. U Dr.Mukul u la ong ba ka hima Nongstoiñ kam donkam shuh ia ka Village Administration Bill (VAB) namarba katei ka Hima ka la don lypa la ka jong ka Aiñ naduh u snem 2003. Halor katei ka jingkren u Dr.Mukul u bah Pynshngaiñ u la ther kylla ia u bad u la ong “Hato ia ka Aiñ ka Hima Nongstoiñ ka Khasi Hills Autonomous District Council Nomination and Election of the Syiem, Deputy Syiem & Electors of Nongstoiñ Syiemship Act 2003 la thaw da ka sorkar MUA-II ne la thaw da ka District Council?”. U CEM u la ban biang da kaba ong “Ngam tharai ba lada jia bay m don ka elekshon shiteng samoi ba u myntri rangbah un ithuh ia ka Nongstoiñ”.
Shuh shuh u bah Pynshngaiñ u la ong ba ka jingkren u myntri rangbah u Dr.Mukul Sangma ka long kaba i thamula ha ka shiphang u kren da kumwei bad shiphang da kumwei pat kaba pyni ba u dei u briew u bymdon ia ka nongrim kaba skhem, “Mynta u ong ba ka Nongstoiñ ka la biang kam donkam shuh ia ka VAB,lada jia ba ha kato ka por kan treikam ka Ordinance, aiu kan jia ka Aiñ ka hima Nongstoiñ ka la iap-kane ka pyni ia ka jinglong ar jingmut u myntri rangbah” ong u bah Pynshngaiñ.
U la ong ruh ba ka daw kaba la pynlong ia u Dr.Mukul ban kren ia kitei ki ktien ka dei namarba ka plan jong u ka la pheil, ha kaba u la iathuh ba mynshuwa u la thaw ia ki komiti ban ithuh da ka aiñ ia ki khlieh nongsynshar, katba mynta pat hadien ba la pulom kitei ki komiti u la pynkohnguh ia lade ha kita ki aiñ kiba la don lypa ba la shna da ka District Council. Katei ka jingkren bun jingmut u MR kam dei tang ia kane ka kam hynrei ka la long ruh kumjuh ia ka kam ar maloi ki nongmihkhmat.