Nongpoh: U Bah Banteidor Lyngdoh, Myntri ka sorkar jylla bad uba deipeit ia ka tnat ki kam rep kam riang, hynne ka sngi u la hiar sha ka shnong Pahambir Them, da kaba pynlong jingialang ruh ha katei ka shnong, kata na ka bynta ban iakren halor ka jingeh kaba la kynduh da ki nongrep Sohtrun kiba don don ha katei ka thain.
Ha katei ka sngi ba u Myntri sorkar u hiar sha katei ka shnong, la sakhi da ka jingdon u Bah Mayrald Born Syiem, MLA Nongpoh, nangta ka Kong L. Kharkrang, Director ka tnat ki kam rep kam riang, ki nongialam shnong, Raid, ki SHG, Cooperative Society lem bad kiwei.
Ha ka jingiakren hapdeng u Myntri sorkar bad ki nongrep Sohtrun ha katei ka thain, ki la pynpaw shisha ia kata ka jingeh kaba kiba ki iakynduh ha ka ban pyniaid iew ia ki mar rep mar riang bad khamtam eh ia u Sohtrun, uba bun na ki briew kiba sah ha katei ka thain, ki sngewtynnad ban rep ia u Sohtrun, hynrei ka jingeh pat kaba ki shem, ka dei dei namar ba ki shem jingeh ban ioh ia ka jingpyniaid iew ha kata ka dor kaba biang.
Haba u Myntri u la ioh ban iakren markhmat bad ki nongrep Sohtrun, u la sngewthuh ia ka jingeh jong ki nongrep, namar ki la ioh ban pynpaw ia shibun ki jingeh kaba ki la shem ha ka jinglong jong ki kum ki nongrep, lyngba katei ka sngi kaba u la ioh ban iakren bad ki nongrep Sohtrun, utei u Myntri ka sorkar jylla, u la pynpaw syndon ia kata ka mynsiem ba un iarap katba lah ka bor, na ka bynta ban iarap ia ki nongrep bad khamtam ia ki nongrep Sohtrun ha Ri Bhoi.
Lyngba katei ka jingiakren bad ki nongrap Sohtrun, kaba ki la pynpaw jingeh halor ka jingpyniaid iew ia u Sohtrun bad khamtam eh namar ka jingbym don ka jaka die ne ban pyniaid iew ha kata ka dor kaba biang. Haba u Myntri u la sngew ia katei ka jingeh kaba la kynduh da ki nongrep Sohtrun, u la hap ban shimkhia halor katei ka kam. Kumta hi ha katei ka sngi, la iohi ia ka jingshimkhia u Myntri uba deipeit ia ki kam rep, ha ryngkat u Bah Mayrald Born Syiem, ki la leit syndon ban jurip ia kawei ka jaka kaba hap hapoh ka Raid Nongkhrah kaba don hajan ka shnong Lumbyrhing, na ka bynta ban pynkylla ia katei ka jaka kum kawei na ki jaka ban long kum ka Iew die Sohtrun.
Lyngba ka jingialang ha ka shnong Pahambir Them bad ruh hadien ka jingjurip ha katei ka jaka kaba la thmu ban pynlong kum ka Iew die Sohtrun, u Bah Mayrald Born Syiem, u la pynpaw ia ka jingsngew kmen eh ban iohi ba u Myntri ka sorkar, u shimkhia da lade ban hiar jurip bad ban kren ia ki briew ki dei ki nongrep bad nalorkata uba la shimkhia ruh wat ban pynioh ka jingiarap kaba kyrpang, na bynta ki nongrep bad khamtam eh na bynta ki Nongrep Sohtrun ym tang ha ka thain Nongpoh, hynrei ha Ri Bhoi hi baroh kawei.
Phi don ban ong eiei?